Ezekiela

Toko 1

• 1[Ny nahitan’i Ezekiela ny voninahitr’i Jehovah] Ary tamin’ny andro fahadimy tamin’ny volana fahefatra tamin’ny taona fahatelo-polo, raha teo amin’ny babo teo amoron’ny ony Kebara aho, dia nisokatra ny lanitra, ka nahita fahitana avy tamin’Andriamanitra aho.
• 2Tamin’ny andro fahadimy tamin’ny volana (taona fahadimy taorian’ny namaboana an’i Joiakina mpanjaka izany)
• 3dia tonga tamin’i Ezekiela mpisorona, zanak’i Bozy, ny tenin’i Jehovah tany amin’ny tanin’ny Kaldeana, teo amoron’ny ony Kebara; ary ny tànan’i Jehovah dia taminy teo.
• 4Ary hitako fa, indro, nisy tafio-drivotra avy tany avaratra, dia rahona lehibe sy afo mifandrambondrambona, sady nisy namirapiratra manodidina azy; ary avy teo amin’ny afo dia nisy toy ny volon’ny metaly mamirapiratra.
• 5Ary teo aminy koa nisy toa endriky ny zava-manan’aina efatra. Ary ny fikery azy dia hoatra ny endrik’olona.
• 6Ary samy nanana tarehy efatra sy elatra efatra avy izy.
• 7Ary mahitsy ny tongony; ary ny faladiany dia tahaka ny faladian’ny ombilahy kely; ary mamirapiratra toy ny volon’ny varahina manganohano izy.
• 8Ary nisy tanan’olona teo ambanin’ny elany teo amin’ny lafiny efatra, ary samy nanana ny tarehiny sy ny elany avy izy efatra.
• 9Nifanendry ny elany; tsy niherika izy raha nandeha, fa samy nizotra tamin’izay hitsiny avy izy rehetra.
• 10Ary ny toetry ny tarehiny dia tahaka ny tarehin’olona; ary tamin’ny ankavanany dia samy nanana ny tarehin’ny liona izy efatra, ary tamin’ny ankaviany dia samy nanana ny tarehin’omby, ary samy nanana ny tarehin’ny voromahery koa izy efatra.
• 11Ary ny tarehiny sy ny elany dia nisaraka hatreo ambony: samy nisy roa nifanendry tamin’ny an’ny namany, ary ny roa nanarona ny tenany.
• 12Dia samy nizotra tamin’izay hitsiny avy izy, ka na aiza na aiza no tian’ny fanahy ho nalehany dia nalehany: tsy niherika izy raha nandeha.
• 13Ary tahaka ny vainafo mirehitra ny fijery ny zava-manan’aina, dia tahaka ny fijery ny fanilo; nivoivoy teny anelanelan’ny zava-manan’aina ny afo; ary namirapiratra ny afo, sady nisy helatra nivoaka avy tao aminy.
• 14Ary ny zava-manan’aina nifanaresaka nankary nankatsy toy ny helatra mifelopeloka.
• 15Ary hitako ny zava-manan’aina, fa, indro, nisy kodia iray avy teo ambonin’ny tany, teo anilan’ny zava-manan’aina teo anoloan’ny tarehiny efatra.
• 16Ny tarehin’ny kodia sy ny rafiny dia tahaka ny volon’ny krysolita, ary nitovy endrika izy efatra, ary ny tarehiny sy ny rafiny dia toy ny kodia anatin’ny kodia.
• 17Raha nandeha izy, dia nandeha tamin’izay hitsin’ny lafiny efatra: tsy niherika izy raha nandeha.
• 18Ary ny boriboriny manodidina azy dia avo sy mahatahotra, sady feno maso manodidina izy efatra.
• 19Ary raha nandeha ny zava-manan’aina, dia nandeha teo anilany koa ny kodia; ary raha niainga tsy nipaka tamin’ny tany ireo zava-manan’aina, dia mba niainga koa ny kodia.
• 20Na aiza na aiza no tian’ny fanahy ho naleha dia nalehan’ireo koa; fa any koa no mba tian’ny fanahy haleha, ary ny kodia dia niainga teo anilany; fa teo amin’ny kodia ny fanahin’ny zava-manan’aina.
• 21Raha nandeha ireny, dia mba nandeha koa ireto; ary raha nijanona ireny, dia mba nijanona koa ireto; ary raha niainga tsy nipaka tamin’ny tany ireny, dia mba niainga teo anilany koa ny kodia; fa ny fanahin’ny zava-manan’aina dia tao amin’ny kodia.
• 22Ary teo ambonin’ny lohan’ny zava-manan’aina dia nisy toa endriky ny eloelo, toy ny volon’ny krystaly mahatahotra, mivelatra eo ambonin’ny lohany.
• 23Ary nivelatra mahitsy sady nifanendry ny elany teo ambanin’ny eloelo: samy nanan-droa avy izy rehetra, izay nanaronany ny tenany.
• 24Ary raha nandeha izy, dia nahare ny fikopakopaky ny elany aho, toy ny firohondrohon’ny rano be, dia tahaka ny feon’ny Tsitoha, dia feo toy ny fireondreon’ny miaramila mitoby;
• 25Ary nisy feo avy teo ambonin’ny eloelo izay teo ambonin’ny lohany; nony nijanona izy, dia namihina ny elany.
• 26Ary teo ambonin’ny eloelo, izay teo ambonin’ny lohany, dia nisy endriky ny seza fiandrianana mitovy volo amin’ny vato safira; ary teo ambonin’ny endriky ny seza fiandrianana dia nisy hoatra ny endrik’olona.
• 27Ary nahita toy ny volon’ny metaly mamirapiratra aho, dia hoatra ny tarehin’ny afo manodidina azy; ary hatramin’ny valahany no ho miakatra ka hatramin’ny valahany no ho midina dia hitako tahaka ny afo, ka nisy namirapiratra manodidina azy.
• 28Toy ny tarehin’avana amin’ny rahona amin’ny andro nisy ranon’orana no tarehin’ny namirapiratra manodidina. Izany no fijery ny endriky ny voninahitr’i Jehovah. Ary nony nahita izany aho, dia nikarapoka nihohoka ka nandre ny feon’ny anankiray niteny.

Toko 2

• 1[Ny niantsoana an’i Ezekiela ho mpaminany] Ary hoy Izy tamiko: Ry zanak’olona, mitsangàna, fa hiteny aminao Aho.
• 2Ary nisy fanahy tonga tao anatiko*, raha niteny tamiko Izy, ka nampitsangana ahy, ary reko Izay niteny tamiko.[Na: nody ny aiko]
• 3Ary hoy Izy tamiko: Ry zanak’olona, maniraka anao ho amin’ny zanak’Isiraely Aho, eny, ho amin’ireo jentilisa mpiodina, izay efa niodina tamiko; izy sy ny razany dia samy efa nanota tamiko avokoa mandraka androany.
• 4Ary ho any amin’ny zanaka mafy handrina sy madi-po no anirahako anao, ary ianao hanao aminy hoe: Izao no lazain’i Jehovah Tompo.
• 5Ary na hihaino izy na tsy hihaino (fa taranaka maditra izy), dia ho fantany fa efa nisy mpaminany teo aminy.
• 6Ary ianao, ry zanak’olona, aza matahotra azy, ary aza matahotra ny teniny, na dia voakasiky ny amiana* sy ny tsilo aza ianao, ary na dia eo amin’ny maingoka aza no ipetrahanao; eny, aza matahotra ny fiteniny, ary aza mivadi-po noho ny tarehiny, fa taranaka maditra izy. [Na: maditra]
• 7Ary holazainao aminy ihany ny amiko, na hihaino izy na tsy hihaino, fa tena naditra izy.
• 8Fa ianao kosa, ry zanak’olona, mihainoa izay lazaiko aminao; aza maditra tahaka izany taranaka maditra izany ianao; akafy ny vavanao, ka hano izay afahako anao.
• 9Ary hitako fa, indro, nisy tanana nahinjitra tamiko, ary, indro, nisy horonan-taratasy ny aminy.
• 10Dia novelariny teo anatrehako izany, ary nisy soratra teo anatiny sy teo ivoany; ary fitomaniana sy fidradradradrana loza no voasoratra teo.

Toko 3

• 1Ary hoy Izy tamiko: Ry zanak’olona, hano izay hitanao, eny, hano ity horonan-taratasy ity, dia mandehana, ka mitenena amin’ny taranak’Isiraely.
• 2Dia nosokafako ny vavako, ary nafahany ahy izany horonan-taratasy izany.
• 3Ary hoy Izy tamiko: Ry zanak’olona, vokiso ny kibonao, ary fenoy ny horonan-taratasy omeko anao ity ny tsinainao. Dia nihinana aho, ka, mamy tao am-bavako toy ny tantely izy.
• 4[Ny nanirahana an’i Ekeziela hilaza ny tenin’i Jehovah tamin’ny Isiraely] Ary hoy Izy tamiko: Ry zanak’olona, andeha mankany amin’ny taranak’Isiraely, ka lazao aminy ny teniko.
• 5Fa tsy ho any amin’ny firenena miboediboedi-piteny sy miboeriboerika no anirahana anao, fa ho any amin’ny taranak’Isiraely ihany;
• 6tsy ho amin’ny firenena maro, izay miboediboedi-piteny sy miboeriboerika, ka tsy ho azonao ny teniny, fa raha maniraka anao ho amin’ireto Aho, dia hihaino anao izy.
• 7Fa ny taranak’Isiraely dia tsy mety mihaino anao, satria tsy mety mihaino Ahy izy; fa ny taranak’Isiraely rehetra dia mafy handrina sady madi-po.
• 8Indro, efa nohamafiko ny tarehinao hiatrika amin’ny tarehiny sy ny handrinao hanandrina ny handriny.
• 9Ataoko toy ny diamondra ny handrinao, eny, mafy noho ny vatolampy aza; ka aza matahotra azy na mivadi-po noho ny tarehiny, fa taranaka maditra izy.
• 10Ary hoy Izy tamiko: Ry zanak’olona, ny teny rehetra izay holazaiko aminao dia aoka ho mamin’ny fonao*, ka henoy amin’ny sofinao.[Heb. raiso amin’ny fonao]
• 11Dia mandehana mankany amin’ny babo, dia ireo zanaky ny firenenao ary mitenena aminy hoe: Izao no lazain’i Jehovah Tompo na hihaino izy na tsy hihaino.
• 12Ary nisy fanahy* nanainga ahy, dia nandre horakoraka be teo ivohoko aho nanao hoe: Isaorana anie ny voninahitr’i Jehovah avy amin’ny fitoerany. [Na: rivotra]
• 13Ary reko koa ny fikopakopaky ny elatry ny zava-manan’aina, izay nifanendry, sy ny fidilodilotry ny kodia teo anilany sy ny horakoraka be.
• 14Ary nisy fanahy* nanainga ahy ka nitondra ahy, dia lasa aho sady nirehitra** tamin’ny fahavontosan’ny fanahiko; ary ny tànan’i Jehovah dia nahery tao amiko.[*Na: rivotra][**Heb. mangidy]
• 15Dia tonga tany amin’ny babo tany Telabiba aho, dia teo amin’izay nonina teo amoron’ny ony Kebara, teo amin’izay nipetrahany, ary mandritra ny hafitoana dia tahaka ilay torana iny aho.
• 16Ary nony afaka ny hafitoana, dia tonga tamiko ny tenin’i Jehovah nanao hoe:
• 17Ry zanak’olona, efa nataoko mpitily ho an’ny taranak’Isiraely ianao; ka dia hohenoinao ny teny avy amin’ny vavako, ary avy amiko no hananaranao azy.
• 18Raha hoy Izaho amin’ny ratsy fanahy: Ho faty tokoa ianao! ary tsy mananatra azy ianao, na miteny hananatra ny ratsy fanahy, hialany amin’ny lalany ratsy hamonjena ny ainy, dia ho faty amin’ny helony ihany ilay ratsy fanahy; nefa hadiniko amin’ny tananao ny ràny.
• 19Fa raha mananatra ny ratsy fanahy kosa ianao, ka izy no tsy mety miala amin’ny faharatsiany sy amin’ny lalany ratsy, dia ho faty amin’ny helony ihany izy; fa ho voavonjinao ny fanahinao.
• 20Ary koa, raha ny marina miala amin’ny fahamarinany ka manao meloka, ary mametraka fahatafintohinana eo anoloany Aho, dia Ho faty izy; eny noho ny tsy nananaranao azy dia ho faty amin’ny fahotany ihany izy, ary ny fahamarinana izay nataony tsy hotsaroana, nefa kosa hadiniko amin’ny tananao ny ràny.
• 21Fa raha mananatra ny marina mba tsy hanota ianao, ka tsy manota izy, dia ho velona tokoa izy, satria nino anatra; ary voavonjinao koa ny fanahinao.
• 22[Faminaniana ny amin’ny hanjo an’i Jerosalema] Ary ny tànan’i Jehovah dia tamiko, ary hoy Izy tamiko: Mitsangàna, ka mivoaha ho any amin’ny lohasaha, ary any no hitenenako aminao.
• 23Dia nitsangana aho ka nivoaka nankany amin’ny lohasaha; ary, indro, nitoetra teo ny voninahitr’i Jehovah tahaka ny voninahitra izay efa hitako teo amoron’ny ony Kebara ihany dia nikarapoka nihohoka aho.
• 24Ary nisy fanahy tonga tao anatiko ka nampitsangana ahy; dia niteny tamiko Izy ka nanao hoe: Andeha, mirindrina ao anatin’ny tranonao ianao.
• 25Fa ianao, ry zanak’olona, indro, hasiany fatorana, izay hamatorany anao, ka tsy hahazo mivoaka ho ao aminy ianao.
• 26Ary hampiraiketiko amin’ny lanilaninao ny lelanao, ka ho moana ianao ary tsy ho mpananatra azy; fa taranaka maditra izy.
• 27Fa raha miteny aminao Aho, dia hosokafako ny vavanao, ka dia holazainao aminy hoe: Izao no lazain’i Jehovah Tompo: Izay mihaino, dia aoka izy hihaino; ary izay tsy mihaino, dia aoka izy tsy hihaino kosa; fa taranaka maditra izy.

Toko 4

• 1Ary ianao, ry zanak’olona, makà kapila tanimanga, ary apetraho eo anoloanao, dia manorata sarin-tanàna eo aminy, dia sarin’i Jerosalema;
• 2ary ataovy fahirano izy, ka manaova tilikambo hamelezana azy, ary manandrata tovon-tany manodidina azy; ary asio toby hamelezana azy, ary asio lohondry vy fandravana manodidina azy.
• 3Ary makà lapoely, ka ataovy manda vy eo anelanelanao sy ny tanàna, dia banjino tsara io, ary aoka hatao fahirano, eny, aoka hataonao fahirano io. Famantarana ho amin’ny taranak’Isiraely izany.
• 4Ary ataovy ambany mandry ny ilanao ankavia, ka ataovy eo aminy ny fahotan’ny taranak’Isiraely; koa araka ny isan’ny andro handrianao toy izany no hitondranao ny helony.
• 5Fa Izaho dia manao fetr’andro ho anao mitovy amin’ny taonan’ny helony, dia sivi-folo amby telon-jato andro, ka ho entinao ny heloky ny taranak’Isiraely.
• 6Ary rehefa tapitrao ireo, dia ataovy ambany mandry kosa ny ilanao ankavanana, ary aoka hitondra ny heloky ny taranak’i Joda efa-polo andro ianao; ny indray andro no nataoko solon’ny herintaona ho anao.
• 7Dia banjino tsara io fahirano an’i Jerosalema io, ary aoka hiseho sandry ianao ka haminany hamely azy.
• 8Ary, indro, hafatotro ianao ka tsy hahavadi-mandry ambara-pahatapitrao ny andron’ny fahiranonao.
• 9Ary mangalà vary tritika sy vary hordea sy tsaramaso sy voanemba* sy ampemby sy spelta ianao, ary ataovy am-bilia iray ireo, ka anaovy mofo ho anao; araka ny isan’ny andro izay handrianao amin’ny ilanao, dia sivi-folo amby telon-jato andro, no hihinananao azy. [Heb. nangidy]
• 10Ary an-danjany no hihinananao ny haninao, dia roa-polo sekely isan’andro; asio elanelany ny fihinanao azy.
• 11Ary rano afàtra no hosotroinao, dia ampahenin’ny hina; asio elanelany koa ny fisotronao azy.
• 12Ary hatao toy ny mofo vary hordea no ho fihinanao azy, ary diky no hataonao kitay hanendasanao azy eo imasony.
• 13Ary hoy Jehovah: Toy izany no hihinanan’ny zanak’Isiraely ny mofony voaloto any amin’ny firenena izay handroahako azy.
• 14Dia hoy izaho: Indrisy Jehovah Tompo ô, indro tsy voaloto ny fanahiko; fa hatry ny fony aho mbola tanora ka mandraka ankehitriny dia tsy mba nihinana izay fatin-javatra na izay noviraviraim-biby akory aho; ary tsy mbola nikasika ny vavako akory izay nofo fahavetavetana.
• 15Dia hoy Izy tamiko: Indro, tain’omby no omeko anao hisolo ny dity, ka izany no hataonao kitay hanendasanao ny mofonao.
• 16Ary hoy koa Izy tamiko: Ry zanak’olona, indro, hotapahiko any Jerosalema ny mofo, tohan’aina, ka an-danjany amin’ny fanahiana no hihinanany mofo; ary rano afàtra no hosotroiny amin’ny fahatahorana.
• 17Ka dia ho mosare-mofo sy rano izy, ary samy ho raiki-tahotra sady hihalevona noho ny helony.

Toko 5

• 1Ary ianao, ry zanak’olona, dia makà sabatra maranitra ho toy ny harezan’ny mpanala volombava, ka anarato ny lohanao sy ny somotrao, dia makà mizana, ka zarao ny volo.
• 2Ny ampahatelony dia dory amin’ny afo ao an-tanàna, rehefa tapitra ny andron’ny fahirano; ary alao koa ny ampahatelony, ka asio ny sabatra manodidina; ary ny ampahatelony dia aelezo ho amin’ny rivotra; ary hanatsoaka sabatra ho enti-manenjika azy Aho.
• 3Ary analao vitsivitsy ireo, ka fonosy ao amin’ny sisin-dambanao.
• 4Ary ireny indray dia mbola analao koa, dia atsipazo eo anaty afo izany, ka dory eo fa hisy afo hivoaka avy aminy ho amin’ny taranak’Isiraely rehetra.
• 5Izao no lazain’i Jehovah Tompo: Ity Jerosalema ity dia nataoko eo afovoan’ny jentilisa, ka voahodidin’ireny tany ireny izy.
• 6Ary nanao ditra tsy nanaraka ny fitsipiko sy ny didiko izy, fa nanao ratsy mihoatra noho ny jentilisa sy ny tany manodidina azy; eny, nanao ditra tsy nanaraka ny fitsipiko sy ny didiko izy ka tsy nandeha araka izany.
• 7Koa izao no lazain’i Jehovah Tompo: Satria ianareo nitabataba mihoatra noho ny firenena manodidina anareo ka tsy nandeha araka ny didiko na nanaraka ny fitsipiko sady tsy nanaraka ny fitsipiky ny firenena izay manodidina anareo aza,
• 8dia izao no lazain’i Jehovah Tompo: Indro, Izaho dia Izaho no mamely anao ka hanao fitsarana eo aminao eo imason’ny firenena.
• 9Ary noho ny fahavetavetanao rehetra dia hataoko aminao izay tsy mbola nataoko, sady tsy hataoko tahaka izany intsony.
• 10Koa ny ray dia hihinana ny zanany eo aminao, ary ny zanaka kosa hihinana ny rainy; ary hanao fitsarana eo aminao Aho, ary izay sisa rehetra aminao dia haeliko ho amin’ny rivotra rehetra;
• 11eny, raha velona koa Aho, hoy Jehovah Tompo, noho ny nandotoanao ny fitoerako masina tamin’ny zava-dratsinao rehetra sy tamin’ny fahavetavetanao rehetra, Izaho kosa dia hampiala ny masoko, fa tsy hiantra; eny, Izaho dia tsy hamindra fo.
• 12Ny ampahatelony eo aminao dia ho fatin’ny areti-mandringana na ho ringan’ny mosary eo aminao; ary ny ampahatelony dia ho lavon’ny sabatra manodidina anao; ary ny ampahatelony dia haeliko ho amin’ny rivotra rehetra, ary hanatsoaka sabatra ho entiko manenjika azy Aho.
• 13Ary ho tanteraka amin’izany ny fahatezerako, sady hampariko aminy ny fahatezerako, ka hialako fo izy; dia ho fantany fa Izaho Jehovah no niteny izany tamin’ny  fahasaro-piaroko, rehefa notanterahiko taminy ny fahatezerako.
• 14Ary hataoko lao sy fandatsa eny amin’ny firenena izay manodidina anao ianao eo imason’izay rehetra mandalo.
• 15Ka dia hisy latsa sy fitenenan-dratsy sy famaizana sy figagana avy amin’ny jentilisa manodidina anao, rehefa manao fitsarana aminao Aho amin’ny fahatezerana sy ny fahavinirana ary amin’ny fananarana mafy Izaho Jehovah no niteny izany
• 16raha alefako ho fandringanana azy ny mosary dia ny zana-tsipìka ratsy izay halefako handringana anareo, sady hampitomboiko ny mosary eo aminareo, ka hotapahiko ny mofonareo, izay tohan’aina.
• 17Dia haterako mosary sy biby masiaka eo aminareo, izay hahalany fara anareo; ary handroso eo aminao ny areti-mandringana sy ny fandatsahan-drà, ary hataoko mihatra aminao ny sabatra. Izaho Jehovah no niteny izany

