Salamo

(boky fahadimy)

Salamo toko 135

• 1 [Fiderana an’Andriamanitra - Ny asany mahagaga - Ny fiamboniany amin’ny sampy]. Aleloia!
  - Miderà ny anaran’ny Tompo,
  miderà azy hianareo mpanompon’ny Tompo,
• 2 hianareo manao fanompoana ao an-tranon’ny Tompo,
  eo an-kianjan’ny tranon’Andriamanitsika.
• 3 Miderà an’ny Tompo fa tsara Iaveh,
  mihirà ny anarany amin’ny harpa, fa mamy tanteraka.
• 4 Fa Iaveh efa nifidy an’i Jakoba ho azy,
  sy an’Israely ho lovany.
• 5 Eny, fantatro, lehibe Iaveh,
  ambony noho ny andriamanitra rehetra ny Tompontsika.
• 6 Manao izay tiany rehetra Iaveh,
  eny an-danitra sy ety ambonin’ny tany,
  any an-dranomasina sy any amin’ny hantsana rehetra.
• 7 Mampiakatra ny zavona avy amin’ny faran’ny tany izy;
  mandefa ny tselatra aman-dranonorana,
  mamoaka ny rivotra avy amin’ny firaketany.
• 8 Namono ny voalohan-terak’i Ejipta izy fahiny,
  hatramin’ny olona ka hatramin’ny biby.
• 9 Naneho famantarana amam-pahagagana izy,
  teo afovoanao, ry Ejipta,
  namelezany an’i Faraona sy ny mpanompony rehetra.
• 10 Firenena maro no nasiany,
  ary mpanjaka mahery no novonoiny:
• 11 Sehona mpanjakan’ny Amoreana, Oga mpanjakan’i Basàna,
  mbamin’ny mpanjaka rehetra tany Kanaana,
• 12 ka natolony ho lova ny tanin’ireo,
  dia ho lovan’Israely vahoakany.
• 13 Iaveh ô, maharitra mandrakizay ny anaranao:
  Iaveh ô maharitra amin’ny taona rehetra mifandimby ny fahatsiarovana anao.
• 14 Fa manome rariny ny vahoakany Iaveh,
  ary miantra ny mpanompony izy.
• 15 Ny sampin’ny firenena dia volafotsy amam-bolamena,
  asa-tànan’olombelona.
• 16 Manam-bava fa tsy miteny izy;
  mana-maso fa tsy mahita;
• 17 manan-tsofina fa tsy mahare izy,
  tsy misy fofon’aina akory aza ny vavany.
• 18 Hanahaka ireny anie ry zareo nanao azy,
  na iza na iza mitoky aminy!
• 19 Misaora an’ny Tompo, ry taranak’Israely!
  Misaora an’ny Tompo, ry taranak’i Aarona!
• 20 Misaora an’ny Tompo, ry taranak’i Levì!
  Misaora an’ny Tompo, hianareo matahotra an’ny Tompo!
• 21 Hisaorana avy ao Siona anie Iaveh,
  izay mitoetra ao Jerosalema!
  Aleloia!

Safidio ny BOKY avy amin’ny karazan-tsafidy ary lazao tsy voatery resahina ny TOKO sy ny ANDININY

Toute reproduction, même partielle, est interdite. Les droits d’auteur concernent la traduction, l’apparence et les fonctionnalités du site.