Ohabolana

Toko 28

• 1Ny ratsy fanahy mandositra, na dia tsy misy manenjika aza; Fa ny marina kosa dia matoky toy ny liona tanora.
• 2Ny fahotan*’ny tany mahamaro mpanapaka; Fa ny fisian’ny olona manan-tsaina** kosa no mampahateza ny fanjakana***. [*Na: fikomian’][**Na: manan-tsaina sady mahalala rariny][***Na: Fa noho ny manan-tsaina no haharetan’ny fahamarinana]
• 3Ny malahelo izay mampahory ny mahantra Dia toy ny ranonorana izay manindao ka tsy maha-misy hanina.
• 4Izay mahafoy ny lalàna dia mandoka ny ratsy fanahy; Fa izay mitandrina ny lalàna dia mirehitra amin’ny fanoherana azy.
• 5Ny ratsy fanahy dia tsy mahalala rariny; Fa izay mitady an’i Jehovah no mahalala ny zavatra rehetra.
• 6Ny malahelo izay mandeha amin’ny fahitsiany Dia tsara noho ny manan-karena izay mivadika ka mandeha amin’ny lalana miolikolika.
• 7Izay mitandrina ny lalàna no zanaka hendry; Fa izay misakaiza amin’ny mpandany harena dia manome henatra ny rainy.
• 8Izay mampitombo ny fananany amin’ny zana-bola sy ny tombony Dia mamory ho an’izay miantra ny malahelo
• 9Izay manentsin-tadiny tsy hihaino ny lalàna, Na ny fivavahany aza dia fahavetavetana.
• 10Izay mampivily ny mahitsy ho amin’ny lalan-dratsy Dia ho lavo amin’ny lavaka nataony; Fa ny tsy misy tsiny no handova ny soa.
• 11Ny manan-karena manao azy ho hendry; Fa ny malahelo izay manan-tsaina dia hizaha toetra azy.
• 12Raha ravoravo ny marina, dia be ny famirapiratana; Fa raha misandratra* kosa ny ratsy fanahy, dia miery ny vahoaka.[Na. mitsangana]
• 13Izay manafina ny fahotany tsy hambinina; Fa izay mitsotra ka mahafoy azy no hahazo famindram-po.
• 14Sambatra izay olona matahotra mandrakariva; Fa izay manamafy ny fony no hidiran-doza.
• 15Liona mierona sy bera miremby Ny mpanapaka ratsy fanahy amin’ny olona reraka.
• 16Ny mpanapaka tsy ampy saina dia mahery mampahory; Izay mankahala ny fieremana no ho ela velona.
• 17Izay itambesaran-keloka noho ny fandatsahan-drà dia handositra hatrany an-davaka; Aoka tsy hisy hihazona azy.
• 18Izay mandeha tsy misy tsiny no ho voavonjy; Fa izay mivadika ka mandeha amin’ny lalana miolikolika no ho lavo tampoka.
• 19Izay miasa ny taniny dia ho voky hanina Fa izay manaraka ny olom-poana* ho voky alahelo kosa.[Na: zava-poana]
• 20Izay olona mahatoky tokoa dia ho be fitahiana; Fa izay maimay ta-hanan-karena dia tsy maintsy hohelohina.
• 21Tsy mety raha mizaha tavan’olona; Kanefa na dia amin’ny sombin-kanina ihany aza dia sahin’ny olona hanotana.
• 22Ny mpialona dia maimay ta-hanan-karena; Tsy fantany fa hanjo azy ny alahelo.
• 23Izay mananatra olona no hahazo fitia be rahatrizay Noho izay mandrobo amin’ny lelany.
• 24Izay mandroba ray sy reny Ka manao hoe: Tsy heloka izany, Dia naman’ny mpanimba.
• 25Izay mierina* manetsika ady; Fa izay matoky an’i Jehovah dia hohatavezina.[Na: miavonavona am-po]
• 26Izay matoky ny fony dia adala; Fa izay mandeha amin’ny fahendrena no ho afa-miala.
• 27Izay manome ny malahelo tsy hanan-java-mahory; Fa izay mitampi-maso hahazo ozona be;
• 28Raha misandratra* ny ratsy fanahy, dia miery ny vahoaka; Fa raha ringana kosa izy, dia mihamaro ny marina.[Na: mitsangana]

Safidio ny BOKY avy amin’ny karazan-tsafidy ary lazao tsy voatery resahina ny TOKO sy ny ANDININY

BOKY Genesisy Eksodosy Levitikosy Nomery Deotoronomia Josoa Mpitsara Rota 1 Samoela 2 Samoela 1 Mpanjaka 2 Mpanjaka 1 Tantara 2 Tantara Ezra Nehemia Estera Joba Salamo Ohabolana Mpitoriteny Tonon-kiran’i Solomona Isaia Jeremia Fitomaniana Ezekiela Daniela Hosea Joela Amosa Obadia Jona Mika Nahoma Habakoka Zefania Hagay Zakaria Malakia Matio Marka Lioka Jaona Asan’ny Apostoly Romana 1 Korintiana 2 Korintiana Galatiana Efesiana Filipiana Kolosiana 1 Tesaloniana 2 Tesaloniana 1 Timoty 2 Timoty Titosy Filemona Hebreo Jakoba 1 Petera 2 Petera 1 Jaona 2 Jaona 3 Jaona Joda Apokalypsy    :    

Toute reproduction, même partielle, est interdite. Les droits d’auteur concernent la traduction, l’apparence et les fonctionnalités du site.