Toko 6

• 1[Ny amin’ny handravana ny fomban’ny sampy sy ny mpivavaka aminy] Ary tonga tamiko ny tenin’i Jehovah nanao hoe:
• 2Ry zanak’olona, manandrifia ny tendrombohitry ny Isiraely, ary maminania ny hamelezana azy,
• 3ka ataovy hoe: Ry tendrombohitry ny Isiraely ô. Mihainoa ny tenin’i Jehovah Tompo: Izao no lazain’i Jehovah Tompo amin’ny tendrombohitra sy ny havoana, ary ny lohasahan-driaka sy ny lohasaha: Indro, Izaho no hahatonga sabatra hamely anareo, ary horavako ny fitoerana avonareo.
• 4Ary hokoroina ny alitaranareo, ary hosimbana ny tsangan-kazonareo* ho an’ny masoandro; ary hataoko mitsitra eo anoloan’ny sampinareo ny fatinareo;[Na: tsangam-batonareo]
• 5Ary ny fatin’ny zanak’Isiraely hataoko eo anoloan’ny sampiny; Ary ny taolanareo dia haeliko eny manodidina ny alitaranareo eny.
• 6Any amin’ny fonenanareo rehetra dia ho lao ny tanàna, Ary ho rava ny fitoerana avo, mba ho rava sy lao koa ny alitaranareo, dia hotapatapahina sy hofoanana ny sampinareo, ary hokapaina ny tsangan-kazonareo* ho an’ny masoandro, Ka dia holevonina ny asanareo.[Na: tsangam-batonareo]
• 7Ary hisy faty hiampatrampatra eo aminareo; Ka dia ho fantatrareo fa Izaho no Jehovah.
• 8Nefa hamelako hisy sisa ihany ianareo, fa hisy ho afaka amin’ny sabatra any amin’ny jentilisa, Rehefa voaely ho any amin’ny tany samy hafa ianareo.
• 9Ary izay afaka aminareo dia hahatsiaro Ahy any amin’ny jentilisa izay hitondrana azy ho babo, rehefa voatorotoroko ny fony mijangajanga, izay efa niala tamiko, sy ny masony, izay mijangajanga manaraka ny sampiny, ary haharikoriko azy ny tenany noho ny ratsy izay efa nataony, dia ny fahavetavetany rehetra;
• 10Ka dia ho fantany fa Izaho no Jehovah, ary tsy foana ny nilazako fa hahatonga izany loza izany aminy Aho.
• 11Izao no lazain’i Jehovah Tompo: Mameleza amin’ny tananao ianao, ary mitotoa amin’ny tongotrao, ka manaova hoe: Indrisy! ny fahavetavetana ratsy rehetra ataon’ny taranak’Isiraely, izay ho lavon’ny sabatra sy ny mosary ary ny areti-mandringana!
• 12Ny lavitra ho fatin’ny areti-mandringana, ny akaiky ho lavon’ny sabatra, ary izay sisa sy izay voaro dia ho faty mosary; Ka dia hotanterahiko aminy ny fahatezerako.
• 13Dia ho fantatrareo fa Izaho no Jehovah, Rehefa miampatrampatra eny amin’ny sampy manodidina ny alitarany ny voavono ao aminy, eny amin’ny havoana andrandraina rehetra, eny amin’ny tendrombohitra rehetra sy eny ambanin’ny hazo maitso rehetra sy eny ambanin’ny terebinta misandrahaka rehetra, dia eny amin’izay efa nanaterany hanitra ankasitrahana tamin’ny sampiny rehetra;
• 14Hahinjitro aminy ny tanako, ary ny tany any amin’ny fonenany rehetra dia hataoko lao sy foana mihoatra noho ny efitr’i Dibla; Ka dia ho fantany fa Izaho no Jehovah.

Toko 7

• 1[Ny amin’ny handringanana ny Isiraely] Ary tonga tamiko ny tenin’i Jehovah nanao hoe:
• 2Ary ianao, ry zanak’olona, dia izao no lazain’i Jehovah Tompo amin’ny tanin’ny Isiraely: Injao ny farany! Eny, mby akaiky ny farany ho amin’ny vazan-tany efatra.
• 3Ankehitriny dia mby akaikinao ny farany, ary halefako aminao ny fahatezerako, dia hotsaraiko araka ny alehanao ianao, ka hatambesatro aminao ny fahavetavetanao rehetra.
• 4Ary tsy hiantra anao ny masoko, sady tsy hamindra fo Aho; Fa hatambesatro aminao ny lalanao, ary ny fahavetavetanao dia ho eo aminao, ary dia ho fantatrareo fa Izaho no Jehovah.
• 5Izao no lazain’i Jehovah Tompo: Injao! avy ny loza, dia loza izay tsy misy toa azy*![Heb. loza iray]
• 6Injao ny farany! Eny, mby akaiky ny farany; Mifoha hamely anao iny, indro, efa mby akaiky iny.
• 7Mby akaiky ny anjaranao, ry mponina amin’ny tany; Mby akaiky ny fotoana, efa antomotra ny andro, dia akoran’ady, fa tsy fihobiana, eny an-tendrombohitra .
• 8Ary vetivety foana dia hampidiniko aminao ny fahatezerako, Ary hotanterahiko aminao ny fahavinirako; ka hotsaraiko araka ny alehanao ianao, ary hatambesatro aminao ny fahavetavetanao.
• 9Ary tsy hiantra anao ny masoko, sady tsy hamindra fo Aho; Hatambesatro aminao ny lalanao, ary ny fahavetavetanao dia ho eo aminao, ka dia ho fantatrareo fa Izaho Jehovah no mamely.
• 10Indro ny andro, indro mby akaiky iny! Miseho ny anjaranao. Mamonjy ny tsorakazo, manorobona ny avonavona!
• 11Ny fanaovana an-keriny dia mitsangana ho tsorakazo hamelezana ny faharatsiana; tsy hisy sisa intsony aminy, na ny hamaroany, na ny hareny*, na ny zava-mendrika eo aminy.[Na: ny hamaroany mitabataba sy mireondreona]
• 12Mby akaiky ny fotoana, antomotra ny andro; aoka tsy hifaly ny mpividy, ary aoka halahelo ny mpivarotra; Fa iharan’ny fahatezerana mirehitra ny hamaroany rehetra.
• 13Fa ny mpivarotra tsy hifodian’izay efa lafony, na dia mbola isan’ny velona aza izy; Fa ny fahitana ny amin’ny hanjo ny hamaroanay dia tsy hitsoaka, ary tsy hisy ampahery ny ainy amin’ny helony.
• 14Efa nitsoka ny trompetra izy ka nahavonona ny zavatra rehetra, nefa tsy misy mankany amin’ny ady, satria iharan’ny fahatezerako mirehitra ny hamaroany rehetra.
• 15Ny sabatra no eny ivelany, ary ny areti-mandringana sy ny mosary kosa no ao anatiny; Izay any an-tsaha dia ho fatin-tsabatra, ary izay any an-tanàna kosa dia ho levon’ny mosary sy ny areti-mandringana.
• 16Ary na dia misy afa-mandositra aza, dia ho any an-tendrombohitra izy ka ho toy ny voromailala an-dohasaha: Izy rehetra dia samy hitoloko avokoa noho ny helony.
• 17Hiraviravy ny tanana rehetra, ary ho rano ny lohalika rehetra;
• 18Hisikina lamba fisaonana* koa izy, ka ho menatra ny tava rehetra.[Heb. lamba malailay]
• 19Ny volafotsiny dia harianay eny an-dalambe, ary ny volamenany hataony ho maharikoriko, ny volafotsiny sy ny volamenany tsy hahavonjy azy amin’ny andro fahatezeran’ny Jehovah Tsy hahavoky ny fanahiny na hahafeno ny kibony izany, fa tonga fahatafintohinana mahameloka azy.
• 20Fa ny firàvany tsara tarehy dia nataony ho rehareha sady nentiny nanao ireo sary fahavetavetany, dia ireo zava-dratsiny, koa izany no efa nanaovako ireny ho zava-maharikoriko azy.
• 21Ary hatolotro ho babo eny an-tànan’ny hafa firenena izy, Eny, ho babo ho an’ny ratsy fanahy amin’ny tany, ka holotoin’ireny izy.
• 22Dia hiamboho azy koa Aho, ka holotoiny ny rakitro; Fa hiditra ao aminy ny mpandroba ka handoto azy.
• 23Manefa gadra, fa efa feno fitsarana ny amin’ny fandatsahan-drà ny tany, ary feno fampahoriana ny tanàna.
• 24Ka dia hitondra izay jentilisa ratsy indrindra Aho, ary ho lasan’ireny ny tranony; dia hatsahatro ny avonavon’ny mahery, ary ho lotoina ny fitoerany masina.
• 25Ho avy ny fandringanana*; ary hitady fiadanana izy, fa tsy hisy.[Na: fampangovitana]
• 26Mifanontona ny fandravana, ary mifanindry ny filazan-doza; Dia manontany fahitana amin’ny mpaminany izy, fa tsy misy lalàna intsony amin’ny mpisorona, na fahendrena amin’ny anti-panahy.
• 27Hitomany ny mpanjaka, eny, hitafy fahatalanjonana ny andriana, ary hangovitra ny tanan’ny vahoaka; Araka ny alehany no hataoko aminy, ary hotsaroiko araka ny fitsarana nataony izy, ka dia fantany fa Izaho no Jehovah.

Toko 8

• 1[Fahitana ny amin’ny nanarahan’ny olona tany Jerosalema ny fomban-tsampy] Ary tamin’ny andro fahadimy tamin’ny volana fahenina tamin’ny taona fahenina, raha nipetraka tao an-tranoko aho, ary nipetraka teo anatrehako ny loholon’ny Joda, dia nilatsaka tamiko ny tànan’i Jehovah Tompo.
• 2Ary hitako fa, indro, nisy nitarehin’afo; hatramin’ny valahany no ho midina dia afo; ary hatramin’ny valahany no ho miakatra kosa dia nitarehin-java-mamirapiratra dia toy ny volon’ny metaly mamirapiratra.
• 3Ary nisy nitarehin-tanana nahinjiny, ka noraisiny tamin’ny voloko aho, dia nisy fanahy* nanainga ahy ho eny anelanelan’ny tany sy ny lanitra ka nitondra ahy ho any Jerosalema tamin’ny fahitana avy amin’Andriamanitra, ho eo amin’ny vavahadin’ny kianja anatiny, izay manatrika ny avaratra, dia ilay nisy ny sarin-javatra fampahasaro-piaro, dia ilay mampahasaro-piaro.[Na: rivotra]
• 4Ary, indro, teo ny voninahitr’Andriamanitry ny Isiraely tahaka ilay fahitana efa hitako teo amin’ny lohasaha.
• 5Dia hoy Izy tamiko: Ry zanak’olona, atopazy kely amin’ny lalana mianavaratra ny masonao. Dia natopiko tamin’ny lalana mianavaratra ny masoko ka, indro, eny avaratry ny vavahadin’ny alitara no nisy ilay sarin-javatra fampahasaro-piaro teo amin’ny fidirana.
• 6Dia hoy koa Izy tamiko: Ry zanak’olona, hitanao va izay ataon’ireo, dia ny fahavetavetana lehibe izay ataon’ny taranak’Isiraely eto ka mampanalavitra Ahy amin’ny fitoerako masina? Mbola hahita fahavetavetana lehibe koa ianao.
• 7Dia nentiny ho eo amin’ny vavahadin’ny kianja aho; ary hitako fa, indro, nisy loaka teo amin’ny ampiantany.
• 8Dia hoy Izy tamiko: Ry zanak’olona, loahy ny ampiantany; dia noloahako ny ampiantany ka, indro, nisy varavarana.
• 9Ary hoy Izy tamiko: Midira, ka jereo ny fahavetavetana lehibe ataony eto.
• 10Dia niditra aho ka nahita, ary indreo, nisy sarin’ny biby mandady sy mikisaka rehetra sy ny biby hafa, dia izay fahavetavetana, sy ny sampy rehetra an’ny taranak’Isiraely, voasoratra teo amin’ny rindrina manodidina.
• 11Ary nisy olona fito-polo lahy, isan’ny loholon’ny taranak’Isiraely, nitsangana teo anoloan’ireo, ary Jazania, zanak’i Safana, nitsangana teo afovoany, samy nitondra ny loviany fandoroana ditin-kazo manitra teny an-tànany avy, ary ny setroky ny ditin-kazo manitra dia nidonata.
• 12Ary hoy Izy tamiko: Ry zanak’olona efa hitanao va ny ataon’ny loholon’ny taranak’Isiraely amin’ny maizina, dia samy ao amin’ny efi-tranony misy sary*? Fa hoy izy: Jehovah tsy mahita anay; efa nahafoy ny tany Izy.[Na: tsara soratra]
• 13Ary hoy koa Izy tamiko: Mbola hahita fahavetavetana lehibe izay ataony koa ianao.
• 14Dia nentiny ho eo anoloan’ny vavahadin’ny tranon’i Jehovah, izay manatrika ny avaratra aho; ary, indreo, nisy vehivavy nipetraka teo, nitomany an’i Tamoza.
• 15Dia hoy Izy tamiko: Hitanao va izany ry zanak’olona? Mbola hahita fahavetavetana lehibe noho ireto koa ianao.
• 16Dia nentiny ho eo amin’ny kianja anatiny amin’ny tranon’i Jehovah aho, ary, indro, teo am-baravaran’ny tempolin’i Jehovah, dia teo anelanelan’ny lavarangana fidirana sy ny alitara, dia nisy tokony ho dimy amby roa-polo lahy niamboho ny tempolin’i Jehovah ka nanatrika ny atsinanana; ary ireo dia niankohoka manandrify ny masoandro, nanatrika ny atsinanana.
• 17Dia hoy Izy tamiko: Hitanao va izany, ry zanak’olona? Moa ataon’ny taranak’i Joda ho kely loatra va ny nanaovany ny fahavetavetana izay ataony eto, no fenoiny fampahoriana koa ny tany, ka mampahatezitra Ahy lalandava izy; ary indro izy nanainga ny rantsan-kazo ho amin’ny orony.
• 18Ary Izaho kosa dia hamely amin’ny fahatezerako; tsy hiantra ny masoko, sady tsy hamindra fo Aho; ary na dia mitaraina mafy eo an-tsofiko aza izy, dia tsy hihaino azy Aho.

Toko 9

• 1[Ny amin’ireo lehilahy nirahina hamely an’Jerosalema] Ary niantso tamin’ny feo mahery teo anatrehako Jehovah ka nanao hoe: Manakeke ianareo, ry mpiambina ny tanàna, ka samia mitondra ny fiadiany eny an-tànany avy ho enti-mandringana.
• 2Ary, indreo, nisy lehilahy enina avy tamin’ny lalana mankamin’ny vavahady ambony, izay manatrika ny avaratra, sady samy nitondra ny fiasany fanorotoroana teny an-tanany avy izy; ary ny anankiray tamin’ireo dia nitafy rongony fotsy, sady nisy fitoeran-dranomaintin’ny mpanoratra teo am-balahany; ary niditra izy ireo ka nitsangana teo anilan’ny alitara varahina.
• 3Ary ny voninahitr’Andriamanitry ny Isiraely efa niakatra niala teo amin’ny kerobima, izay nitoerany, ho eo amin’ny tokonam-baravaran’ny trano, ary Izy niantso ilay olona nitafy rongony, totsy izay nisy fitoeran-dranomaintin’ny mpanoratra teo am-balahany.
• 4Ary hoy Jehovah taminy: Mandehana mamaky ny tanàna, dia Jerosalema, ka asio marika* ny handrin’ny olona izay misento sy mitaraina noho ny fahavetavetana rehetra atao eo aminy.[Heb. marika mitanam-bokovoko]
• 5Ary reko Izy nanao tamin’ny sasany hoe: Mandehana manaraka azy ianareo hamaky ny tanàna, ka mameleza; aoka tsy hamindra fo aminy ny masonareo, ary aza ananana antra izy,
• 6Fa na lahy antitra, na zatovo, na virijina, na zaza madinika, na vehivavy, dia aringano avokoa; fa izay olona misy ilay marika ihany no aza kasihina ary atombohy hatreo amin’ny fitoerako masina izany. Dia nanomboka tamin’ny lahy antitra izay teo anoloan’ny trano ireo.
• 7Ary hoy Izy taminy: Lotoy ny trano, ary fenoy faty ny kianja; dia mivoaha ianareo. Ary dia nivoaka izy ka namely ny tao an-tanàna.
• 8Ary raha mbola namely izy, ary izaho ihany no sisa teo, dia niankohoka aho ka nitaraina hoe: Indrisy! Jehovah Tompo ô! haringanao va ny sisa rehetra amin’ny Isiraely amin’izao ampidinanao ny fahatezeranao amin’i Jerosalema izao?
• 9Dia hoy Izy tamiko: Lehibe dia lehibe ny heloky ny taranak’ny Isiraely sy ny Joda, ary feno ran’olona nalatsaka ny tany, sady feno fitsarana miangatra ny tanàna, satria hoy izy: Jehovah efa nahafoy ny tany ary Jehovah tsy mahita.
• 10Ary Izaho kosa, dia tsy hiantra ny masoko, sady tsy hamindra fo aho, fa hatsingeriko ho eo an-dohany ny nataony*.[Heb. lalany]
• 11Ary, indro, ralehilahy, ilay nitafy rongony fotsy sady nisy fitoeran-dranomainty teo am-balahany, dia nitondra teny niverina nanao hoe: Efa vitako izay nandidianao ahy.

Toko 10

• 1[Fahitana ny amin’ny handoroana an’i Jerosalema, sy ny hialan’ny voninahitr’i Jehovah aminy] Ary hitako fa, indro, teo ambonin’ny eloelo izay teo ambonin’ny lohan’ny kerobima dia nisy tahaka ny vato safira; tahaka ny endriky ny seza fiandrianana no fijery azy; ary Jehovah* niseho teo amboniny. [Heb. Izy]
• 2Ary niteny tamin-dralehilahy nitafy rongony fotsy Izy nanao hoe: Midira eo anelanelan’ny kodia, dia eo ambanin’ny kerobima, ary fenoy vain’afo avy eo anelanelan’ny kerobima ny tananao roa, ka afafazo amin’ny tanàna izany. Dia niditra teo imasoko izy.
• 3Ary ny kerobima nitsangana teo amin’ny ankavanan’ny trano, raha niditra ralehilahy; ary feno ilay rahona ny kianja anatiny.
• 4Dia niakatra niala teo amin’ny kerobima ny voninahitr’i Jehovah ho eo amin’ny tokonam-baravaran’ny trano; ary feno ilay rahona ny trano, ary ny kianja dia feno ny famirapiratan’ny voninahitr’i Jehovah.
• 5Ary ny fikopakopaky ny elatry ny kerobima dia re hatrany amin’ny kianja ivelany, toy ny feon’Andriamanitra Tsitoha, raha miteny.
• 6Ary rehefa nodidiany ralehilahy nitafy rongony fotsy, nataony hoe: Manalà afo avy eo analenelan’ny kodia, eo anelanelan’ny kerobima, dia niditra izy ka nitsangana teo anilan’ny kodia.
• 7Ary ny kerobima anankiray naninjitra ny tànany avy teo anelanelan’ny kerobima, tamin’ny afo Izay teo anelanelan’ny kerobima, dia nangalany ka nataony teny amin’ny tànan-droan’ilay nitafy rongony fotsy; ary rehefa nandray izany ralehilahy, dia nivoaka.
• 8Ary nisy nitarehin-tànan’olona niseho teo ambanin’ny elatry ny kerobima.
• 9Ary hitako fa, indreo, nisy kodia efatra teo anilan’ny kerobima, dia kodia iray avy teo anilan’ny isan-kerobima; ary ny tarehin’ny kodia dia toy ny volon’ny vato krysolita.
• 10Ary izy efatra dia nitovy tarehy, toy ny kodia anatin’ny kodia.
• 11Raha nandeha izy, dia nandeha tamin’ny hitsin’ny lafiny efatra; tsy niherika izy raha nandeha, fa tamin’ny hitsin’izay natrehin’ny lohany ihany no nalehany; tsy niherika izy raha nandeha.
• 12Ary feno maso manodidina ny tenany* rehetra sy ny lamosiny sy ny tànany sy ny elany mbamin’ny kodia; izy efatra dia samy nisy kodia avokoa.[Heb. nofony]
• 13Ny amin’ny kodia dia reko nisy niantso azy hoe: Ry kodia*![Na: Mikodiadiava!]
• 14Ary samy nanana tarehy efatra avy izy: ny tarehin’ny voalohany dia nitarehin-kerobima, ary ny tarehin’ny faharoa dia nitarehin’olona, ary ny fahatelo nitarehin-diona, ary ny fahefatra nitarehim-boromahery.
• 15Ary niakatra ny kerobima. Izany dia ilay zava-manan’aina hitako teo amoron’ny ony Kebara ihany.
• 16Ary raha nandeha ny kerobima, dia mba nandeha teo anilany koa ny kodia; ary raha nasandratry ny kerobima ny elany hiainga tsy hipaka amin’ny tany, dia tsy nisaraka taminy koa ny kodia.
• 17Raha nijanona izy, dia mba nijanona koa ireo, ary raha niainga izy, dia mba niainga koa ireo: fa ny fanahin’ny zava-manan’aina no tao aminy.
• 18Dia niala avy teo ambonin’ny tokonambaravaran’ny trano ny voninahitr’i Jehovah ka nijanona teo ambonin’ny kerobima.
• 19Ary nasandratry ny kerobima ny elany, ka niainga tsy nipaka tamin’ny tany teo imasoko izy, raha nivoaka, ary teo anilany ny kodia ary samy nijanona teo anoloan’ny vavahady atsinanana amin’ny tranon’i Jehovah izy ireo; ary ny voninahitr’Andriamanitry ny Isiraely no teo amboniny.
• 20Izany dia ilay zava-manan’aina hitako teo ambanin’Andriamanitry ny Isiraely teo amoron’ny ony Kebara; ary fantatro fa kerobima ireo.
• 21Samy nanana tarehy efatra avy izy, sady samy nanana elatra efatra avy koa; ary nisy nitarehin-tànan’olona teo ambanin’ny elany.
• 22Ary ny endriky ny tarehiny dia nitovy tamin’ilay efa hitako teo amoron’ny ony Kebara ihany, dia ny endriny sy ny tenany; ary ny hitsin’ny tavany no nalehany.

