Salamo

(boky fahadimy)

Salamo toko 139

• 1 [Fankalazana ny fahalalan’Andriamanitra tsy misy fetra - Nahoana no fantatr’Andriamanitra, nefa avelany haharitra ihany ny tsy marina?] Ho an’ny mpampianatra hira. Nataon’i Davida.
  Iaveh ô, mizaha toetra sy mahalala ahy hianao:
• 2 fantatrao ny fipetrako sy ny fitsangako;
  tsinjovinao ny hevitro mbola lavitra.
• 3 Hianao mitsirika ahy na mandeha na mandry,
  ary mahazatra anao ny làlako rehetra.
• 4 Ny teny tsy mbola mby eo an-delako aza,
  efa fantatrao manontolo sahady, ry Iaveh.
• 5 Manodidina ahy eo alohako sy eo ivohoko hianao,
  ary apetrakao amiko ny tànanao.
• 6 Fahalalana mahagaga loatra, raha izaho, izany,
  ka ambony lavitra noho izay mety ho takatro.
• 7 Aiza no halehako lavitra ny fanahinao,
  aiza no handosirako lavitra ny tavanao?
• 8 Raha miakatra any an-danitra aho, any hianao,
  raha mandry any amin’ny seoly aho, indro ao hianao.
• 9 Raha maka ny elatry ny maraina aho,
  ka mandeha hitoetra any am-paran’ny ranomasina,
• 10 ny tànanao ihany koa no hitarika ahy any,
  ary ny tànanao ankavanana no hihazona ahy.
• 11 Ka milaza aho hoe: Ny aizina ahay mba hanarona ahy,
  ary ny alina no hany fahazavana hanodidina ahy!...
• 12 Tsy misy maizina ho anao, na ao amin’ny aizina aza,
  mamiratra toy ny andro ho anao ny alina,
  ary ny aizina toy ny fahazavana.
• 13 Hianao no namorona ny voako,
  sy nanenona ahy tao an-kibon’ineny.
• 14 Midera anao aho, amin’ny nanaovanao ahy ho zava-boahary mahagaga loatra:
  mahagaga ny asanao,
  ary mamin’ny fanahiko ny mieky izany.
• 15 Tsy niafina taminao ny tenako,
  tamin’ny namoronana ahy tao amin’ny miafina,
  voatenona tamim-pahaizana, tao amin’ny fanambanin’ny tany.
• 16 Fony zavatra vao torontoronina tsy nisy endrika akory aho no efa hitan’ny masonao,
  ary voasoratra teo amin’ny bokinao avokoa,
  ny andro voatendry hiainako,
  talohan’ny tsy mbola nisiany akory.
• 17 Ry Andriamanitra ô, mahafinaritra loatra lahy ny hevitrao!
  Endrey, izany hamaroany!
• 18 Raha manisa azy aho, mihoatra noho ny hamaroan’ny fasika ny isany;
  nony mifoha aho dia mbola eo aminao ihany!
• 19 Andriamanitra ô tsy handringana ny ratsy fanahy va hianao?
  Mialà amiko hianareo mpandatsa-dra!
• 20 Fiteny mahameloka no iresahany anao,
  manonom-poana ny anaranao ireo fahavalonao ireo.
• 21 Ry Iaveh , tsy tokony hataoko va ny mankahala izay mankahala anao,
  sy manao ho zava-betaveta an’ireo mitsangan-kanohitra anao?
• 22 Halako dia halako tanteraka tokoa ireny,
  fahavaloko izy ireny, raha izaho.
• 23 Zahao toetra aho, Andriamanitra ô, ka fantaro ny foko;
  tsapao aho, ka fantaro ny hevitro!
• 24 Jereo raha eo amin’ny làlan-dratsy aho,
  dia tariho eo amin’ny làlana mandrakizay.

Safidio ny BOKY avy amin’ny karazan-tsafidy ary lazao tsy voatery resahina ny TOKO sy ny ANDININY

Toute reproduction, même partielle, est interdite. Les droits d’auteur concernent la traduction, l’apparence et les fonctionnalités du site.