Salamo

(boky fahadimy)

Salamo toko 148

• 1 [Hiara-midera an’Andriamanitra anie ny zavatra rehetra any an-danitra sy etý an-tany]. Aleloia!
  Miderà an’ny Tompo any an-tampon’ny lanitra,
  miderà azy any ambony any!
• 2 Miderà azy hianareo anjeliny rehetra,
  miderà azy hianareo tafiny rehetra!
• 3 Miderà azy ry masoandro amam-bolana;
  miderà azy hianareo kintana mamirapiratra rehetra.
• 4 Miderà azy ry lanitry ny lanitra
  ary hianareo rano ambonin’ny lanitra.
• 5 Aoka hidera ny anaran’ny Tompo ireo:
  fa mandidy izy, dia hary izy ireo.
• 6 Nampitoetra ireo mandrakizay doria izy,
  ary nametraka lalàna izay tsy hodikaina.
• 7 Miderà an’ny Tompo etý an-tany, ry biby goay be anaty ranomasina,
  mbaminareo rehetra ranomasin-dehibe,
• 8 afo aman-kavandra, oram-panala aman’entona,
  rivotra mahery izay manatanteraka ny fandaharany,
• 9 tendrombohitra mbaminareo havoana rehetra,
  hazo fihinam-boa mbaminareo havoana sedera rehetra,
• 10 biby dia amam-biby fiompy isan-karazany;
  biby mandady amam-boro-manan’elatra,
• 11 mpanjakan’ny tany mbamin’ny vahoaka rehetra,
  mpanapaka mbaminareo rehetra mpitsara amin’ny tany,
• 12 zatovolahy sy virjiny tanora,
  lahiantitra sy zaza.
• 13 Aoka hidera ny anaran’ny Tompo izy ireo,
  fa ny anarany no hany lehibe,
  ny voninahiny dia ambonin’ny lanitra sy ny tany.
• 14 Nanandratra ny fahefan’ny vahoakany izy,
  foto-piderana amin’izay rehetra miraiki-po aminy,
  dia amin’ny zanak’Israely firenena akaiky azy.
  Aleloia!

Safidio ny BOKY avy amin’ny karazan-tsafidy ary lazao tsy voatery resahina ny TOKO sy ny ANDININY

Toute reproduction, même partielle, est interdite. Les droits d’auteur concernent la traduction, l’apparence et les fonctionnalités du site.