Toko 11

• 1[Filazana ny amin’ny loza hanjo, sy fampanantenana ny famindram-po] Ary nisy fanahy* nanainga ahy koa, dia nitondra ahy ho eo amin’ny vavahady atsinanana amin’ny tranon’i Jehovah, dia ilay manatrika ny atsinanana; ary, indreo, nisy olona dimy amby roa-polo lahy teo anoloan’ny vavahady; dia hitako teo amin’ireo Jazania, zanak’i Azora, sy Pelatia, zanak’i Benaia, lehiben’ny vahoaka.[Na: rivotra]
• 2Dia hoy Izy tamiko: Ry zanak’olona, ireo no lehilahy izay mamoron-tsain-dratsy sady manolo-tsain-dratsy eto amin’ity tanàna ity,
• 3dia izay manao hoe: Mbola lavitra ny hanaovana trano; ity tanàna ity no vilany, ary isika no hena;
• 4ka dia maminania hamely azy, eny, maminania, ry zanak’olona.
• 5Ary tonga tao amiko ny Fanahin’i Jehovah, ka hoy Izy tamiko: Lazao hoe: Izao no lazain’i Jehovah: Izany no fiteninareo, ry taranak’Isiraely, ary fantatro izay rehetra ao an-tsainareo.
• 6Hianareo efa nahamaro ny voavononareo teto amin’ity tanàna ity, ary ny lalambeny efa nofenoinareo faty.
• 7Koa izao no lazain’i Jehovah Tompo: Ny voavononareo, izay nataonareo tao aminy, no hena, ary ity tanàna ity no vilany; nefa havoaka avy ao aminy ianareo.
• 8Natahotra ny sabatra ianareo; nefa hataoko mahatratra anareo ihany ny sabatra, hoy Jehovah Tompo.
• 9Ary havoakako avy ato aminy ianareo ka hatolotro ho eny an-tànan’ny hafa firenena, ary hanao fitsarana aminareo Aho.
• 10Ho lavon’ny sabatra ianareo; any amin’ny sisin-tanin’ny Isiraely no hitsarako anareo, ka dia ho fantatrareo fa Izaho no Jehovah.
• 11Ity tanàna ity tsy ho vilaninareo, ary ianareo tsy ho hena ato anatiny; fa any amin’ny sisin-tanin’ny Isiraely no hitsarako anareo
• 12ka dia ho fantatrareo fa Izaho no Jehovah, satria tsy nandeha araka ny lalàko ianareo na nanaraka ny fitsipiko, fa araka ny fitsipiky ny jentilisa izay manodidina anareo ihany no nataonareo.
• 13Ary raha mbola naminany aho, dia maty Pelatia, zanak’i Benaia. Dia niankohoka aho ka nitaraina tamin’ny feo mahery nanao hoe: Indrisy! Jehovah Tompo ô, holevoninao va ny hany sisa amin’ny Isiraely?
• 14Ary tonga tamiko ny tenin’i Jehovah nanao hoe:
• 15Ry zanak’olona, ny rahalahinao, eny, ny rahalahinao no andraikitrao*, dia ny taranak’Isiraely rehetra, izay nitenenan’ny mponina any Jerosalema hoe: Manalavira an’i Jehovah; izahay no nomena ity tany ity ho lova.[Na: iray firazanana aminao]
• 16Koa lazao hoe: Izao no lazain’i Jehovah Tompo: Na dia nampandehaniko lavitra any amin’ny jentilisa aza izy ka naeliko tany amin’ny tany maro, dia ho fitoerana masina ho azy vetivety* Aho any amin’ny tany izay alehany.[Na: kely ho azy]
• 17Koa lazao hoe: Izao no lazain’i Jehovah Tompo: Hovoriko avy any amin’ny firenena ianareo, ary hangoniko avy any amin’ny tany izay nampielezana anareo, ka homeko ny tanin’ny Isiraely ianareo.
• 18Ary ho tonga ao izy ka hanaisotra ny zava-dratsiny rehetra sy ny fahavetavetany rehetra.
• 19Dia homeko fo iray izy, ary hasiako fanahy vaovao ao anatinareo; ary hesoriko amin’ny nofony ny fo vato, ka homeko fo nofo izy,
• 20mba handehanany araka ny didiko sy hitandremany ny fitsipiko ka hanarahany izany, ary izy dia ho oloko, ary Izaho ho Andriamaniny.
• 21Fa ny amin’izay manana fo manina ny zava-dratsiny* sy ny fahavetavetany, dia hatsingeriko ho eo an-dohany ihany ny nataony**, hoy Jehovah Tompo.[*Heb. manaraka ny fon’ny zava-dratsiny][Heb. lalana]
• 22Dia nasandratry ny kerobima ny elany sy ny kodia teo anilany; ary ny voninahitr’Andriamanitry ny Isiraely no teo amboniny.
• 23Ary ny voninahitr’i Jehovah niakatra niala tao amin’ny tanàna ka nijanona teo an-tampon’ny tendrombohitra atsinanan’ny tanàna.
• 24Dia nisy fanahy* nanainga ahy tamin’ny fahitana, dia tamin’ny Fanahin’Andriamanitra, ka nitondra ahy ho any Kaldea ho any amin’ny babo. Dia niakatra niala tamiko ny fahitana izay efa hitako.[Na: rivotra]
• 25Ary nolazaiko tamin’ny babo ny teny rehetra izay nasehon’i Jehovah ahy.

Toko 12

• 1[Ny nasain’Andriamanitra nataon’i Ezekiela hahalalan’ny Isiraely fa samy ho lasan-ko babo, na ny mpanjaka, na ny vahoaka] Ary tonga tamiko ny tenin’i Jehovah nanao hoe:
• 2Ry zanak’olona, ianao monina eto amin’ny taranaka maditra, izay mana-maso hahitana, nefa tsy mahita, ary manan-tsofina handrenesana, nefa tsy mandre fa taranaka maditra izy.
• 3Koa ianao, ry zanak’olona, mifeheza entana handeha hifindra ho any amin’ny fahababoana, ka miaingà antoandro eo imasony; ary mialà eo imasony eo amin’izay itoeranao ho any amin’ny fitoerana hafa; angamba mba ho fantany fa taranaka maditra izy.
• 4Dia havoakanao antoandro eo imasony ny entanao, toy ny entan’ny olona handeha ho any amin’ny fahababoana; fa ny tenanao kosa dia hivoaka hariva eo imasony toy ny fivoaky ny handeha ho any amin’ny fahababoana.
• 5Boroboahy eo imasony ny manda, ka ao no amoahy ny entanao.
• 6Ataovy an-tsoroka eo imasony no fitondranao azy, ka ento mivoaka, rehefa maizina dia maizina ny andro; sarony ny tavanao mba tsy hahitanao ny tany; fa efa nataoko ho famantarana mahagaga ho an’ny taranak’Isiraely ianao.
• 7Dia nanao araka izay efa nandidiana ahy aho, ka nentiko nivoaka antoandro ny entako, toy py entan’ny olona handeha ho any amin’ny fahababoana, ary nony hariva dia noboroboahako tamin’ny tanako ny manda, ka nony efa maizina dia maizina ny andro, dia nentiko nivoaka izany ka teny an-tsoroka no nitondrako azy teo imasony.
• 8Ary nony maraina dia tonga tamiko ny tenin’i Jehovah nanao hoe:
• 9Ry zanak’olona, moa ny taranak’Isiraely, izay taranaka maditra, tsy manontany aminao hoe va: Inona izao ataonao izao?
• 10Ambarao aminy hoe: Izao no lazain’i Jehovah Tompo: Ity faminaniana ny loza ity dia ho amin’ny mpanjakan’i Jerosalema sy ny taranak’Isiraely rehetra izay ao aminy.
• 11Lazao hoe: Izaho dia famantarana mahagaga ho anareo, koa tahaka izay ataoko no hatao amin’ireo; hifindra sy ho lasan-ko babo izy.
• 12Ary ny mpanjaka, izay ao aminy dia hitondra ny entany eny an-tsorony nony efa maizina dia maizina ny andro ka hivoaka; hoboroboahan’ny olona ny manda hamoahana azy; hanarona ny tavany izy mba tsy ho hitan’ny masony ny tany.
• 13Ary ny fandrika haratoko dia hovelariko aminy, ka ho voan’ny fandrika izy; dia ho entiko any Babylona any amin’ny tanin’ny Kaldeana izy, ary tsy hahita izany, nefa ho faty any ihany.
• 14Ary izay rehetra manodidina azy, dia ny mpanampy azy sy ny miaramilany rehetra, haeliko ho amin’ny rivotra rehetra, sady hanatsoaka sabatra ho enti-manenjika azy Aho.
• 15Ary dia ho fantany fa Izaho no Jehovah, raha ahahako any amin’ny jentilisa sy ampieleziko any amin’ny tany samy hafa izy.
• 16Nefa hamelako olom-bitsy ihany izy ho sisa tsy ho ringan’ny sabatra.sy ny mosary sy ny areti- mandringana, mba hisy hitantara ny fahavetavetany rehetra any amin’ny jentilisa izay alehany; ka dia ho fantany fa Izaho no Jehovah.
• 17Tonga tamiko ny tenin’i Jehovah nanao hoe:
• 18Ry zanak’olona, hano amin-korohoro ny haninao, ary sotroy amin-kovitra sy amin’ahiahy ny ranonao.
• 19Ary lazao amin’ny vahoaka hoe Izao no lazain’i Jehovah Tompo ny amin’ny mponina ao Jerosalema, ao amin’ny tanin’ny Isiraely: Amin’ahiahy no hihinanany ny haniny, ary amim-pahatalanjonana no hisotroany ny ranony, mba ho foana mihitsy ny tany, ka tsy hisy na inona na inona ao, noho ny fandozan’izay rehetra monina ao aminy.
• 20Dia ho rava ny tanàna onenana, ary ho lao ny tany; ka dia ho fantatrareo fa Izaho no Jehovah.
• 21Ary tonga tamiko ny tenin’i Jehovah nanao hoe:
• 22Ry zanak’olona, ahoana moa, izao fitenenana ataonareo ao amin’ny tanin’ny Isiraely izao hoe: Mihaela ny andro, ary tonga tsinontsinona ny fahitana rehetra?
• 23Koa lazao aminy hoe: Izao no lazain’i Jehovah Tompo: Hatsahatro izany fitenenana izany ka tsy hatao fiteny ao amin’ny Isiraely intsony; fa lazao aminy kosa hoe: Akaiky ny andro sy ny tenin’ny fahitana rehetra.
• 24Fa tsy hisy fahitana foana intsony na faminaniana mandrobo ao amin’ny taranak’Isiraely.
• 25Fa Izaho no Jehovah; hiteny Aho, ary ny teny lazaiko dia ho tò tokoa; tsy hajanona ela intsony izany; fa ho amin’ny andronareo, ry taranaka maditra, no hilazako ny teny sy hanatanterahako azy, hoy Jehovah Tompo.
• 26Ary tonga tamiko ny tenin’i Jehovah nanao hoe:
• 27Ry zanak’olona, indro, ny taranak’Isiraely manao hoe: Mbola ho ela izany fahitana hitany izany, ary ny amin’ny fotoana mbola lavitra no vinaniny.
• 28Koa lazao aminy hoe: Izao no lazain’i Jehovah Tompo: Tsy hisy hajanona ela intsony ny teniko; fa ny teny izay lazaiko dia hotanterahiko, hoy Jehovah Tompo.

Toko 13

• 1[Ny amin’ireo mpaminany sandoka] Ary tonga tamiko ny tenin’i Jehovah nanao hoe:
• 2Ry zanak’olona, maminania ny hamelezana ny mpaminanin’ny Isiraely izay maminany, ka lazao amin’izay maminany araka ny fony hoe: Mihainoa ny tenin’i Jehovah ianareo.
• 3Izao no lazain’i Jehovah Tompo: Lozan’ny mpaminany adala, izay manaraka ny fanahiny sy ny zavatra tsy hitany.
• 4Tahaka ny amboahaolo any an-tanàna haolo ny mpaminaninao, ry Isiraely.
• 5Tsy niakatra ho eo amin’ny banga ianareo, sady tsy nanao manda hiarovana ny taranak’Isiraely mba hifaharany amin’ny ady amin’ny andron’i Jehovah.
• 6Mahita zava-poana sy faminaniana lainga ireo izay manao hoe: Hoy Jehovah, nefa tsy nirahin’i Jehovah izy tsinona, hahazoany manantena ny hahatòvan’ny teny
• 7Moa tsy fahitana tsy izy no hitanareo, ary faminaniana lainga no lazainareo, raha hoy ianareo: Jehovah no nilaza izany; kanefa tsy nilaza izany Aho tsinona ?
• 8Koa izao no lazain’i Jehovah Tompo: Noho ny nilazanareo anoano foana sy ny nahitanareo lainga, dia, indro, hamely anareo Aho, hoy Jehovah Tompo.
• 9Ary ny tanako no hamely ny mpaminany izay mahita anoano foana sy maminany lainga; tsy ho isan’ny mpanolo-tsainan’ny oloko na ho voasoratra amin’ny bokin’ny taranak’Isiraely izy sady tsy hiditra ao amin’ny tanin’ny Isiraely; ka dia ho fantatrareo fa Izaho no Jehovah Tompo.
• 10Noho ny nampiviliany ny oloko tamin’ny nanaovany hoe: Fiadanana, kanjo tsy nisy fiadanana tsinona; ary raha manao ampiantany ny oloko, dia, indreo, izy no mandalotra azy amin’ny feta tsy madity,
• 11koa lazao amin’izay mandalotra azy amin’ny feta tsy madity fa hirodana izy; hisy ranonorana mifafy; eny, milatsaha ianareo, ry havandra vaventy; ary mifofofofoa ianareo, ry tafiodrivotra.
• 12Indro, raha mirodana ny ampiantany, tsy holazaina aminareo hoe va: Aiza ny lalotra izay nandaloranareo azy?
• 13Koa izao no lazain’i Jehovah Tompo: Hampifofofofo ny tafio-drivotra amin’ny fahatezerako Aho; ary hisy ranonorana mifafy amin’ny fahatezerako sy havandra vaventy amin’ny fahavinirako hahafongana azy.
• 14Dia harodako ny ampiantany izay nolalorinareo tamin’ny feta tsy madity, ka ho fongotra hatramin’ny tany izy, ary hiseho ny fanambaniny; eny, hirodana izy, ka haringana ao anatiny ianareo; ka dia ho fantatrareo fa Izaho no Jehovah.
• 15Dia hotanterahiko amin’ny ampiantany sy izay mandalotra azy amin’ny feta tsy madity ny fahatezerako, ary holazaiko aminareo hoe: Tsy misy intsony ny manda sy izay mpandalotra azy,
• 16dia ny mpaminanin’ny Isiraely izay maminany ny amin’i Jerosalema sy izay mahita fahitana fiadanana ho azy, kanjo tsy misy fiadanarla tsinona, hoy Jehovah Tompo.
• 17Koa ianao, ry zanak’olona, handrino mafy ny zanakavavin’ny firenenao, izay manao faminaniana araka ny fony, ary maminania ny hamelezana azy,
• 18ka ataovy hoe: Izao no lazain’i Jehovah Tompo: Lozan’ny vehivavy rehetra izay manjaitra fono ho ao amin’ny famavanin’ny tanana* rehetra, ary manao fisaronana antonona amin’ny loha samy hafa rehetra mba hihaza fanahy! Ny fanahin’ny oloko dia hazainareo, nefa ny fanahinareo kosa velominareo![Na: tanako]
• 19Ary manamavo Ahy ao amin’ny oloko ianareo noho ny vary hordea eran-tànan-ila sy ny sombi-mofo, mba hahafaty ny fanahy izay tsy tokony ho faty ary hahavelona ny fanahy izay tsy tokony hovelomina, amin’ny andainganareo amin’ny oloko izay mihaino ny lainganareo.
• 20Koa izao no lazain’i Jehovah Tompo: Indro, hosimbako ny fononareo, izay entinareo hihaza ny fanahy any, mba hahafahan’ireny hanidina, eny, hotriariko hiala amin’ny sandrinareo izy, ka halefako hanidina ny fanahy izay nohazainareo.
• 21Hotriariko koa ny fisaronanareo, ka hovonjeko ho afaka amin’ny tananareo ny oloko, dia tsy ho azon’ny tananareo ho haza intsony izy; ka dia ho fantatrareo fa Izaho no Jehovah.
• 22Satria lainga no entinareo mampalahelo ny fon’ny marina, izay tsy nampalaheloviko, sady entinareo manatanjaka ny tanan’ny ratsy fanahy, tsy hialany amin’ny lalan-dratsiny mba hamelomana azy,
• 23dia tsy hahita anoano foana na hanao faminaniana intsony ianareo; fa hovonjeko ho afaka amin’ny tananareo ny oloko; ka dia ho fantatrareo fa Izaho no Jehovah.

Toko 14

• 1[Anatra ho an’ny mpanompo sampy, sy filazana ny hanjo azy] Dia nisy loholon’ny Isiraely tonga tao amiko ka nipetraka teo anoloako.
• 2Ary tonga tamiko ny tenin’i Jehovah nanao hoe:
• 3Ry zanak’olona, ireto olona ireto efa nampiorina ny sampiny ao am-pony, ary ny fahatafintohinana mahameloka azy dia apetrany eo anoloany. Moa hety hanontanian’ireto va Aho?
• 4Koa mitenena aminy hoe: Izao no lazain’i Jehovah Tompo: Ny amin’ny olona rehetra amin’ny taranak’Isiraely izay mampiorina ny sampiny ao am-pony ary mametraka ny fahatafintohinana mahameloka azy eo anoloany ary manatona ny mpaminany, Izaho Jehovah no hamaly azy araka ny habetsaky ny sampiny,
• 5mba hisamborako ny taranak’Isiraely amin’ny fony, satria efa nihemotra niala tamiko izy rehetra noho ny sampiny.
• 6Koa ataovy amin’ny taranak’Isiraely hoe: Izao no lazain’i Jehovah Tompo: Mibebaha, dia miambohoa ny sampinareo sy ny fahavetavetanareo rehetra; eny, miambohoa ireny.
• 7Fa na iza na iza amin’ny taranak’Isiraely, na amin’ny vahiny izay mivahiny eo amin’ny Isiraely, no misaraka amiko ka mampiorina ny sampiny ao am-pony ary mametraka ny fahatafintohinana mahameloka azy eo anoloany sady manatona ny mpaminany hanontany amiko, dia Izaho Jehovah ihany no hamaly azy araka izay toetro;
• 8ary hanandrina izany olona izany ny tavako, ka hataoko mahita loza izy mba ho famantarana sy ho ohabolana, ary hofongorako tsy ho eo amin’ny oloko izy; ka dia ho fantatrareo fa Izaho no Jehovah.
• 9Ary raha misy voataona ny mpaminany ka milaza zavatra, dia Izaho Jehovah no nitaona izany mpaminany izany; ary hahinjitro aminy ny tanako, ka hofongorako tsy ho eo amin’ny Isiraely oloko izy.
• 10Ary hitondra ny heloky ny tenany izy; ny heloky ny mpaminany dia hitovy amin’ny helok’izay manontany aminy koa,
• 11mba tsy hialan’ny taranak’Isiraely amiko intsony, ary tsy handotoany ny tenany intsony amin’ny fahadisoany rehetra; fa ho oloko izy, ary Izaho ho Andriamaniny, hoy Jehovah Tompo.
• 12Ary tonga tamiko indray ny tenin’i Jehovah nanao hoe:
• 13Ry zanak’olona, raha misy tany manota amiko ka manao izay mahadiso, ary ahinjitro aminy ny tanako, ka tapahiko ny mofo, tohan’ainy, sady andefasako mosary, ary aringako avokoa ny olona sy ny biby,
• 14na dia ao aza ireto telo lahy ireto, dia Noa sy Daniela ary Joba, dia ny tenany ihany no ho voavonjiny noho ny fahamarinany, hoy Jehovah Tompo.
• 15Raha mampandeha biby masiaka eo amin’ny tany Aho, ka mandringana ny zana-bahoaka ireny, ary lao ny tany ka tsy azon’olona aleha noho ny biby,
• 16na dia ao aza ireo telo lahy ireo, raha velona koa Aho, hoy Jehovah Tompo, tsy hahavonjy ny zananilahy na ny zananivavy izy; fa ny tenany ihany no ho voavonjy, fa ny tany kosa ho lao.
• 17Ary raha mitondra sabatra mamely izany tany izany Aho ka manao hoe: Aoka hotetezin-tsabatra ny tany, ka hofongorako izy, na ny olona na ny biby,
• 18na dia ao aza ireo telo lahy ireo, raha velona koa Aho, hoy Jehovah Tompo, dia tsy hahavonjy ny zananilahy na ny zananivavy ireo; fa ny tenany ihany no ho voavonjy.
• 19Ary raha mandefa ared-mandringana mamely izany tany izany Aho, sady aidiko aminy ny fahatezerako, dia amin’ny fandatsahan-drà mba haharingana ny olona sy ny biby ao aminy,
• 20na dia ao aza Noa sy Daniela ary Joba, raha velona koa Aho, hoy Jehovah Tompo, dia tsy hahavonjy ny zananilahy na ny zananivavy ireo, fa ny tenany ihany no ho voavonjiny noho ny fahamarinany.
• 21Fa izao no lazain’i Jehovah Tompo: Koa mainka raha alefako hamely an’i Jerosalema izao fitsarako efatra mandoza izao, dia ny sabatra sy ny mosary sy ny biby masiaka ary ny areti-mandringana, mba hahafongotra azy, na olona na biby!
• 22Kanefa, indro, hisy sisa afaka ihany izy ho entina mivoaka, dia ny zanakalahy sy ny zanakavavy; indro, hivoaka ho any aminareo ireo, ka ho hitanareo ny alehany sy ny ataony, dia hionona ianareo noho ny amin’ny loza rehetra izay nataoko mihatra amin’i Jerosalema, dia izay rehetra nataoko mihatra aminy.
• 23Eny, hampionona anareo ireo, rehefa hitanareo ny alehany sy ny ataony; ka dia ho fantatrareo fa tsy nataotaoko foana izay rehetra nataoko taminy, hoy Jehovah Tompo.

Toko 15

• 1[Fanoharana mampiseho ny toetr’i Jerosalema] Ary tonga tamiko ny tenin’i Jehovah nanao hoe:
• 2Ry zanak’olona, inona no ihoaran’ny tahom-boaloboka noho ny hazo rehetra, dia ny sakeli-boaloboka izay isan’ny hazo any an’ala?
• 3Moa mba fangalan-kazo hatao zavatra akory va izy, na mba fangalana fihantonan-javatra?
• 4Indro, hatsipy any anaty afo hataina izy; ny laniny roa ho levon’ny afo, ary ny tenatenany ho may. Ka moa azo atao zavatra akory va izy?
• 5Indro, fony izy tsy mbola nahafahana aza, dia tsy azo natao zavatra, koa mainka fa rehefa levon’ny afo sy may izy?
• 6Koa izao no lazain’i Jehovah Tompo: Toy ny tahom-boaloboka amin’ny hazo any an’ala, izay natolotro hataina, dia toy izany no hanolorako ny mponina any Jerosalema.
• 7Ary hanandrina azy ny tavako; hiala avy amin’ny afo izy nefa ho levon’ny afo hafa indray; ka dia ho fantatrareo fa Izaho no Jehovah, raha manandrina azy ny tavako.
• 8Ary hataoko lao ny tany noho ny nivadihany tamiko, hoy Jehovah Tompo.

Toko 16

• 1[Ny nivadihan’i Jerosalema, sy ny nahafoizany an’i Jehovah, ary ny hamaliany azy amin’izany] Tonga tamiko indray ny tenin’i Jehovah nanao hoe:
• 2Ry zanak’olona, ampahafantaro an’i Jerosalema ny fahavetavetany,
• 3ka ataovy hoe: Izao no lazain’i Jehovah Tompo amin’i Jerosalema: Ny tany Kanana no nahaterahanao sy nahabe anao; Amorita no rainao, ary Hetita no reninao.
• 4Ary ny amin’ny nahaterahanao, dia tsy voatapaka akory ny tadim-poitrao tamin’ny andro nahaterahanao, ary tsy voampandro tamin’ny rano ianao, na voahosotra sira, na voahodidina lamban-jaza akory.
• 5Tsy nisy maso niantra anao hanao izany aminao, na dia iray akory amin’ireo zavatra ireo aza, mba hamindra fo aminao; fa nariana tany an-tsaha ianao, satria natao ho zava-maharikoriko ianao tamin’ny andro nahaterahanao.
• 6Ary raha nandalo Aho ka nahita anao nihosinkosina teo amin’ny rànao, dia hoy Izaho taminao, raha mbola tamin’ny rànao ianao: Ho velona anie ianao; eny, hoy Izaho taminao, raha mbola tamin’ny rànao ianao: Ho velona anie ianao.
• 7Efa nataoko alinalina, toy ny zava-maniry any an-tsaha, ny isanao, ka nitombo sy nihalehibe ary tonga tsara tarehy tokoa ianao; naniry nono ianao sady naniry volo, nefa mbola nitanjaka sy nihanjahanja ihany
• 8Ary raha nandalo Aho ka nijery anao, dia hitako fa izay no fotoanao, dia ny fotoam-pitiavana: ary narakotro anao ny lambako, ka nosaronako ny fitanjahanao; eny, nianiana taminao Aho ka nanao fanekena taminao, hoy Jehovah Tompo, ka dia efa Ahy ianao.
• 9Dia nampandroiko rano ianao, eny, nosasako tsara ho afaka tamin’ny rànao, dia nohosorako diloilo.
• 10Notafiako lamba misoratsoratra koa ianao sy nokiraroako hoditakasy*, ary nampisikiniko rongony fotsy madinika sy notafiako amparasily.[Hoditra voasoka ho menamena. na hodi-biby tsy fantatra]
• 11Noravahako firavaka koa ianao, ka nasiako haba ny tananao ary rojo ny vozonao
• 12Ary nasiako kavina ny oronao sy ny sofinao ary satro-boninahitra tsara tarehy ny lohanao,
• 13ka dia niravaka volamena sy volafotsy ianao, ary rongony fotsy madinika sy amparasily ary lamba misoratsoratra ny fitafianao; koba tsara toto sy tantely ary diloilo no fihinanao; ary efa nihatsara tarehy dia nihatsara tarehy ianao sady nambinina ho miendrik’andriana
• 14Ary dia niely tany amin’ny jentilisa aza ny lazanao noho ny hatsaran-tarehinao; fa tanteraka izany noho ny voninahitro izay nataoko taminao, hoy Jehovah Tompo.
• 15kanjo natoky ny hatsaran-tarehinao ianao ka nijangajanga noho ny lazanao* sady nanaram-po nijangajanga tamin’ny mpandalo rehetra, ka nafoy ho azy izany[Heb, anarana]
• 16Ary nangalanao ny fitafianao, dia nanaovanao fitoerana avo ho anao ka noravahanao sora-damba, ka nijangajanga teo aminy ianao; dia zavatra izay tsy tokony hiseho na hisy akory.
• 17Ary nalainao koa ny firavakao tamin’ny volamenako sy ny volafotsiko, izay nomeko anao, dia nataonao sarin-dehilahy ho anao ka nijangajanganao;
• 18nalainao koa ny fitafianao misoratsoratra ka natatinao ireo; ary ny diloiloko sy ny ditin-kazo manitro dia napetrakao teo anoloany
• 19Ary ny haniko izay nomeko anao koa, dia ny koba tsara toto sy ny diloilo ary ny tantely, izay nafahako anao, dia napetrakao teo anoloan’ireo ho hanitra ankasitrahana; teo tokoa izany, hoy Jehovah Tompo.
• 20Ary nentinao ny zanakao-lahy sy ny zanakao-vavy, izay naterakao ho Ahy, dia novonoinao ho fanatitra ho an’ireo mba hohanina. Moa zavatra kely va izany fijangajanganao izany?
• 21Ary novonoinao ny zanakao, fa natolotrao ka nampandehaninao namaky ny afo ho an’ireo.
• 22Ary tamin’ny fahavetavetanao sy ny fijangajanganao rehetra dia tsy nahatsiaro ny andro fahakelezanao ianao, fony ianao nitanjaka sy nihanjahanja sady nihosinkosina teo amin’ny rànao.
• 23Ary rehefa vitanao izany faharatsianao rehetra izany (lozanao! lozanao! hoy Jehovah Tompo),
• 24dia nanao trano fijangajangana ho anao ianao sady nanao fitoerana avo ho anao teny an-kalalahana rehetra teny.
• 25Ary teny an-tsampanan-dalana rehetra no nanaovanao ny fitoerana avonao, ary novetavetainao ny hatsaran-tarehinao, ka nabahanao ho amin’ny mpandalo rehetra ny tongotrao, ary nampitomboinao ny fijangajanganao.
• 26Hianao efa nijangajanga tamin’ny zanak’i Egypta be nofo izay mifanila fonenana aminao; ary nampitomboinao ny fijangajanganao ka nampahatezitra Ahy.
• 27Ary, indro, nahinjitro taminao ny tanako. ka nahenako ny anjara-haninao, ary natolotro ho amin’ny sitrapon’izay mankahala anao ianao, dia ny zanakavavin’ny Filistina, izay menatra noho ny fahavetavetana fanaonao.
• 28Ary nijangajanga tamin’ny zanak’i Asyria koa ianao noho ny tsi-fahafaham-ponao; eny, nijangajanga taminy ianao, nefa mbola tsy afa-po ihany.
• 29Ary mbola nampandrosoinao ihany ny fijangajanganao hatrany amin’ny tanin’ny mpandranto*. Dia hatrany Kaldea; fa na tia tamin’izany aza dia mbola tsy afa-po ihany ianao. [Heb tany Kanana: izaho xxvv 4]
• 30Akory ny fahamaimain’ny fonao! hoy Jehovah Tompo, tamin’ny nanaovanao ireo rehetra ireo, dia ny fanaon’ny janga tsivalahara!
• 31Tamin’ny nanaovanao ny trano fijangajanganao teny an-tsampanan-dalana rehetra sy ny nanaovanao ny fitoerana avonao teny an-kalalahana rehetra dia tsy mba tahaka ny vehivavy janga ianao. satria tsy nahoanao akory izay tangy.
• 32Ny vadin’olona mijangajanga dia maka olon-kafa ho solon’ny vadiny!
• 33Sy vehivavy janga rehetra dia omen-tangy; fa ianao kosa manangy ireo lehilahinao rehetra sady manome azy fanambatambazana hanatonan’ny ny manodidina rehetra anao mba hijangajangany aminao.
• 34Ary hafa noho ny amin’ny vehivavy sasany mihitsy ny fanaonao tamin’ny fijangajanganao, fa tsy nisy nanaraka anao hijangajanga taminao; eny, satria nanome tangy ianao, fa tsy mba nomena, dia izany indrindra no mahahafa anao
• 35Koa mihainoa ny tenin’i Jehovah. ry kala janga:
• 36Izao no lazain’i Jehovah Tompo: Noho ny nandanianao volabe* sy ny nampisehoana ny fitanjahanao tamin’ny nijangajanganao tamin’ireny lehilahinao sy ny sampinao rehetra. izay fahavetavetanao. ary noho ny ran’ny zanakao izay naterinao ho an’ireo. [Heb. nanidinanao varahina]
• 37dia, indro, hovoriko ireny lehilahinao rehetra ireny, izay mankamany anao sy izay tianao rehetra mbamin’ireny rehetra izay halanao koa, eny hovoriko avy amin’ny manodidina ireny mba hamely anao, ka hampisehoiko aminy ny fitanjahanao, dia hahita ny fitanjahanao rehetra izy;
• 38ary hotsaraiko ianao araka ny fitsara vehivavy mijangajanga sy izay mandatsa-drà, ka halatsako ny rànao noho ny fahatezerana sy ny fahasaro-piaro.
• 39Dia hatolotro ho eny an-tànan’ireny ianao, ka harodany ny trano fijangajanganao, ary horavany ny fitoerana avonao; dia hendahany koa ny fitafianao, ary hesoriny ny firavakao soa, ka havelany hitanjaka sy hiboridana ianao.
• 40Dia hitondra vahoaka maro be hiakatra hamely anao koa izy ka hotorahany vato sady hotetitetehiny amin’ny sabany ianao.
• 41Ary hodorany amin’ny afo ny tranonao, ka hotanterahiny eo imason’ny vehivavy maro ny famaliana anao ary hatsahatro tsy hijangajanga ianao ka tsy hanangy intsony.
• 42Toy izany no hialako fo aminao, ary ho afaka ny fahasaro-piaroko aminao, dia hionona Aho ka tsy ho tezitra intsony.
• 43Noho ny tsy nahatsiarovanao ny andro fahakelezanao, fa niempo nanohitra Ahy tamin’ireo rehetra ireo ianao, dia; indro, ny nataonao* ihany no hatsingeriko ho eo an-dohanao, hoy Jehovah Tompo. Ary tsy nanao izany ratsy izany ho fanampin’ny fahavetavetanao rehetra va ianao**?[*Heb. lalanao][**Na: Fa raha tsy izany, dia Izao indray no hanao ratsy miohatra noho ny fahavetavetanao rehetra]
• 44Indro, ny mpanao ohabolana rehetra dia hamely anao amin’izao ohabolana izao hoe: Manahaka an-dreniny ihany ny zananivavy.
• 45Hianao dia zanakavavin-dreninao, izay mahafoy ny vadiny aman-janany; ary ianao dia rahavavin’ireo rahavavinao, izay nahafoy ny vadiny aman-janany; Hetita no reninareo, ary Amorita no rainareo.
• 46Samaria no zokinao-vavy, dia izy sy ny zananivavy izay monina eo an-kavianao; ary ny zandrinao vavy, izay monina amin’ny an-kavananao, dia Sodoma sy ny zananivavy.
• 47Nefa tsy araka ny alehan’ireo ihany no nalehanao, ary tsy araka ny fahavetavetan’ireo ihany no nataonao; fa hoatra ny zavatra kely loatra izany, ka dia nanao ratsy mihoatra noho ireo indray ianao tamin’ny nalehanao rehetra.
• 48Raha velona koa Aho, hoy Jehovah Tompo, na dia Sodoma rahavavinao sy ny zananivavy aza tsy mba nanao tahaka ny nataonao sy ny zanakao-vavy.
• 49Indro, izao no helok’i Sodoma rahavavinao: Avonavona sy fahabetsahan-kanina ary fahatokiam-poana no tao aminy sy tao amin’ny zananivavy, ary tsy mba nitantana ny malahelo sy ny mahantra izy.
• 50Niavonavona izy ka nanao fahavetavetana teo anatrehako; ary nony nahita izany Aho, dia nanaisotra azy.
• 51Ary tsy ampy antsasaky ny fahotanao ny nataon’i Samaria; fa ianao efa nampitombo ny fahavetavetanao mihoatra noho izy, ary nampiseho ny rahavavinao ho toa marina indray tamin’ny fahavetave-tanao rehetra izay nataonao.
• 52Hianao koa dia aoka hitondra ny henatrao araka ny efa nitsaranao ny rahavavinao. Noho ny fahotanao izay nahatonga anao ho vetaveta mihoatra noho ireo, ka dia miseho ho toa marina noho ianao izy, eny, menara koa ianao, ka mitondrà ny henatrao noho ny nampisehoanao ny rahavavinao ho toa marina.
• 53Ary hampodiko avy amin’ny fahababoana ireny, dia Sodoma sy ny zananivavy, ary Samaria sy ny zananivavy mbamin’izay olonao voababo,
• 54mba hitondranao ny henatrao sy hangaihaizanao noho izay rehetra nataonao amin’ny hampiononanao azy*.[Na: tamin’ny nampiononanao azy]
• 55Ary ny rahavavinao, dia Sodoma sy ny zananivavy, dia hody amin’ny toetrany taloha, ary Samaria sy ny zananivavy dia hody amin’ny toetrany taloha, ary ianao sy ny zanakaovavy dia hody amin’ny toetrareo taloha koa.
• 56Nefa tsy mbola mba notononin’ny vavanao akory ny nanjo an’i Sodoma rahavavinao tamin’ny andro niavonavonanao,
• 57fony tsy mbola niseho ny faharatsianao, toy ny tamin’ny andro nandatsan’ny zanakavavin’i Syria sy izay rehetra manodidina azy ary ny zanakavavin’ny Filistina, izay namingavinga anao manodidina.
• 58Ny faharatsianao sy ny fahavetavetanao no ho entinao, hoy Jehovah.
• 59Fa izao no lazain’i Jehovah Tompo: Araka ny nataonao ihany no hataoko aminao, izay namingavinga ny fianianana ka nivadika ny fanekena.
• 60Nefa hotsarovako ny fanekena nataoko taminao, tamin’ny andro fahakelezanao, ka hanorina fanekena mandrakizay aminao Aho.
• 61Dia hotsarovanao ny nalehanao, ka ho menatra ianao, raha mandray ireo rahavavinao, dia ny zokinao sy ny zandrinao; ka homeko ho zanakao-vavy ireo, na dia tsy mba isan’ilay nanaovako fanekena taminao aza.
• 62Izaho hanorina ny fanekeko aminao, ka dia ho fantatrao fa Izaho no Jehovah,
• 63mba hahatsiarovanao sy hangaihainao ary tsy hiloahanao vava intsony noho ny henatrao, raha mamela ny helokao ny amin’ny nataonao rehetra Aho, hoy Jehovah Tompo.

Toko 17

• 1[Ny amin’ny nanetrena ny taranak’i Dasida, sy ny mbola hanandratana azy indray] Ary tonga tamiko ny tenin’i Jehovah nanao hoe:
• 2Ry zanak’olona, manaova fampanonona, ary milazà fanoharana amin’ny taranak’Isiraely,
• 3ka ataovy hoe: Izao no lazain’i Jehovah Tompo: Nisy voromahery lehibe nanana elatra lehibe, sady lava ny volon’elany, ary nisoratsoratra avokoa ny volony rehetra; dia tonga tao Libanona izy ka naka izay avo indrindra amin’ny rantsan’ny sedera;
• 4ny tendron’ny tarony dia nolaingosany ka nentiny ho any amin’ny tany fandrantoana*; eny, tao an-tanànan’ny mpandranto no namboleny azy.[Heb. Kanana; izahao xxvi. 29]
• 5Nangalany koa ny voan-javatra tamin’ny tany ka namboleny tao amin’ny tany lonaka; nentiny ho eo amoron’ny rano be iny ka nataony araka ny fanao amin’ny hazomalahelo.
• 6Dia naniry iny ka tonga voaloboka iva misandrahaka, mba hitodihan’ny rantsany ho eo aminy ary ny fakany ho ao ambaniny; ka dia tonga voaloboka izy ka nandrantsana sy nanaroka.
• 7Ary nisy voromahery lehibe hafa koa nanana elatra lehibe sady be volo, ary, indro, manina azy izany voaloboka izany ka nampanatona ny fakany hankany aminy sady nampanaroka ny rantsany avy tamin’ny tany voafaritra nambolena azy mba hankany aminy koa mba holemany.
• 8Voavoly tao amin’ny saha tsara teo amoron’ny rano be izy mba handrantsana sy hamoa ka ho voaloboka tsara indrindra.
• 9Ataovinao hoe: Izao no lazain’i Jehovah Tompo: Ho vanona va izy? Tsy hongotana va ny fakany, ary hotazana ny voany, mba halazo izy? Halazo ny raviny rehetra, raha vao mitsimoka, ka na dia ny sandry mahery sy ny vahoaka betsaka aza tsy hahay mampaniry azy avy amin’ny fakany intsony*.[Na: na dia tsy misy sandry mahery na vahoaka betsaka manongotra azy amin’ny fakany aza]
• 10Koa, indro, na dia voavoly aza izy, moa ho vanona va? Tsy halazo tokoa va izy, raha asian’ny rivotra avy any atsinanana? Eny, halazo eo amin’ny tany voafaritra naniriany izy.
• 11Ary tonga tamiko ny tenin’i Jehovah nanao hoe:
• 12Lazao amin’ny taranaka maditra hoe: Tsy fantatrareo va ny hevitr’ireto zavatra ireto? Lazao aminy hoe: Indro, efa tonga tany Jerosalema ny mpanjakan’i Babylona ka naka ny mpanjaka sy ny mpanapaka tao, dia nitondra azy ho any aminy any Babylona.
• 13Ary naka ny anankiray tamin’ny taranaky ny mpanjaka izy, dia nanao fanekena taminy ka nampianiana azy, ary ny lehilahy mahery tamin’ny tany dia nentiny nandeha,
• 14mba hietry ny fanjakana ka tsy hiarina, mba hotandremana ny fanekeny ka haharitra.
• 15Fa niodina taminy izy ka naniraka olona hankany Egypta, mba hanome soavaly sy olona maro azy ireo. Moa hambinina va izy? Ho afa-mandositra va izay manao toy izany? Nivadika ny fanekena izy, ka ho afa-mandositra va?
• 16Raha velona koa Aho, hoy Jehovah Tompo, dia any amin’ny tanin’ilay mpanjaka nampanjaka azy sady nampianiana azy nefa nohamavoiny ny fianianana, ary nivadihany ny fanekeny eny, any amin’io, any Babylona, no hahafatesany.
• 17Ary amin’ny hanandratan’ireo tovon-tany sy ny hanaovany tilikambo handringanana olona maro, dia tsy hanampy azy amin’ny ady akory Farao, na dia manana miaramila maro sy vahoaka betsaka aza.
• 18Fa efa nanamavo ny fianianana izy tamin’ny nivadihany ny fanekena, fa he! efa nanolotra ny tànany izy, kanjo nanao izany rehetra izany ihany, dia tsy ho afa-mandositra izy.
• 19Koa izao no lazain’i Jehovah Tompo: Raha velona koa Aho, ny fampianianako izay nohamavoiny ary ny fanekeko izay nivadihany dia hatsingeriko ho eo an-dohany tokoa.
• 20Ary ny fandrika haratoko dia hovelariko aminy, ka ho voan’ny fandriko izy, ary ho entiko any Babylona ka hotsaraiko any noho ny nivadihany tamiko.
• 21Ary ny miaramilany rehetra izay afa-mandositra dia ho lavon’ny sabatra, ary izay sisa dia haely ho amin’ny rivotra rehetra, ka dia ho fantatrareo fa Izaho Jehovah no niteny izany.
• 22Izao no lazain’i Jehovah Tompo: Izaho dia haka amin’ny rantsana avo indrindra amin’ny sedera avo, ka hamboleko izany; holaingosako ny tendron’ny laingony milenodenoka, ka hamboleko ao amin’ny tendrombohitra avo sy milangalanga izany.
• 23Ao amin’ny tendrombohitra avon’ny Isiraely no hamboleko azy; ary handrantsana sy hamoa izy ka ho tonga sedera tsara indrindra, ary ny vorona samy hafa rehetra hitoetra ao aminy; ao amin’ny alokaloky ny rantsany no hitoerany.
• 24Ary ho fantatry ny hazo rehetra any an-tsaha fa Izaho Jehovah no efa nanetry ny hazo avo ka nanandratra ny hazo iva ary nandazo ny hazo maitso ka nampaniry ny hazo maina; Izaho Jehovah no niteny sady nanao izany.

Toko 18

• 1[Ny famalian’Andriamanitra ny olona araka ny asany avy] Ary tonga tamiko ny tenin’i Jehovah nanao hoe:
• 2Nahoana no manao izao ohabolana izao ao amin’ny tanin’ny Isiraely ianareo: Ny ray no mihinana voaloboka maharikivy, ka ny nifin’ny zanany no madilo?
• 3Rana velona koa Aho, hoy Jehovah Tompo, tsy hisy hanaovanareo izany ohabolana izany ao amin’ny Isiraely intsony.
• 4Indro, Ahy ny fanahy rehetra: toy ny fanahin’ny ray, dia toy izany koa ny fanahin’ny zanany; samy Ahy ireny; ny fanahy izay manota no ho faty.
• 5Fa raha marina ny olona ka manao izay marina sy mahitsy,
• 6fa tsy mihinana eny an-tendrombohitra, na manandratra ny masony ho amin’ny sampin’ny taranak’Isiraely, na mandoto ny vadin’ny namany, na manakaiky ny vehivavy izay mararin’ny fadim-bolana,
• 7na mampahory olona, fa mamerina ny natao tsatòka, ary tsy mandroba, fa manome ny haniny ho an’ny noana ary manafy lamba ny matanjaka,
• 8tsy mampanàna vola, na maka tombony akory, fa miaro ny tanany tsy hanao ratsy ary manao fitsarana marina amin’ny miady,
• 9ary mandeha araka ny lalàko sy ny mitandrina ny fitsipiko ka manao izay marina, dia marina izy ka ho velona tokoa, hoy i; Jehovah Tompo.
• 10Fa raha miteraka zazalahy mpanao an-keriny sy mpandatsa-drà izy, ka manao na dia iray ihany amin’ireo zavatra ireo aza iny
• 11(nefa tsy nanao ireo zavatra ireo akory ny tenany), na mihinana eny an-tendrombohitra, na mandoto ny vadin’ny namany,
• 12na mampahory ny malahelo sy ny mahantra, na mandroba, na tsy mamerina ny natao tsatòka, na manandratra ny masony ho amin’ny sampy ka manao izay fahavetavetana,
• 13na mampanana vola, na maka tombony moa ho velona va izy? Tsy ho velona izy; nanao ireo fahavetavetana rehetra ireo izy; ho faty tokoa izy, ary ny ràny dia ho aminy ihany.
• 14Ary, indro, raha iny kosa indray miteraka zazalahy, izay mahita ny fahotana rehetra nataon-drainy, nefa nony mahita izany izy, dia tsy mba manao tahaka izany,
• 15ka tsy mihinana eny an-tendrombohitra, na manandratra ny masony ho amin’ny sampin’ny taranak’Isiraely, na mandoto ny vadin’ny namany,
• 16na mampahory olona, na maka tsatòka, na mandroba, fa manome ny haniny ho an’ny noana ary manafy lamba ny mitanjaka,
• 17miaro ny tànany tsy hampahory ny mahantra, tsy mampanana vola, na maka tombony, fa manaraka ny fitsipiko sy mandeha araka ny lalàko, dia tsy ho faty noho ny helo-drainy izy; ho velona tokoa izy.
• 18Ny amin’ny rainy, noho ny nanaovany an-keriny sy ny nandrobany ny rahalahiny ary ny nanaovany izay tsy mety tao amin’ny fireneny, dia, indro, ho faty noho ny helony izy.
• 19Nefa, hoy ianareo: Nahoana moa ny zanaka no tsy mba hitondra ny helo-drainy? Raha ny zanaka manao izay marina sy mahitsy sy mitandrina ny didiko rehetra ka mankatò azy, dia ho velona tokoa izy.
• 20Ny fanahy izay manota no ho faty. Ny zanaka tsy mba hitondra ny heloky ny rainy, ary ny ray tsy mba hitondra ny heloky ny zanany; ny fahamarinan’ny marina ho aminy ihany ary ny faharatsian’ny ratsy fanahy kosa ho aminy ihany.
• 21Fa raha ny ratsy fanahy miala amin’ny fahotana rehetra izay nataony ka mitandrina ny didiko rehetra ary manao izay marina sy mahitsy, dia ho velona tokoa izy, fa tsy ho faty.
• 22Ny fahadisoany rehetra izay nataony tsy hotsarovana aminy intsony; ho velona izy noho ny fahamarinana izay nataony.
• 23Moa sitrako akory va ny fahafatesan’ny ratsy fanahy, hoy Jehovah Tompo, fa tsy ny hialany amin’ny alehany mba ho velona izy ?
• 24Fa raha ny marina no miala amin’ny fahamarinany ka manao meloka ary manaraka ny fahavetavetana rehetra izay nataon’ny ratsy fanahy, ho velona va izy? Ny fahamarinany rehetra izay nataony dia tsy hotsarovana; noho ny fahadisoana izay nandisoany sy ny fahotana izay nanotany dia ho faty izy.
• 25Nefa hoy ianareo: Tsy marina ny fitondran*’ny Tompo. Mihainoa ange, ry taranak’Isiraely: Moa ny fitondrako* va no tsy marina ? Tsy ny fitondranareo* va no tsy marina?[*Heb. lalana]
• 26Raha ny marina miala amin’ny fahamarinany ary manao meloka ka maty amin’izany, dia maty noho ny heloka nataony ihany izy.
• 27Ary raha ny ratsy fanahy miala amin’ny faharatsiana nataony ka manao izay marina sy mahitsy, dia hovelominy ny fanahiny.
• 28Raha mahita izy ka miala amin’ny fahadisoana rehetra izay nataony, dia ho velona tokoa izy, fa tsy ho faty.
• 29Nefa hoy ny taranak’Isiraely: Tsy marina ny fitondran*’ny Tompo. Ry taranak’Isiraely, ny fitondrako* va no tsy marina? Tsy ny fitondranareo* va no tsy marina?[Heb. lalana]
• 30Koa samy hotsaraiko araka ny ataonareo avy ianareo, ry taranak’Isiraely, hoy Jehovah Tompo. Mitodiha, ka mibebaha amin’ny fahadisoanareo rehetra, dia tsy ho tonga fahatafintohinana mahameloka anareo intsony izany.
• 31Esory ho afaka aminareo ny fahadisoanareo rehetra izay nataonareo, ka manaova fo vaovao sy fanahy vaovao ho anareo; fa nahoana no ho faty ianareo, ry taranak’Isiraely?
• 32Fa tsy sitrako ny fahafatesan’izay maty, hoy Jehovah Tompo. Koa mibebaha ianareo mba ho velona. Hira fahalahelovana ny amin’ireo lehiben’ny Isiraely.

Toko 19

• 1Ary manaova hira fahalahelovana ny amin’ireo andrianan’ny Isiraely ianao,
• 2ka ataovy hoe: Nahoana ny liom-bavy reninareo no namitsaka* tao amin’ny liom-bavy. Ary nitaiza ny zanany tao amin’ny liona tanora?[Na: Inona moa reninareo? Liom-bavy izy. Namitsaka]
• 3Ary nahalehibe ny zanany anankiray izy, dia tonga liona tanora io ka nianatra hamiravira haza sady nihinana olona.
• 4Nahare ny lazany ny firenena, dia namandrika azy tamin’ny lavaka, ka nasiany masom-by ny orony, dia nentiny ho any amin’ny tany Egypta izy.
• 5Ary nony hitan’ny liom-bavy fa foana sy levona ny fanantenany, dia nangalany indray ny zanany ka notezainy ho tonga liona tanora.
• 6Ary nivoivoy teny amin’ny liom-bavy iny, dia tonga liona tanora ka nianatra hamiravira haza sady nihinana olona.
• 7Ary nisavika ny mpitondratenan’ireny izy* sady nandrava ny tanànany, ka lao ny tany mbamin’izay rehetra tao aminy. Noho ny feon’ny fierony.[Na: Ary fantany ny lapan’ireny]
• 8Ary ny jentilisa manodidina, izay avy any amin’ny fanjakana samy hafa, dia nanamboatra sy namelatra ny fandrika haratony taminy, ka dia voafandrika tamin’ny lavaka izy.
• 9Ary nataony tamin’ny vata izy, sady nasiany masom-by ny orony, ka nentiny ho any amin’ny mpanjakan’i Babylona izy, nentiny ho ao amin’ny fiarovana izy, mba tsy ho re eny amin’ny tendrombohitry ny Isiraely intsony ny feony.
• 10Ny reninao dia tahaka ny voalobota voavoly teo amoron-drano Tamin’ny andro niadananao*: Vokatra sady nanaroka izy azon’ny rano be,[Na: Fony tamin’ny rànao ianao; izahao xvi. 6; na: Eny, tahaka ny tenanao]
• 11Ka nisy rantsany mafy azo natao tehim-panjakana ho an’izay manapaka, dia tonga avo izy ka nitehika tamin’ny rahona matevina, ary niseho tamin’ny hahavony izy noho ny hamaroan’ny rantsany.
• 12Nefa nongotana tamin’ny fahavinirana izy ka nazera ho amin’ny tany, ary ny rivotra avy any atsinanana no nahamaina ny voany; Ny rantsany mafy dia tapaka ka maina; Levon’ny afo ireny.
• 13Ary ankehitriny voavoly any an-efitra, dia ao amin’ny tany maina karankaina izy.
• 14Ary afo no mivoaka avy amin’ny sampany misy tehina ka mandevona ny voany, dia tsy misy rantsany mafy azo atao tehim-panjakana ho fanapahana intsony izy. Hira fahalahelovana izany sady mbola ho hira fahalahelovana ihany.

Toko 20

• 1[Ny toetry ny Isiraely hatramin’ny ela, sy ny zavatra hanjo azy, ary ny mbola hampodian’Andriamanitra azy]Ary tamin’ny andro fahafolo tamin’ny volana fahadimy tamin’ny taona fahafito dia nisy tonga ny loholon’ny Isiraely mba hanontany amin’i Jehovah, ka nipetraka teo anatrehako izy.
• 2Dia tonga tamiko ny tenin’i Jehovah nanao hoe:
• 3Ry zanak’olona, mitenena amin’ireo loholon’ny Isiraely, ka ataovy aminy hoe: Izao no lazain’i Jehovah Tompo: Moa hanontany amiko va no ihavianareo? Raha velona koa Aho, hoy Jehovah Tompo, dia tsy hety hanontanianareo mihitsy Aho.
• 4Tsy hotsarainao va izy, ry zanak’olona, tsy hotsarainao va izy? Ampahalalao ny fahavetavetan’ny razany izy.
• 5Ary ataovy aminy hoe: Izao no lazain’i Jehovah Tompo: Tamin’ny andro nifidianako ny Isiraely sy ny ananganako tanana tamin’ny taranak’i Jakoba sy nanaovako izay hahafantarany Ahy tany amin’ny tany Egypta raha nanangan-tanana taminy Aho ka nanao hoe: Izaho no Jehovah Andriamanitrareo,
• 6tamin’izany andro izany no nananganako tanana taminy hitondra azy hivoaka avy tany amin’ny tany Egypta ho any amin’ny tany notadiaviko ho azy, izay tondra-dronono sy tantely sady tena endriky ny tany rehetra,
• 7dia hoy Izaho taminy: Samia manary ny fahavetavetan’ny masonareo avy ianareo, ary aza mandoto tena amin’ny sampin’i Egypta; Izaho no Jehovah Andriamanitrareo.
• 8Nefa niodina tamiko izy ka tsy nety nihaino Ahy; samy tsy nanary ny fahavetavetan’ny masony na nahafoy ny sampin’i Egypta, ka dia hoy Izaho: Haidiko aminy ny fahavinirako, ary hotanterahiko aminy eo amin’ny tany Egypta ny fahatezerako.
• 9Kanefa niasa noho ny amin’ny anarako Aho, mba tsy handotoana izany eo imason’ny jentilisa izay nitoerany, sady teo imasony no nanaovako izay hahafantarany Ahy tamin’ny nitondrako azy nivoaka avy tany amin’ny tany Egypta.
• 10Koa dia nentiko nivoaka avy tany amin’ny tany Egypta izy ka nentiko ho any an-efitra.
• 11Dia nomeko azy ny didiko, ary nampahafantariko azy ny fitsipiko, izay mahavelona ny olona manaraka izany.
• 12Ary nomeko azy koa ny Sabatako ho famantarana ho amiko sy ho aminy mba ho fantany fa Izaho Jehovah no manamasina azy.
• 13Kanjo niodina tamiko tany an-efitra ihany ny taranak’Isiraely, ka tsy nandeha araka ny didiko izy, fa nanamavo ny fitsipiko, izay mahavelona ny olona manaraka izany, ary nandoto dia nandoto ny Sabatako izy, dia hoy Izaho: Haidiko aminy any an-efitra ny fahatezerako hahalany ringana azy.
• 14Kanefa niasa noho ny amin’ny anarako Aho, mba tsy handotoana izany eo anatrehan’ny jentilisa izay nahita ay nitondrako azy nivoaka.
• 15Ary Izaho dia nanangan-tanana taminy tany an-efitra koa fa tsy hitondra azy ho any amin’ny tany efa nomeko azy, izay tondra-dronono sy tantely sady tena endriky ny tany rehetra,
• 16satria efa nanamavo ny fitsipiko izy ary tsy nandeha araka ny didiko, fa nandoto ny Sabatako; fa ny fony dia nanaraka ny sampiny.
• 17Nefa niantra azy ihany ny masoko, ka dia tsy naringako na nolevoniko tany an-efitra izy.
• 18Fa hoy Izaho tamin’ny zanany tany an-efitra: Aza mandeha araka ny fanaon-drazanareo ianareo, na mitandrina ny fitsipiny, na mandoto tena amin’ny sampiny;
• 19fa Izaho no Jehovah Andriamanitrareo; koa mandehana araka ny didiko, ary mitandrema ny fitsipiko, ka araho izany.
• 20Ary manamasina sy Sabatako, mba ho famantarana ho amiko sy ho aminareo, ka dia ho fantatrareo fa Izaho no Jehovah Andriamanitrareo.
• 21Kanjo niodina tamiko koa ny zanany: tsy nandeha araka ny didiko izy, na nitandrina hanaraka ny fitsipiko, izay mahavelona ny olona manaraka izany, fa nandoto ny Sabatako izy, ka dia hoy Izaho: Haidiko aminy ny fahavinirako. ary hotanterahiko aminy any an-efitra ny fahatezerato.
• 22Nefa nampihemotra ny tanako Aho, ka dia niasa noho ny amin’ny anarako, mba tsy ho voaloto izany eo anatrehan’ny jentilisa izay nahita ny nitondrako azy nivoaka.
• 23Dia nanangan-tanana taminy tany an’efitra, indray Aho, hampiely azy any amin’ny jentilisa sy hampihahaka azy any amin’ny tany samy hafa,
• 24satria tsy nanaraka ny fitsipiko izy, fa nanamavo ny didiko sy nandoto ny Sabatako, ary ny masony nanaraka ny sampin’ny razany.
• 25Ary nomeko didy tsy tsara koa izy sy fitsipika izay tsy mahavelona Azy.
• 26Dia nandoto azy tamin’ny fanatiny Aho, dia tamin’ny nampandehanany ny voalohan-teraka rehetra hamaky ny afo*, hampahatalanjonako azy, mba hahafantarany fa Izaho no Jehovah.[Na: dia tamin’ny nanokanany ny voalohan-teraka rehetra; izahao Eks. xiii. 12]
• 27Koa mitenena amin’ny taranak’Isiraely, ry zanak’olona, ka ataovy aminy hoe: Izao no lazain’i Jehovah Tompo: Tamin’izao no mbola nanamavoan’ny razanareo Ahy tamin’ny nivadihany tamiko:
• 28Nony nitondra azy ho any amin’ny tany izay nananganako tanana homena azy Aho, dia nahita ny havoana andrandraina rehetra sy ny hazo misandrahaka rehetra izy, ka tao no namonoany zavatra hatao fanatitra, ary tao koa no nametrahany ny fanatiny mahatezitra; tao koa no nanaterany hanitra ankasitrahana, ary tao no nanidinany ny fanatitra aidiny.
• 29Ka dia hoy Izaho taminy: Ahoana moa ny amin’ny fitoerana avo alehanareo ? Ka dia fitoerana avo no natao anarany mandraka androany.
• 30Koa ataovy amin’ny taranak’Isiraely hoe: Izao no lazain’i Jehovah Tompo: Moa mandoto tena araka ny fanaon*’ny razanareo va ianareo, sy mijangajanga manaraka ny fahavetavetany va,[Heb. lalana]
• 31ary mandoto tena amin’ny sampinareo rehetra mandraka androany va ianareo amin’ny anateranareo ny fanomezanareo sy ny ampandehananareo ny zanakareo hamaky ny afo? Ary Izaho va hety hanontanianareo, ry taranak’Isiraely? Raha velona koa Aho, hoy Jehovah Tompo, tsy hety hanontanianareo mihitsy Aho.
• 32Ary tsy ho tanteraka mihitsy ny eritreritry ny fanahinareo hoe: Ho tahaka ny jentilisa izahay, dia tahaka ny firenena amin’ny tany samy hafa, ka hanao fanompoam-pivavahana ho an’ny vato aman-kazo.
• 33Raha velona koa Aho, hoy Jehovah Tompo, dia tanana mahery sy sandry ahinjitra ary fahatezerana aidina no hanjakako aminareo.
• 34Ary amin’ny tanana mahery sy ny sandry ahinjitra ary amin’ny fahatezerana aidina no hitondrako anareo mivoaka avy any amin’ny firenena sy hamoriako anareo avy any amin’ny tany izay nampielezana anareo.
• 35Dia ho entiko ho any an-efitry ny firenena ianareo, ary any no hifandaharako mifanatrika aminareo.
• 36Tahaka ny nifandaharako tamin’ny razanareo tany an-efitry ny tany Egypta, dia toy izany koa no hifandaharako aminareo, hoy Jehovah Tompo.
• 37Ary hampandaloviko eo ambanin’ny tehina ianareo ka hampidiriko hofehezin’ny fanekena.
• 38Ary havahako hiala aminareo ny mpiodina sy izay manota amiko; eny, ho entiko hiala amin’ny tany ivahiniany ireo, nefa tsy hisy ho tafiditra ao amin’ny tanin’ny Isiraely izy; ka dia ho fantatrareo fa Izaho no Jehovah.
• 39Ary ny aminareo, ry taranak’Isiraely, izao no lazain’i Jehovah Tompo; Samia mandeha ianareo, ka manompoa ny sampinareo; nefa any aoriana kosa dia hihaino Ahy mihitsy ianareo ka tsy handoto ny anarako masina intsony amin’ny fanatitrareo sy amin’ny sampinareo.
• 40Fa ao an-tendrombohitro masina, dia ao an-tendrombohitra avon’ny Isiraely, hoy Jehovah Tompo, no hanompoan’ny taranak’Isiraely rehetra Ahy, dia izay rehetra amin’ny tany; ao no hankasitrahako azy, ary ao no hilako ny fanatitrareo sy ny voaloham-bokatra aterinareo amin’ny zava-masinareo rehetra,
• 41Hankasitrahako toy ny hanitra ankasitrahana ianareo amin’ny hitondrako anareo mivoata avy any amin’ny firenena sy ny hamoriako anareo avy any amin’ny tany samy hafa nampielezana anareo, ka dia hiseho ho masina eo anatrehan’ny jentilisa Aho amin’ny hataoko aminareo.
• 42Ary ho fantatrareo fa Izaho no Jehovah, raha mitondra anareo ho any amin’ny tanin’ny Isiraely Aho, dia ny tany izay nananganako tanana nomena ny razanareo.
• 43Ary hotsaroanareo any ny nalehanareo sy ny nataonareo rehetra izay nahaloto anareo; ary haharikoriko anareo ny tenanareo noho ny ratsy rehetra izay nataonareo.
• 44Dia ho fantatrareo fa Izaho no Jehovah, rehefa miasa aminareo Aho noho ny amin’ny anarako, fa tsy araka ny lalàn-dratsinareo, na araka ny ratsy fanaonareo, ry taranak’Isiraely, hoy Jehovah Tompo.

Toko 21

• 1[Fanoharana ny amin’ny ala may sy ny sabatra voatsoaka] Dia tonga tamiko ny tenin’i Jehovah nanao hoe:
• 2Ry zanak’olona, manatreha ny atsimo, ary mitenena manandrify ny atsimo, ka maminania ny amin’ny hamelezana ny ala amin’ny tany atsimo.
• 3Ary lazao amin’ny ala amin’ny tany atsimo hoe: Henoy ny tenin’i Jehovah: Izao no lazain’i Jehovah Tompo: Indro, hampirehitra afo ao aminao Aho, izay handevona ny hazo maitso sy ny hazo maina rehetra ao aminao; tsy hovonoina ny lelafo midedadeda, fa ho main’ny afo ny tava rehetra hatrany atsimo ka hatrany avaratra;
• 4Ka dia ho hitan’ny nofo rehetra fa Izaho Jehovah no nampirehitra io, ka tsy hovonoina.
• 5Dia hoy izaho: Indrisy, Jehovah Tompo ô! Hoy ny fitenin’ny olona ahy: Tsy fanoharana va no ataony?
• 6Dia tonga tamiko ny tenin’i Jehovah nanao hoe:
• 7Ry zanak’olona, manandrifia an’i Jerosalema, ary mitenena manandrify ny fitoerana masina, ka maminania ny amin’ny hamelezana ny tanin’ny Isiraely.
• 8Ary ataovy amin’ny tanin’ny Isiraely hoe: Izao no lazain’i Jehovah: Indro, Izaho no mamely anao, ary hotsoahako amin’ny tranony ny sabatro, ka haringako ny marina sy ny meloka eo aminao.
• 9Ary noho ny handringanako ny marina sy ny meloka eo aminao, dia izany no hitsoahan’ny sabatro amin’ny tranony hamely ny nofo rehetra hatrany atsimo ka hatrany avaratra,
• 10Ka dia ho fantatry ny nofo rehetra fa Izaho Jehovah no nanatsoaka ny sabatro tamin’ny tranony; Tsy hiditra intsony izy.
• 11Ary ianao, ry zanak’olona, midridridridria toy ny tapa-balahana, eny, midridridridria amin’ny fangidiana eo imasony.
• 12Ary raha izy manao aminao hoe: Nahoana ianao no midridridridry? Dia valio hoe: Noho ny teny efa re, fa ho avy izany, ho kivy ny fo rehetra, hiraviravy ny tanana rehetra, ary hivarahontsana ny fanahy rehetra, sady hanjary ho toy ny rano ny lohalika rehetra. Eny, ho avy izany ka ho tanteraka, hoy Jehovah Tompo;
• 13Dia tonga tamiko ay tenin’i Jehovah nanao hoe:
• 14Ry zanak’olona, maminania, ka ataovy hoe: Izao no lazain’i Jehovah: Injao! sabatra! sabatra re! Voaranitra sady voafotsy koa.
• 15Voaranitra hahafaty be izy; Voafotsy hanelatselatra izy (Sa isika hifaly hoe: Ny tsorakazon’ny zanako mamingavinga ny hazo rehetra?)
• 16Ary nomena hofotsiana izy Mba horaisin-tanana; Voaranitra io sabatra io sady voafotsy, Mba hatolotra eo an-tanan’ny mpamono.
• 17Mitomania sy midradradradrà, ry zanak’olona! Fa mihatra amin’ny oloko izany, dia amin’ny lehibe rehetra amin’ny Isiraely; Lavon’ny sabatra miaraka amin’ny oloko izy, koa misafoa sirana ianao;
• 18Fa vita ny fizahan-toetra, Ka manao ahoana, raha ilay tehim-panjakana namingavinga iny aza no ho tonga tsinontsinona ? hoy Jehovah Tompo.
• 19Ary ianao, ry zanak’olona, dia maminania, ka mitehafa tanana, ary aoka hihaloza roa heny, na telo heny aza, ny sabatra, dia ny sabatra izay efa nahatrabaka olona; Eny, ny sabatra izay efa nahatrabaka ny andriana* no manemitra azy.[Heb. lehibe]
• 20Nahebihebiko teny amin’ny vavahadiny rehetra ny sabatra, mba hahakivy ny fo sy hahatonga fahatafintohinana maro. Indrisy! nataoko nanelatselatra izy sady voaranitra* hamono.[Na: voatsoaka]
• 21Miomana, ka mandrosoa eo ankavanana ianao, mijoroa, ka mandrosoa eo an-kavia, amin’izay voatendry hamelezanao na aiza na aiza.
• 22Hiteha-tanana koa Aho ary hiala fo; Izaho Jehovah no nilaza izany.
• 23Ary tonga tamiko ny tenin’i Jehovah hoe:
• 24Hianao, ry zanak’olona, manaova lalana roa ho anao hihavian’ny sabatry ny mpanjakan’i Babylona; avy amin’ny tany iray no hihavian’izy roa; ka manaova sarin’ny famantaran-dalana*, eo an-tsampanan-dalana mankany amin’ny tanàna no anaovinao azy.[Heb: voatsoaka]
• 25Manaova lalana hihavian’ny sabatra ho any Raban’ny taranak’i Amona sy ho any ny Joda ao Jerosalema mimanda.
• 26Fa ny mpanjakan’i Babylona mijanona eo amin’ny sampanan-dalana, dia eo an-dohan’ny lalana roa, mba hanao sikidy; dia manetsiketsika ny zana-tsipìka izy ary manontany amin’ny sampy* sy mizaha amin’ny atin-kena.[Heb. terafima]
• 27Mby eo an-tànany ankavanana ny sikidy, dia ny ho an’i Jerosalema, mba hametraka lohondry vy fandravana, hisoka-bava hiantsoantso, hanandra-peo amin’ny akoran’ady, hametraka lohondry vy fandravana eo akaikin’ny vavahady, hanandratra tovon-tany sy tilikambo.
• 28Nefa tahaka ny sikidy lainga izany eo imason’ireny izay efa nianiana mafy*, nefa Jehovah** no mampahatsiaro ny helony mba hisamborana azy.[*Na: izay efa nianianana mafy][**Heb. Izy]
• 29Koa izao no lazain’i Jehovah Tompo: Noho ny nampahatsiarovanareo ny helokareo tamin’ny nampiharihariana ny fahadisoanareo mba hampisehoana ny fahotanareo tamin’izay rehetra nataonareo, noho ny nahatsiarovana anareo dia hosamborin-tanana ianareo.
• 30Ary ianao, ry ilay ratsy fanahy voatrabaka, dia ilay mpanjakan’ny Isiraely, izay tapitra andro amin’ny fotoan’ny heloka mahafaty,
• 31izao no lazain’i Jehovah Tompo Hesorina ny hamama, ary halàna ny satro-boninahitra, tsy ho ao intsony ireo; hasandratra ny iva, ary haetry ny avo.
• 32Havadiko, havadiko, havadiko izany; fa izany koa aza dia tsy mba haharitra mandra-pahatongan’izay tena tompony tokoa, ka homeko azy izany.
• 33Ary ianao, ry zanak’olona, dia maminania, ka ataovy hoe: Izao no lazain’i Jehovah Tompo: Ny amin’ny taranak’i Amona sy ny latsa ataony, dia ataovy hoe: Indro sabatra! Dia sabatra voatsoaka hamono! Voafotsy handringana sy hanelatselatra izy
• 34(Raha mahita zava-poana ho anao izy sy maminany lainga aminao) Handavoany* anao ao amin’ny vozon’ny ratsy fanahy voatrabaka, Izay tapitra andro amin’ny fotoan’ny heloka mahafaty.[Heb. Hametrahana]
• 35Ampidiro amin’ny tranony izy. Any amin’ny tany namoronana anao, dia any amin’ny tany nahaterahanao, no hitsarako anao.
• 36Ary haidiko aminao ny fahavinirako, ny afon’ny fahatezerako no hotsofiko aminao, ka hatolotro eo an-tànan’ny olona ketrina. Sy izay mpamorona fandringanana ianao,
• 37Dia ho kitain’ny afo ianao; Ho eny amin’ny tany ny rànao; Tsy hotsaroana ianao; Fa Izaho Jehovah no niteny izany.

Toko 22

• 1[Ny fahotan’i Jerosalema sy ny Isiraely] Ary tonga tamiko ny tenin’i Jehovah nanao hoe:
• 2Ry zanak’olona, moa tsy hitsara va ianao ? Tsy hitsara ny tanana mpandatsa-drà va ianao ? Ampahafantaro azy ary ny fahavetavetany rehetra,
• 3ka ataovy hoe: Izao no lazain’i Jehovah Tompo: Tanàna mpandatsa-drà ao ampovoany hahatonga ny fotoany sady manao sampy ao aminy hahaloto azy.
• 4Ny rà izay nalatsakao no nahameloka anao, ary ny sampy izay nataonao no nahaloto anao; ary efa nampanakaiky ny andronao ianao ka efa tonga amin’ny taonanao, koa izany no nanaovako anao ho fandatsan’ny jentilisa sy ho fanakoran’ny tany rehetra,
• 5ka na ny akaiky anao na ny lavitra anao dia samy hanakora anao voaloto anarana sy be tabataba.
• 6Indreo ny lehiben’ny Isiraely efa samy ao aminao araka ny heriny* avy mba handatsa-drà.[Heb sandriny]
• 7Ao aminao no anozonana ray aman-dreny; ary ao aminao no anaovana izay sarotra amin’ny vahiny; ary ao aminao no ampahoriana ny kamboty sy ny mpitondratena.
• 8Hamavoinao ny zavatra masina. ary lotoinao ny Sabatako.
• 9Ao aminao misy olona mandehandeha manaratsy mba handatsa-drà; ary ao aminao misy mihinana eny an-tendrombohitra; ao aminao misy manao fahavetavetana.
• 10Ao aminao misy mandry amin-drainy; ao aminao misy misavika izay mararin’ny fadim-bolana.
• 11Misy manao fahavetavetana amin’ny vadin’ny namany; misy manao fahavetavetana mandoto ny vinantovaviny; ary misy misavika ny anabaviny zanakavavin-drainy.
• 12Ao aminao misy mandray kolikoly handatsa-drà; maka zana-bola sy tombony ianao sady manao an-keriny mandroba ny an’ny namanao ka manadino Ahy, hoy Jehovah Tompo.
• 13Koa, indro, manjera tanana Aho noho ny harena azonao tamin’ny tsy marina sy ny latsa-drà tao aminao.
• 14Hahatoha va ny fonao, na hahazaka va ny tananao, amin’ny andro izay hisehoaka* aminao? Izaho Jehovah no nilaza sady hahatanteraka izany.[Heb. hanaovako]
• 15Ary haeliko ho any amin’ny jentilisa sy hahahako ho any amin’ny tany samy hafa ianao, ary holevoniko ho afaka aminao mihitsy ny fahalotoanao.
• 16Ary dia ho hitan’ny jentilisa fa ny nataonao ihany no nahaloto anao; ka dia ho fantatrao fa Izaho no Jehovah.
• 17Ary tonga tamiko ny tenin’i Jehovah anao hoe:
• 18Ry zanak’olona, ny taranak’Isiraely dia efa tonga tain-drendrika amiko; izy rehetra dia varahina sy vifotsy sy vy ary firaka ao anatin’ny memy; eny, efa tonga taim-bolafotsy izy.
• 19Koa izao no lazain’i Jehovah Tompo: Noho ny nahatongavanareo rehetra ho tain-drendrika, dia, indro, hangoniko ho ao Jerosalema ianareo.
• 20Toy ny anangonana volafotsy sy varahina sy vy sy firaka ary vifotsy ho ao anatin’ny memy ka misy mifofotra azy amin’ny afo ho rendrika, dia toy izany no hanangonako anareo amin’ny fahatezerako sy ny fahavinirako, ary hataoko ao ianareo ka ho voarendrika;
• 21eny, nangoniko ianareo, dia hifofotra anareo amin’ny afon’ny fahatezerako Aho, ka ho voarendrika ao anatiny ianareo.
• 22Toy ny andrendrika volafotsy ao anatin’ny memy no handrendrehana anareo ao anatiny; ka dia ho fantatrareo fa Izaho Jehovah no nampidina ny fahatezerako aminareo.
• 23Ary tonga tamiko ny tenin’i Jehovah nanao hoe:
• 24Ry zanak’olona, lazao aminy hoe: Hianao no tany tsy hazavain’ny hainandro* sady tsy ilatsahan’ny ranonorana amin’ny andro fahatezerana.[Na: tsy voadio]
• 25Mikomy ny mpaminany ao aminy; tahaka ny liona mierona mamiravira haza izy; mihinana olona izy sady mahalasa ny harena sy ny zava-tsoa ary mahamaro ny mpitondratena ao aminy.
• 26Ny mpisorona dia mandika ny lalàko sy mandoto ny zavatra masina; tsy manavaka ny masina sy ny tsy masina izy, na mampiseho ny tsi-fitovian’ny maloto sy ny madio, ary mitampi-maso tsy hijery ny Sabatako izy, ary tsiratsiraina ao aminy Aho.
• 27Toy ny amboa-dia* mamiravira haza ny lehibeny ao aminy ka mandatsa-drà sy mahafaty aina ary mahazo harena amin’ny tsy marina.[Na: lopa]
• 28Ary ny mpaminaniny mandalotra azy amin’ny feta tsy madity ka mahita zava-poana sy maminany lainga aminy hoe: Izao no lazain’i Jehovah Tompo; nefa Jehovah tsy niteny tsinona.
• 29Ny vahoaka manao an-keriny sy mandroba ka mampahory ny malahelo sy ny mahantra; ary ny vahiny dia ampahoriny tsy andrariny.
• 30Ary nitady olona teo aminy Aho hanao manda sy hijanona eo amin’ny banga eo anatrehako hifona ho an’ny tany mba tsy handravako azy, kanjo tsy nahita;
• 31koa dia haidiko eo aminy ny fahatezerako; ny afon’ny fahatezerako no handaniako azy; ary hatsingeriko ho eo an-dohany ihany ny fanaony*, hoy Jehovah Tompo.[Heb lalana]

Toko 23

• 1[Fanoharana ny amin’Ohola sy Oholiba hampiseho ny nijangajangan’i Samaria sy Jerosalema] Ary tonga tamiko ny tenin’i Jehovah nanao hoe:
• 2Ry zanak’olona, nisy vehivavy mirahavavy iray tam-po;
• 3ary nijangajanga tany Egypta izy; fony izy mbola tanora no nijangajanga; tao no nisafosafoana ny tratrany, ary tao no nitsapatsapana ny nonon’ny fahavirijinany.
• 4Ny anaran’ny zokiny dia Ohola*, ary ny rahavaviny dia Oholiba**; ary novadiko izy ka niteraka zazalahy sy zazavavy. Ny amin’ny anarany: Samaria no Ohola, ary Jerosalema no Oholiba.[*Ohola = lainy][**Oholiba = Ny laiko no ao aminy]
• 5Ary raha mbola vadiko Ohola, dia nijangajanga izy; maimay izy tamin’ireo lehilahiny, dia ny Asyriana mifanolotra aminy,
• 6izay mitafy mangamanga, dia ny governora sy ny lefiny, tovolahy bikàna izy rehetra sady mpitaingin-tsoavaly.
• 7Nijangajanga tamin’ireny izy, dia tamin’izay tsara indrindra tamin’ny zanakalahin’i Asyria sy tamin’izay rehetra nahamaimay azy; tamin’ny sampiny rehetra no nandotoany tena.
• 8Ary ny fijangajangana izay fanaony hatrany Egypta dia tsy foiny; fa fony izy mbola tanora dia nandrian’ireny, ary ireny no nitsapatsapa ny tratran’ny fahavirijinany sady nanaram-po nijangajanga taminy.
• 9Ary noho izany dia natolotro ho eo an-tànan’ireo lehilahiny izy, dia eo an-tànan’ny Asyriana izay nahamaimay azy.
• 10Ireny no nampiseho ny fitanjahany; ny zananilahy sy ny zananivavy dia lasan’ireny, ary ny tenany novonoiny tamin’ny sabatra, ka dia tonga ambentinteny tamin’ny vehivavy izy ary efa niharan’ny fitsarana.
• 11Ary nony hitan’i Oholiba rahavaviny izany, dia vao mainka nataony manoatra noho ny azy indray ny fahamaimaizany, ary ny fijangajangany manoatra noho ny an’ny rahavaviny,
• 12Maimay tamin’ny Asyriana mifanolotra aminy izy, dia ny governora sy ny lefiny, olona mareva-pitafiana sady mpitaingin-tsoavaly, samy tovolahy bikàna izy rehetra.
• 13Dia hitako fa efa nandoto ny tenany izy, fa lalana iray ihany no nalehan’izy mirahavavy;
• 14ary mbola nampandrosoiny ihany ny fijangajangany, fa nahita sariolona voasoratra teo amin’ny rindrina izy sy ny sarin’ny Kaldeana voasoratra tamin’ny loko mena.
• 15samy nisy fehin-kibo nifehy teo am-balahany sy hamama voanato nisy rambony teo an-dohany; ny fijery azy rehetra dia toy ny fijery zanak’andriana, dia tahaka ny zanakalahin’i Babylona, izay teraka tany amin’ny tany Kaldea.
• 16Ary raha vao hitan’ny masony ireny, dia maimay taminy izy ka naniraka olona ho any aminy tany Kaldea.
• 17Ary tonga tany aminy ho ao amin’ny fandriam-pitiavana ireny zanakalahin’i Babylona ka nandoto azy tamin’ny fijangajangany; ary nony efa voaloton’ireny izy, dia niombotra niala taminy kosa ny fanahiny.
• 18Ary rehefa naneho ny fijangajangany sy nampiseho ny fitanjahany izy, dia niombotra niala taminy ny fanahiko, toy ny efa niombotan’ny fanahiko niala tamin’ny rahavaviny ihany.
• 19Dia nampitombo ny fijangajangany ihany izy, ka dia nahatsiaro ny andro fahatanorany, izay nijangajangany tany amin’ny tany Egypta.
• 20Fa izy dia maimay tamin’ireo lehilahiny, izay manana nofo tahaka ny nofom-boriky, ary ny avy aminy dia toy ny avy amin’ny soavaly.
• 21Nitady ny fijangajangan’ny fahatanoranao ianao, dia ilay nitsapatsapan’ny Egyptiana ny nononao, satria nonon’ny fahavirijinanao ireo.
• 22Koa izao, ry Oholiba, no lazain’i Jehovah Tompo: Indro, hotairiko hamely anao ireny lehilahinao, izay efa niombotan’ny fanahinao, ka ho entiko avy amin’ny tany manodidina izy mba hamely anao,
• 23dia ireny zanakalahin’i Babylona mbamin’ny Kaldeana rehetra, mpanapaka sy manan-jo sy andrian-dahy*, ary ny Asyriana rehetra koa miaraka aminy; tovolahy bikàna izy rehetra, dia ny governora sy ny lefiny, zanak’andriana sy olom-boafidy, sady mpitaingin-tsoavaly avokoa izy rehetra.[Na: Pekoda sy Soa ary Koa]
• 24Ary ho avy izy mitondra fiadiana sy kalesy sy kodia mbamin’ny firenena betsaka hamely anao, izay hanisy ampinga lehibe sy ampinga kely sy fiarovan-doha manodidina hamelezana anao, ary hatolotro azy ny fitsarana, ka hitsara anao araka ny fitsarany izy.
• 25Ary ho entiko hamely anao ny fahasaro-piaroko, ka hamely anao amin’ny fahatezerana ireny: hesoriny ny oronao sy ny sofinao, ary izay sisa aminao dia ho lavon’ny sabatra, ka ho lasan-ko babony ny zanakalahinao sy ny zanakavavinao, ary izay sisa aminao holevonin’ny afo.
• 26Ary hendahany ny lambanao, sady hesoriny aminao ny firavakao soa.
• 27Ary hatsahatro ny fahavetavetanao, dia ny fijangajanganao izay fanaonao hatrany amin’ny tany Egypta, fa tsy ihandrandrainao aminy intsony ny masonao, sady tsy; hotsarovanao intsony Egypta.
• 28Fa izao no lazain’i Jehovah Tompo: Indro, hatolotro eo an-tànan’izay halanao ianao, dia eo an-tanan’izay efa niombotan’ny fanahinao;
• 29ary hamely anao amin’ny fankahalana izy, ka hesoriny ny vokatry ny asanao, dia hilaozany mitanjaka sy mihanjahanja ianao, ary hiseho ny fitanjahan’ny fijangajanganao, dia ny fahavetavetanao sy ny fijangajanganao.
• 30Havo aminao izany zavatra izany noho ny nijangajanganao nanaraka ny jentilisa sy noho ny nandotoanao tena tamin’ny sampiny.
• 31Tamin’ny nalehan’ny rahavavinao no nalehanao koa, ka dia hataoko eo an-tananao ny kapoakany.
• 32Izao no lazain’i Jehovah Tompo: Amin’ny kapoaky ny rahavavinao no hisotroanao, dia ilay lalina àty sady lehibe; ho fihomehezana sy ho fanakorana tsy tanty ianao.
• 33Ho feno fahamamoana sy alahelo ianao; kapoaka fahatalanjonana sy fandringanana ny kapoak’i Samaria rahavavinao.
• 34Hosotroinao sy hotrohinao izy, ary hokikisanao ny vakivakiny sady handriatanao ny nononao; fa Izaho no niteny izany, hoy Jehovah Tompo.
• 35Koa izao no lazain’i Jehovah Tompo: Noho ny nanadinoanao Ahy sy ny nanarianao Ahy teo ivohonao, dia mba zakaonao kosa ny fahavetavetanao sy ny fijangajanganao.
• 36Jehovah niteny tamiko hoe: Ry zanak’olona, tsy hotsarainao va Ohola sy Oholiba? Dia asehoy azy ny fahavetavetany,
• 37fa efa nijangajanga izy, sady misy rà eny an-tànany, eny, ny sampiny no nijangajangany, ary ny zananilahy naterany ho Ahy dia nampamakiny ny afo ho an’ireny mba ho levona.
• 38Izao koa no nataony tamiko: Nandoto ny fitoerako masina izy tamin’izany andro izany sady nandoto ny Sabatako koa.
• 39Ary nony efa novonoiny ho an’ny sampiny ny zanany, dia nidirany tamin’iny andro iny ihany ny fitoerako masina ka nolotoiny; koa, he! izany no nataony teo anatin’ny tranoko.
• 40Ary koa, naniraka ho any amin’ny olona avy lavitra ianao*; eny, nanirahanao ireo, ka, indreo, tonga izay efa nandroanao sy nanosoranao loko mainty ny masonao sy niravahanao.[Heb. ianareo]
• 41ary nipetrahanao tamin’ny farafara marevaka, sady nisy latabatra voavelatra teo anoloany, izay nametrahanao ny ditin-kazo manitro sy ny diloiloko.
• 42Ary teo aminy nisy ny feon’ny maro izay mipetraka tsy manana ahiahy, ary afa-tsy ny ankabiazam-bahoaka dia nisy mpiboboka nentina avy tany an-efitra; ary nasian’ireo haba teny an-tànan’izy mirahavavy sy satro-boninahitra tsara tarehy teny an-dohany.
• 43Dia hoy Izaho ny amin’ilay efa tontan’ny fijangajangana ela: Amin’izao dia mbola hisy hijangajanga amin’io ihany va?
• 44Eny, mbola nankao aminy ihany ny olona toy ny ankanesany ao amin’ny vehivavy janga, dia toy ny efa nankanesany tao amin’i Ohola sy Oholiba, vehivavy janga.
• 45Ary olona marina no hitsara azy araka izay fitsara vehivavy mijangajanga sy mandatsa-drà, satria mijangajanga izy, sady misy rà eny an-tànany.
• 46Fa izao no lazain’i Jehovah Tompo: Ho entiko hamely azy ny olona maro, ka natolotro ho mpanjenjena* sy ho babo izy.[Na: ho fampangovitana]
• 47Ary ireo olona maro ireo dia hitora-bato azy sy hitetitetika azy amin’ny sabatra; hovonoiny ny zananilahy sy ny zananivavy, ary hodorany amin’ny afo koa ny tranony.
• 48Toy izany no hampitsaharako ny fahavetavetana amin’ny tany, mba hahazo anatra ny vehivavy rehetra tsy hanao araka ny fahavetavetanareo.
• 49Ary hatsingeriny aminareo ny fahavetavetanareo, ary ho entinareo ny heloka noho ny sampinareo; ka dia ho fantatrareo fa Izaho no Jehovah Tompo.

Toko 24

• 1[Fahitana ny amin’ny vilany fahandroana, ary ny tenin’Andriamanitra ny amin’ny hahafatesan’ny vadin’i Ezekiela] Ary tamin’ny andro fahafolo tamin’ny volana fahafolo tamin’ny taona fahasivy dia tonga tamiko ny tenin’i Jehovah nanao hoe:
• 2Ry zanak’olona, soratinao ny anaran’ny andro, dia izao andro anio izao; ny mpanjakan’i Babylona miantomboka mamely an’i Jerosalema amin’izao andro anio izao.
• 3Ary milazà fanoharana amin’ny taranaka maditra, ka ataovy aminy hoe: Izao no lazain’i Jehovah Tompo: Asio vilany eo an-tokoana, eny, ataovy eo an-tokoana, ka asio rano ao anatiny;
• 4ary arotsahy ao ny vaingambaingany, dia ny vaingambaingany tsara rehetra, na ny feny na ny sorony; fenoy taolana voafantina izy.
• 5Alao ny ondry voafantina, ka tohofy kitay betsaka ao ambaniny koa hahandroana ny taolana*, dia ampangotrahy tsara izy, ka andrahoy ao ny taolany.[Na: ka angòny eo ambaniny ny taolana]
• 6Koa izao no lazain’i Jehovah Tompo: Lozan’ny tanàna mpandatsa-drà sy ny vilany izay misy harafesina tsy mety afaka ao anatiny! Loary tsirairay ny vaingambaingany, fa aza anaovana filokana.
• 7Fa ny ràny dia ao aminy; teo ambonin’ny vatolampy mangadihady no nametrahany azy; tsy naidiny tamin’ny tany hosaronan’ny vovoka izy.
• 8Mba hampakatra ny fahatezerana hamaliana azy no nametrahako ny ràny teo ambonin’ny vatolampy mangadihady mba tsy ho voasarona.
• 9Koa izao no lazain’i Jehovah Tompo: Lozan’ny tanàna mpandatsa-drà; Izaho koa hamory kitay betsaka.
• 10Atohofy betsaka ny kitay hazo, ampireheto ny afo, masaho tsara ny hena, ka asio zavatra hahamanitra azy*, ary aoka ho may ny taolana.[Na: eny, taneho tsara izy]
• 11Dia foàny ny vilany, ka ataovy eo ambonin’ny vainafo hampahafana sy hahamay ny varahiny, ka ho levona eo aminy ny fahalotoany, ary ho afaka ny harafesiny.
• 12Efa nanasatra dia nanasatra ny tenany izy, nefa tsy nety afaka ny harafesim-beny; aoka ho eo amin’ny afo ny harafesiny.
• 13Ny fahalotoanao dia misy fahavetavetana; satria nanadio anao Aho, nefa tsy nadio ianao, dia tsy hadio ho afaka amin’ny fahalotoana intsony ianao ambara-pialako fo aminao.
• 14Izaho Jehovah no niteny, ka ho tonga izany ary hataoko; tsy hiahotrahotra Aho, na hiantra, na hanenina; araka ny fanaonao sy ny asanao no hitsarana anao, hoy Jehovah Tompo.
• 15Ary tonga tamiko ny tenin’i Jehovah nanao hoe:
• 16Ry zanak’olona, indro, efa hesoriko amin’ny loza indray mamely monja ilay tian’ny masonao; nefa aza misaona na mitomany na mandatsa-dranomaso akory ianao.
• 17Misentoa malemilemy ihany ianao, fa aza mitomany na misaona ny maty; afehezo aminao ny hamamanao, ary asio kiraro ny tongotrao, ary aza manarona ny saokanao na mihinana ny fahan-kanina aterin’olona.
• 18Ary nony maraina dia niteny tamin’ny olona aho; ary nony hariva dia maty ny vadiko; ary nony maraina indray dia nanao araka ny efa nandidiana ahy aho.
• 19Ary hoy ny olona tamiko: Moa tsy holazainao aminay va izay hevitra tokony ho azonay amin’izao ataonao izao?
• 20Dia hoy izaho taminy: Tonga tamiko ny tenin’i Jehovah nanao hoe:
• 21Lazao amin’ny taranak’Isiraely hoe: Izao no lazain’i Jehovah Tompo: Indro, holotoiko ny fitoerako masina, izay reharehan’ny herinareo, dia ilay tian’ny masonareo sy mahamanina ny fanahinareo; ary ho lavon’ny sabatra ny zanakalahinareo sy ny zanakavavinareo, izay nilaozanareo.
• 22Dia manaova tahaka ny nataoko ianareo: aza manarona ny saokanareo ianareo, na mihinana ny fahan-kanina aterin’olona;
• 23ary aoka ho eo an-dohanareo ny hamamanareo sy ho eo an-tongotrareo ny kiraronareo; aza misaona na mitomany ianareo; fa ho levona noho ny helokareo ianareo ka hifampitoloko.
• 24Ary Ezekiela dia ho famantarana mahagaga ho anareo; koa araka izay rehetra nataony no mba hataonareo; ary rehefa tonga izany, dia ho fantatrareo fa Izaho no Jehovah Tompo.
• 25Ary ianao, ry zanak’olona, amin’ny andro hanesorako aminy ny heriny sy ny fifalian’ny voninahiny, ilay tian’ny masony sy ilay tian’ny fanahiny, dia ny zananilahy sy ny zananivavy,
• 26eny, amin’izany andro izany dia hisy olona handositra ho tonga any aminao mba hampandre ny sofinao izany;
• 27amin’izany andro izany dia hisokatra miaraka amin’ny an’ilay mandositra ny vavanao, ka dia hiteny ianao, fa tsy ho moana intsony; ry ho famantarana mahagaga aminy ianao; ka dia ho fantany fa Izaho no Jehovah.

Toko 25

• 1[Faminaniana ny amin’ny firenena mifanila fonenana amin’ny Isiraely, dia ny Amonita, ny Moabita, ny Edomita ary ny Filistina] Ary tonga tamiko ny tenin’i Jehovah nanao hoe:
• 2Ry zanak’olona, manandrifia ny Amonita, ary maminania ny hamelezana azy,
• 3ka ataovy aminy hoe: Mihainoa ny tenin’i Jehovah Tompo: Izao no lazain’i Jehovah Tompo; Noho ny nanaovanao hoe: Hià! sakoa izay! raha nolotoina ny fitoerako masina, Ary noravana ny tanin’ny Isiraely, Sady lasan-ko babo ny taranak’i Joda,
• 4Dia indro kosa, hatolotro ho fananan’ny zanaky ny atsinanana ianao, Ka haoriny ao aminao ny tobiny, ary hataony ao aminao ny fonenany; Ireny no hihinana ny vokatrao sy hisotro ny ronononao.
• 5Ary Raba dia hataoko tany fitoeran’ny rameva, ary ny taranak’i Amona ho tany fandrian’ny ondry aman’osy; Ka dia ho fantatrareo fa Izaho no Jehovah.
• 6Fa izao no lazain’i Jehovah Tompo: Noho ny nitehafanao tanana sy ny nitotoanao tamin’ny tongotrao ary ny nifalian’ny fonao tamin’ny fanaovana tsinontsinona ny tanin’ny Isiraely,
• 7Dia, indro, hahinjitro aminao ny tanako, ka hatolotro ho babon’ny jentilisa ianao; Ary hofongorako tsy ho vanon-ko firenena intsony ianao, ka hataoko lany ritra tsy ho amin’ny tany; Eny, haringako ianao, ka dia ho fantatrao fa Izaho no Jehovah.
• 8Izao no lazain’i Jehovah Tompo: Noho ny nanaovan’i Moaba sy Seïra hoe: Indro, ny taranak’i Joda efa tonga tahaka ny firenena rehetra izao,
• 9Dia, indro, hotatahako kosa ny tanin’ny Moaba, hatrany amin’ny tanànany rehetra, izay ravaky ny tany, dia Beti-jesimota sy Bala-meona ary Kiriataima,
• 10Ho an’ny zanaky ny atsinanana koa tahaka ny taranak’i Amona’ihany, eny, hatolotro ho fananan’ireny izy, mba tsy hotsarovana ao amin’ny firenena intsony ny taranak’i Amona.
• 11Ary hotanterahiko ny fitsarana an’i Moaba; ka dia ho fantany fa Izaho no Jehovah.
• 12Izao no lazain’i Jehovah Tompo: Noho ny namelezan’i Edoma ny taranak’i Joda tamin’ny namaliany azy ary ny nanotany indrindra sy ny namaliany azy,
• 13Dia izao no lazain’i Jehovah Tompo: Hahinjitro amin’i Edoma ny tanako, ka haringako ny olona sy ny biby ao aminy; Ary hataoko lao hatrany Temana izy sy ho lavon’ny sabatra hatrany Dedana.
• 14Ary ny tanan’ny Isiraely oloko no ho entiko mamaly an’i Edoma, ka hanao aminy araka ny fahatezerako sy ny fahavinirako ireo; Ka dia ho fantany ny famaliako, hoy Jehovah Tompo.
• 15Izao no lazain’i Jehovah Tompo: Noho ny famaliana nataon’ny Filistina, eny, noho ny namaliany ratsy tamin’ny nanaovany tsinontsinona azy, ka nandringana noho ny fandrafiany hatry ny fony ela,
• 16Dia izao no lazain’i Jehovah Tompo: Indro, hahinjitro amin’ny Filisitna ny tanako, ka haringako ny keretita, ary horavako izay sisa any amoron-dranomasina;
• 17Ary famaizana mirehitra no ho entiko manao famaliana lehibe aminy; ka dia ho fantatra-fa Izaho no Jehovah, rehefa hataoko mihatra aminy ny famaliako.

Toko 26

• 1[Faminaniana ny amin’ny handravana an’i Tyro] Ary tamin’ny andro voalohany amin’ny volana tamin’ny taona fahiraika ambin’ny folo dia tonga tamiko ny tenin’Jehovah nanao hoe: zananivavy.
• 2Ry zanak’olona, noho ny nandatsan’i Tyro an’i Jerosalema hoe: Hià! sakoa izay! rava ilay vavahadin’ny firenena! Mba hifindra amiko kosa izao, ka ho feno aho, fa izy kosa ho foana,
• 3Dia izao no lazain’i Jehovah Tompo: Indro, hamely anao Aho, ry Tyro, ka hampiakatra ny firenena maro hiady aminao, tahaka ny fampiakatry ny ranomasina ny onjany.
• 4Ary horavan’ireo ny mandan’i Tyro, sady harodany ny tilikambony; Dia hofafako hiala aminy ny vovo-taniny, ka hataoko tahaka ny vatolampy mangadihady izy.
• 5Ho famelarana harato eo amin’ny ranomasina izy; Fa Izaho no niteny izany, hoy Jehovah Tompo, ka dia ho babon’ny-firenena izy.
• 6Ary ny zana-bohiny* eny an-tanety dia hovonoina amin’ny sabatra; ka dia ho fantatra fa Izaho no Jehovah.[Heb. zananivavy]
• 7Fa izao no lazain’i Jehovah Tompo: Indro, ho entiko avy any avaratra ho any Tyro Nebokadnezara, mpanjakan’i Babylona, andrianan’ny andriana, mitondra soavaly sy kalesy sy mpitaingin-tsoavaly ary vahoaka betsaka.
• 8Ny zana-bohitrao* any an-tanety dia hovonoiny amin’ny sabatra; ary hanandratra tilikambo sy tovon-tany sady hanangana ampinga lehibe hamelezany anao izy.[Heb zanakao-vavy]
• 9Ary hametraka lohondry vy fandravana eo akaikin’ny mandanao izy, sady horavany amin’ny fiadiany* ny tilikambonao.[Heb. sabany]
• 10Ho feno ny vovo-taniny ianao noho ny habetsahan’ny soavaliny; hihorohoro ny mandanao noho ny fikorodondrodon’ny mpitaingin-tsoavaly sy ny kodia sy ny kalesy, raha miditra eo amin’ny vavahadinao tahaka ny olona miditra amin’ny tanàna izay voabanga izy.
• 11Ny kitron-tsoavaliny no hanitsakitsahany ny lalambenao rehetra; ny olonao dia hovonoiny amin’ny sabatra, ary ny tsangambatonao mafy dia hianjera amin’ny tany.
• 12Hobaboiny ny hirenao, horobainy ny rantonao, harodany ny mandanao, horavany ny tranonao mahafinantra; ary ny vatonao sy ny hazonao sy ny vovokao dia hataony any amin’ny rano.
• 13Ary hatsahatro ny feon’ny hiranao, sady tsy ho re intsony ny fanenon’ny lokanganao.
• 14Dia hataoko toy ny vatolampy mangadihady ianao ka ho famelarana harato sady tsy haorina intsony; fa Izaho Jehovah no niteny, hoy Jehovah Tompo.
• 15Izao no lazain’i Jehovah Tompo amin’i Tyro: Tsy hihorohoro va ny moron-dranomasina noho ny fikotrokotroky ny firodananao, raha mitrona ny voatrabaka, ary misy vonoana eo ampovoanao?
• 16Dia hidina hiala amin’ny seza fiandrianany ireo andrianan’ny ranomasina rehetra ka hiala akanjo sy hanaisotra ny fitadiany misoratsoratra; Hovotra no hitafiany, ka hipetraka amin’ny tany izy; ary hangovitra isaky ny indray mipi-maso izy ka ho gaga anao.
• 17Ary hanao hira fahalahelovana ny aminao izy ka hanao aminao hoe: Indrisy! rava ianao, ry ilay nonenan’ny avy any an-dranomasina! Dia ilay tanàna malaza izay nahery teo amin’ny ranomasina, dia izy mbamin’ny mponina ao, izay nampahatahotra ny mponina rehetra eo aminy!
• 18Ankehitriny dia raiki-tahotra ny amoron-dranomasina amin’ny andro hianjeranao; Eny, toran-kovitra ny nosy any an-dranomasina noho ny haharavanao.
• 19Fa izao no lazain’i Jehovah Tompo: Raha hataoko tanàna lao tahaka ireo tanàna haolo ianao, ary hampiakariko aminao ny rano lalina, ka hosaronan’ny rano be ianao,
• 20Dia hampidiniko hiaraka amin’izay mivarina any an-davaka ianao, Hankany amin’ny razana, ka hamponeniko any ambanin’ny tany ianao, dia any amin’ny fonenana efa lao hatramin’ny ela, hiaraka amin’izay mivarina any an-davaka, mba tsy honenana intsony; ary hasiako voninahitra eo amin’ny velona;
• 21Dia hataoko fampitahorana ianao, ka tsy ho eo intsony; Eny, hotadiavina ianao, nefa tsy ho hita intsony mandrakizay, hoy Jehovah Tompo.

Toko 27

• 1[Ny harena amam-boninahitra nananan’i Tyro, sy fitomaniana noho ny manjo azy] Ary tonga tamiko ny tenin’i Jehovah nanao hoe:
• 2Hianao, ry zanak’olona, manaova hira fahalahelovana ny amin’i Tyro,
• 3ka ataovy aminy hoe: He, ry ilay monina amin’ny vava-ranomasina, Mpandranto ho an’ny firenena ho any ny moron-dranomasina maro samy hafa; Izao no lazain’i Jehovah Tompo: He, ry Tyro, ianao efa nanao hoe: Izaho dia tena tsara tarehy!
• 4Ao amin’ny ranomasina ny taninao, efa tanteraky ny mpandrafitra anao ny hatsaran-tarehinao.
• 5Hazo kypreso avy any Senira no nanaovany ny lampihazonao; Sedera avy any Libanona no nalainy hatao andrin-tsambonao.
• 6Oka avy any Basana no nanaovany ny fivoinao; hazo bokso avy any amin’ny moron-dranomasin’i Kitima no nataony fipetrahan’ny mpivoinao sady nasiany parike ivory.
• 7Rongony madinika samy hafa soratra avy any Egypta no natao lainao mba ho faneva ho anao; Lamba manga sy volomparasy avy any amin’ny moron-dranomasin’i Elisa no eloelonao.
• 8Ny mponina any Sidona sy Arvada no mpivoinao; Ny olon-kendrinao, ry Tyro, no tao aminao, ka ireo no mpitondra sambonao.
• 9Ny zokiolon’i Gebala sy izay hendry tany no tao aminao ho mpanentsin-tsambonao; ny sambo rehetra teny amin’ny ranomasina mbamin’ny matilony dia tonga tao aminao hanakalo ny rantonao.
• 10Ny avy any Persia sy ny Lydiana* ary ny Libyana** dia isan’ny miaramila mpiadinao; Nanantona ampinga sy fiarovan-doha teny aminao ireo ka nahatsara tarehy anao.[*Heb. Loda][**Heb. Pota]
• 11Ny terak’i Arvada sy ny miaramilanao no teny ambonin’ny mandanao manodidina, ary lehilahy mahery no tao amin’ny tilikambonao; Ny ampingany dia nahantony teny amin’ny mandanao manodidina; Ireo no nahatanteraka ny hatsaran-tarehinao.
• 12Tarsisy no mpandranto nankany aminao noho ny haben’ny harena samy hafa rehetra; Volafotsy sy vy sy vifotsy ary firaka na nentiny natakalo ny entanao.
• 13Javana sy Tobala ary Maseka no mpandranto nankany aminao, ka olona sy fanaka varahina no natakalony ny varotrao.
• 14Ny terak’i Togarma nitondra soavaly sy soavaly fitaingina ary ampondra natakalo ny entanao.
• 15Ny terak’i Dedana no mpandranto nankany aminao; Ny avy amin’ny moron-dranomasina maro no tonga hivarotra tao aminao ka nitondra ivory* sy hazomainty natakalo ny entanao.[Heb. vangy ivory]
• 16Syria no mpandranto nankany aminao noho ny habetsahan’ny tao-zavatrao, ka karbonkolo sy lamba volomparasy sy tenona samy hafa soratra sy rongony fotsy madinika sy voahangy ary robina No nentiny natakalo ny entanao.
• 17Joda sy ny tanin’ny Isiraely no mpandranto nankany aminao, ka vary tritika avy tany Minita sy zava-mamy sy tantely sy diloilo ary balsama no natakalony ny varotrao.
• 18Damaskosy no mpandranto nankany aminao noho ny habetsahan’ny taozavatrao, dia ny haben’ny harenao rehetra, ka nitondra divay avy any Helbona sy volon’ondry fotsy izy.
• 19Vedana koa sy Javana avy any Ozala dia nitondra vy voatefy* natakalo ny entanao; Kasia sy veromanitra no natakalony ny varotrao**.[*Na: vy mamirapiratra][**Na: Vedana sy Javana nitondra folo hatakalo ny varotrao; vy voatefy sy kasia ary veromanitra no isian’ny varotrao]
• 20Dedana no mpandranto nankany aminao, nitondra lamba fanao lamban-tsoavaly.
• 21Arabia sy ireo andriandahin’i Kedara rehetra no nandranto tany aminao, ka zanak’ondry sy ondrilahy ary osilahy no nentiny natao varotra tao aminao.
• 22Ny mpandranto avy any Sheba sy Rama no mpandranto nankany aminao, Ka zava-manitra tsara indrindra sy vato soa samy hafa karazana ary volamena no nentiny natakalo ny entanao.
• 23Harana sy Kane ary Edena sy mpandranto avy any Sheba sy Asyria ary Kilmada no mpandranto nankany aminao.
• 24Ireo no mpandranto nankany aminao nitondra ny fitafiana marevaka rehetra, dia kapôty manga sy samy hafa soratra ary vata sedera mifehy* misy fitafiana soa no natakalony ny varotrao.[Na; vata mifehy mafy]
• 25Ny sambon’i Tarsisy no mpitondra ny entanao, dia feno sady be voninahitra ianao teo amin’ny ranomasina.
• 26Nentin’ny mpivoinao teny amin’ny rano be ianao, dia nahavaky anao tao amin’ny ranomasina ny rivotra avy any atsinanana.
• 27Ny harenao sy ny vidin’entanao, ny varotrao, ny matilonao sy ny mpitondra sambonao, ny mpanentsin-tsambonao sy ny mpividy ny entanao ary ny miaramilanao rehetra izay tao aminao mbamin’ny olona betsaka tafangona tao aminao dia nilentika tao amin’ny ranomasina tamin’ny andro nandravana anao.
• 28Noho ny fidradradradran’ny mpitondra sambonao dia mihorohoro ny tany manodidina.
• 29Ary samy midina miala amin’ny sambony ny mpivoy rehetra sy ny matilo ary ny mpitondra sambo rehetra eny an-dranomasina ka mijanòna eny an-tanety;
• 30Ary manandratra ny feony noho ny nanjo anao izy ka midradradradra mafy* sady manopy vovoka hiraraka amin’ny lohany ary mihosinkosin-davenona;[Heb. mangidy]
• 31Ary mibory loha avokoa izy noho ny aminao sy misikina lamba fisaonana ary mitomany anao amin’ny fangidiam-panahy izy, dia fisaonana mafy.
• 32Ary raha midradradradra izy, dia manao hira fahalahelovana ny aminao ka mitomany anao hoe: Iza moa no tahaka an’i Tyro, dia tahaka ilay rava ao ampovoan’ny ranomasina ?
• 33Raha nivoaka avy amin’ny ranomasina ny varotrao, dia nahatretrika firenena maro ianao; Tamin’ny haben’ny harenao sy ny varotrao dia nampanan-karena ny mpanjakan’ny tany ianao.
• 34Tamin’ny andro nandravan’ny ranomasina anao ho any amin’ny rano lalina dia niara-nilentika taminao ny varotrao sy ny olona tafangona tao aminao.
• 35Talanjona anao ny mponina rehetra amin’ny moron-dranomasina, ary raiki-tahotra ny mpanjakany ka dia mivalomainty.
• 36Misitrisitra anao ny mpandranto amin’ny firenena; tonga fampitahorana ianao ary tsy ho ao intsony mandrakizay

Toko 28

• 1[Faminaniana ny amin’ny mpanjakan’i Tyro;] Ary tonga tamiko ny tenin’i Jehovah nanao hoe;
• 2Ry zanak’olona, lazao amin’ny mpanjakan’i Tyro hoe: Izao no lazain’i Jehovah Tompo: Satria miavonavona ny fonao. ka hoy ianao: Mba Andriamanitra koa aho; eto amin’ny anankiray amin’ny fipetrahan’Andriamanitra no ipetrahako, dia eto ampovoan’ny ranomasina. Nefa olona ihany ianao, fa tsy Andriamanitra tsinona, Na dia nataonao toy ny fon’Andriamanitra aza ny fonao,
• 3Hay! hendry noho Daniela ianao! Tsy misy zava-miafina azo afenina anao izany!
• 4Ny fahendrenao sy ny fahalalanao no nahazoanao haren. Eny, izany no nahazoanao volamena sy volafotsy ho ao amin’ny rakitrao
• 5Ny haben’ny fahendrenao tamin’ny varotrao no nampitomboanao ny harenao, ka dia miavonavona ny fonao noho ny harenao;
• 6Koa, indro, izao no lazain’i Jehovah Tompo: Satria efa nataonao ho toy ny fon’Andriamanitra ny fonao,
• 7Dia, indro, hitondra olona hafa firenena Aho hamely anao, dia izay masiaka indrindra amin’ny firenena, Ka hotsoahany ny sabany hamelezany ny fahendrenao tsara, ary hataony matroka ny famirapiratanao
• 8Havariny ho any an-davaka ianao, ka ho faty toy ny fahafatesan’izay voatrabaka ao amin’ny ranomasina.
• 9Moa mbola hitompo teny fantatra va ianao eo imason’izay mamono anao hoe mba Andriamanitra koa aho? Nefa olona ihany ianao, fa tsy Andriamanitra tsinona, raha mby eo an-tànan’izay manatrabaka anao
• 10Tahaka ny fahafatesan’ny tsy voafora no hahafatesan’ny fahavalo anao; Fa Izaho no niteny izany, hoy Jehovah Tompo.
• 11Ary tonga tamiko ny tenin’i Jehovah nanao hoe:
• 12Ry zanak’olona, manaova hira fahalahelovana ny amin’ny mpanjakan’i Tyro, ka lazao aminy hoe: Izao no lazain’i Jehovah Tompo: Ry ilay mahatanteraka* ny rafitra tsara tarehy tonga marika sady feno fahendrena no tena tsara tarehy,[Heb. manisy tombon-kase]
• 13Tany Edena, sahan’Andriamanitra, ianao; Ny vato soa rehetra ny eloelo teo amboninao, dia ny karneola, ny topaza, ny onyksa, ny krysolita, ny beryla, ny jaspy, ny safira, ny robina, ny emeralda ary ny volamena; Ny fampanenoana ny ampongatapakao sy ny sodinao* dia tao aminao, tamin’ny andro namoronana anao dia natao koa ireo.[Na: vehivavy]
• 14Hianao dia kerobima voahosotra izay manaloka, fa voatendriko ianao; Tao an-tendrombohitra masin’Andriamanitra ianao; Tao amin’ny vato mirehitra no nitsangantsangananao.
• 15Tsy nanan-tsiny ianao tamin’ny nalehanao hatramin’ny andro namoronana anao ka mandra-pahita heloka tao aminao.
• 16Noho ny habetsahan’ny varotra nataonao dia nofenoina loza tao aminao, ka nanota ianao; Ary dia nolotoiko ka nariako niala tamin’ny tendrombohitr’Andriamanitra ianao, Ary nosimbako ianao, ry kerobima manaloka, hiala tao amin’ny vato mirehitra.
• 17Niavonavona ny fonao noho ny hatsaran-tarehinao; Efa nahasimba ny fahendrenao mbamin’ny famirapiratanao ianao; Nazerako eny an-tany ianao sady natolotro ho fitalanjonan’ireo mpanjaka,
• 18Noho ny haben’ny helokao tamin’ny tsi-fahamarinan’ny varotrao, dia voalotonao ny fitoeranao masina; Koa izany no hamoahako afo avy ao aminao handevona anao, ary hataoko tonga lavenona eny ambonin’ny tany ianao eo imason’izay rehetra mijery anao.
• 19Ny firenena rehetra izay mahalala anao dia ho gaga anao; Ho tonga fampitahorana ianao ary tsy ho ao intsony mandrakizay.
• 20[Faminaniana ny amin’i Sidona, sy fanomezan-toky ny Isiraely] Ary tonga tamiko ny tenin’i Jehovah nanao hoe:
• 21Ry zanak’olona, manandrifia an’i Sidona, dia maminania ny hamelezana azy,
• 22ka ataovy hoe: Izao no lazain’i Jehovah Tompo: Indro, efa hamely anao Aho, ry Sidona, ary hankalazaina ao ampovoanao Aho; Ka dia ho fantatra fa Izaho no Jehovah, raha manatanteraka ny fitsarana azy Aho ka miseho ho masina amin’ny ataoko aminy.
• 23Fa hahatonga areti-mandringana hamely azy Aho ary rà ho eny an-dalambeny; Dia hiampatrampatra eny aminy ny voatrabaky ny sabatra izay mamely avy eny manodidina eny; Ka dia ho fantatra fa Izaho no Jehovah.
• 24Ary tsy hisy roy mampangirifiry na tsilo mampanaintaina intsony ho an’ny taranak’Isiraely, avy amin’ireo manodidina azy, izay manao tsinontsinona azy; Ka dia ho fantatra fa Izaho no Jehovah Tompo.
• 25Izao no lazain’i Jehovah Tompo: Raha angoniko avy any amin’ny firenena izay nampielezana azy ny taranak’Isiraely, dia hiseho ho masina eo imason’ny firenena Aho amin’ny ataoko aminy, ka honina any aminy taniny izay nomeko an’i Jakoba mpanompoko izy.
• 26Dia handry fahizay any izy ka hanorina trano sy hanao tanim-boaloboka; eny, handry fahizay izy amin’ny anatanterahako ny fitsarana ireo rehetra manodidina azy izay manao tsinontsinona azy; ka dia ho fantatra fa Izaho no Jehovah Andriamaniny.

Toko 29

• 1[Ny hamaliana an’i Farao sy ny vahoakany ary ny taniny] Tamin’ny andro faharoa ambin’ny folo tamin’ny volana fahafolo tamin’ny taona fahafolo dia tonga tamiko ny tenin’i Jehovah nanao hoe:
• 2Ry zanak’olona, manandrifia an’i Farao, mpanjakan’i Egypta, ka maminania ny hamelezana azy mbamin’i Egypta rehetra.
• 3Mitenena, ka ataovy hoe: Izao no lazain’i Jehovah Tompo: Indro, avy hamely anao Aho, ry Farao, mpanjakan’i Egypta, ilay dragona* makadiry mamitsaka ao amin’ny Neiliny, dia ilay efa nanao hoe: Ahy ny Neiliko, fa izaho no namorona azy ho an’ny tenako.[Na: mamba]
• 4Ary hasiako farango ny valanoranonao, sady hampiraiketiko amin’ny kiranao ny hazandrano ao amin’ny Neilinao, dia hampiakariko avy eo afovoan’ny Neilinao ianao, ary ny hazandrano rehetra amin’ny Neilinao dia hiraikitra amin’ny kiranao.
• 5Ary hariako any an-efitra ianao, dia ianao sy ny hazandrano rehetra avy amin’ny Neilinao; hitsitsitra eny an-tanety ianao ka tsy hovorina na hangonina; Efa nomeko hohanin’ny bibi-dia sy ny voro-manidina ianao.
• 6dia ho fantatry ny mponina rehetra any Egypta fa Izaho no Jehovah, satria efa tehina volotara ho an’ny taranak’Isiraely izy.
• 7(Nony mandray anao amin’ny tànany izy, dia folaka ianao, ka voatsindronao ny helik’izy rehetra; Ary nony mitehina aminao izy, dia tapaka ianao ka mampilefidefitra ny valahan’izy rehetra.)
• 8Dia izao no lazain’i Jehovah Tompo: Indro, hahatonga sabatra hamely anao Aho, ka hofongorako tsy ho aminao ny olona sy ny biby.
• 9Ary ny tany Egypta ho rava sy lao; Ka dia ho fantatra fa Izaho no Jehovah. Satria hoy izy: Ahy Neily, ary izaho no nanao azy,
• 10Dia, indro, avy hamely anao sy ny Neilinao Aho, ary ny tany Egypta hataoko lao tokoa, eny, sady ho lao no ho rava, hatrany Migdola ka hatrany Syena, dia hatramin’ny sisin’i Etiopia.
• 11Tsy hodiavin-tongotr’olona ny tany, ary ny tongo-biby aza tsy handia azy, sady tsy honenana efa-polo taona izy.
• 12Ary hataoko tany rava dia rava* ny tany Egypta, ary ho lao dia ho lao** efa-polo taona ny tanànany; Eny, haeliko ho any amin’ny firenena samy hafa ny Egyptiana, ary hahahako any amin’ny tany samy hafa.[**Heb. rava ao amin’ny tany rava][**Heb. lao amin’ny tanàna lao]
• 13Fa izao no lazain’i Jehovah Tompo: Rehefa afaka efa-polo taona, dia hangoniko avy any amin’ny firenena izay nielezany ny Egyptiana:
• 14Ary haveriko avy amin’ny fahababoany izy, ka hampodiko any amin’ny tany Patrosa, tany nihaviany, izy; Ary ho fanjakana ambany Egypta;
• 15Eny, ho ambany noho ny fanjakana hafa izy ka tsy hisandratra ambonin’ny firenena hafa intsony; Fa hohakeleziko izy ka tsy hampanompo ny firenena intsony.
• 16Dia tsy ho tokin’ny taranak’Isiraely intsony izy ho fampahatsiarovana ny helony amin’ny andehanan’ireo hanaraka azy; Ka dia ho fantatra fa Izaho no Jehovah Tompo.
• 17[Ny babo azon’i Nebokadnezara tany Egypta ho karaman’ny miaramilany noho ny fahasasarany tany Tyro] Ary tamin’ny andro voalohany tamin’ny volana voalohany tamin’ny taona fahafito amby roa-polo dia tonga tamiko ny tenin’i Jehovah nanao hoe:
• 18Ry zanak’olona, mafy ny fanompoana izay nampanaovin’i Nebokadnezara, mpanjakan’1 Babylona, ny miaramilany tamin’ny namelezany an’i Tyro, ka efa samy tonga sola avokoa ny lohany, sady niendaka ny sorony, nefa tsy nahazo karama avy tany Tyro izy sy ny miaramilany noho ny fanompoana izay nataony tamin’ny namelezany azy.
• 19Koa izao no lazain’i Jehovah Tompo: Indro, homeko an’i Nebokadnezara, mpanjakan’i Babylona, ny tany Egypta, dia halainy ny hareny, ary hobaboiny izay hita ao, ka hataony sambotra izay azo ao, koa izany no ho karaman’ny miaramilany.
• 20Ho valin’ny fanompoana nataony tany Tyro no nanomezako azy ny tany Egypta, satria nataony ho Ahy izany, hoy Jehovah Tompo.
• 21Amin’izany andro izany dia hampitsimoka tandroka ho an’ny taranak’Isiraely Aho, ary hampiloahiko vava eo aminy ianao; ka dia ho fantatra fa Izaho no Jehovah.

Toko 30

• 1[Ny andro hitsarana an’i Egypta] Ary tonga tamiko ny tenin’i Jehovah nanao hoe:
• 2Ry zanak’olona, maminania, ka ataovy hoe: Izao no lazain’i Jehovah Tompo: Midradradradrà ianareo! Indrisy ny andro!
• 3Fa efa antomotra ny andro, eny, antomotra ny andron’i Jehovah, dia andro mandrahona sy fotoana hamaliana ny jentilisa izany.
• 4Ary hisy sabatra tonga any Egypta sy fangorohoroana fatratra any Etiopia, raha miampatrampatra any Egypta ny voatrabaka; Ary ho lasa ny hareny, sady ho rava ny fanorenany.
• 5Etiopia sy Libya* sy Lydia** sy ny olona samy hafa firenena rehetra sy ny Kobiana sy ny zanaky ny tany vita fanekena dia hiaraka ho lavon-tsabatra aminy.[*Heb. Pota][**Heb. Loda]
• 6Izao no lazain’i Jehovah: Ho lavo koa izay manohana an’i Egypta, ary hietry ny fiavonavonan’ny heriny; Hatrany Migdola ka hatrany Syena no ho lavon-tsabatra izy, hoy Jehovah Tompo.
• 7Ho rava dia ho rava* izy, ary ny tanànany ho lao dia ho lao**.[*Heb. rava ao amin’ny tany rava][**Heb. lao ao amin’ny tanàna lao]
• 8Ka dia ho fantatra fa Izaho no Jehovah, raha mampirehitra afo any Egypta Aho, ka torotoro izay rehetra manampy azy.
• 9Amin’izany andro izany dia hisy iraka mivoaka avy amiko handeha an-tsambo hampahatahotra ny Etiopiana izay mitoetra tsy manahinahy, ka dia hangorohoro tahaka ny tamin’ny andro namelezana an’i Egypta izy; Fa, indro, avy izany.
• 10Izao no lazain’i Jehovah Tompo: Ny tànan’i Nebokadnezara, mpanjakan’i Babylona, no ho entiko mahafoana ny horakorak*’i Egypta.[Na. mandevona ny hareny]
• 11Izy sy ny vahoakany manaraka azy, dia ireo masiaka indrindra amin’ny firenena, no ho entina handrava ny tany; Ary hanatsoaka ny sabany hamely an’i Egypta ireny, ka ho feno faty ny tany.
• 12Hahatankina an’i Neily sy hivarotra ny tany ho eo an-tànan’ny ratsy fanahy Aho, ary ny tanan’ny fahavalo no ho entiko mandrava ny tany mbamin’izay rehetra ao aminy; Izaho Jehovah no niteny izany.
• 13Izao no lazain’i Jehovah Tompo: Horavako koa ny sampy, ary hatsahatro ny andriamani-tsi-izy ao Memfisa*; ary tsy hisy mpanjaka intsony amin’ny tany Egypta;[Heb. Nofa]
• 14Handrava an’i Patrosa Aho sy hampirehitra afo any Zoana, ary hotanterahiko ny fitsarana an’i No;
• 15Hampidina ny fahatezerako amin’i Sina, fiarovana mafy any Egypta, Aho, ary hofongorako ny vahoaka be any No.
• 16Hampirehitra afo any Egypta Aho; Hiolanolana fatratra Sina noho ny faharariany; Ho banga No, ary Memifisa* dia hasian’ny fahavalo antoandro.[Heb. Nofa]
• 17Ny zatovon’i Avena sy Pi-beseta ho lavon-tsabatra, sady ho lasan-ko babo ny ao.
• 18Any Tapanesa dia ho maizina ny andro, raha tapahiko any ny ziogan’i Egypta, ary hitsahatra ny fiavonavonan’ny heriny; Ho voasaron’ny rahona izy, sady ho lasan-ko babo ny zananivavy.
• 19Toy izany no hanatanterahako ny fitsarana an’i Egypta; Ka dia ho fantatra fa Izaho no Jehovah.
• 20[Ny hahafoanan’i Nebokadnezara ny herin’Farao] Ary tamin’ny andro fahafito tamin’ny volana voalohany tamin’ny taona fahiraika ambin’ny folo dia tonga tamiko ny tenin’i Jehovah nanao hoe:
• 21Ry zanak’olona, ny sandrin’i Farao, mpanjakan’i Egypta, dia efa notorotoroiko, ary he! tsy noharatoina mba ho sitrana izy, na nofehezina lamba, mba hanatanjaka azy hahatan-tsabatra.
• 22Koa izany no nanaovan’i Jehovah Tompo hoe: Indro, efa hamely an’i Farao, mpanjakan’i Egypta, Aho, ka hotorotoroiko ny sandriny, na ny mbola matanjaka, na ny efa torotoro; Ary hampilatsaka ny sabatra eny an-tànany Aho.
• 23Dia haeliko ho any amin’ny firenena samy hafa ny Egyptiana, ka hahahako any amin’ny tany samy hafa.
• 24Fa hampahatanjahiko kosa ny sandrin’ny mpanjakan’i Babylona, ka hataoko eny an-tànany ny sabatro; Fa hotorotoroiko ny sandrin’i Farao, dia hitrona eo anatrehany toy ny fitronan’ny voatrabaka izy.
• 25Eny, hampahatanjahiko ny sandrin’ny mpanjakan’i Babylona, dia hiraviravy ny sandrin’i Farao: Ka dia ho fantatra fa Izaho no Jehovah, raha hataoko eny an-tànan’ny mpanjakan’i Babylona ny sabatro, ka haingainy hamelezana ny tany Egypta.
• 26Dia haeliko ho any amin’ny firenena samy hafa ny Egyptiana ka hahahako any amin’ny tany samy hafa; Ka dia ho fantatra fa Izaho no Jehovah.

Toko 31

• 1[Ny nanetrena an’i Asyria atao fananarana an’i Egypta] Ary tamin’ny andro voalohany tamin’ny volana fahatelo tamin’ny taona fahiraika ambin’ny folo dia tonga tamiko ny tenin’i Jehovah nanao hoe:
• 2Ry zanak’olona, ataovy amin’i Farao, mpanjakan’i Egypta, sy amin’ny vahoakany maro be hoe: Tahaka an’iza moa ianao amin’ny fahalehibiazanao ?
• 3Indro, Asyria dia sedera tsara rantsana any Libanona ary misandrahaka manalokaloka sady mijoroaka avo, ka mitehika amin’ny rahona matevina ny tendrony.
• 4Ny rano no nahalehibe azy, eny, ny rano lalina no nampijoroaka azy, ary ny ranovelona no nandeha manodidina ny tany nambolena azy ka nampandeha ny lakan-dranony hankamin’ny hazo rehetra any an-tsaha.
• 5Koa dia nijoroaka ho avo noho ny hazo rehetra any an-tsaha izy, ary nihamaro ny sampany sady nihalava ny rantsany noho ny habetsahan’ny rano tamin’ny fisandrahany.
• 6Teo amin’ny sampany no nanaovan’ny voro-manidina rehetra akany; Ary teo ambanin’ny rantsany no niterahan’ny bibi-dia rehetra; Sady teo amin’ny alokalony no nitoeran’ny firenena malaza rehetra.
• 7Ka dia tsara tarehy tamin’ny fahalehibiazany sy ny halavan’ny sampany izy; Fa tany amin’ny rano maro ny fakany.
• 8Tsy nahatakona azy ny sedera tao amin’ny sahan’Andriamanitra; Tsy mba nahatoraka ny sampany ny hazo kypreso, tsy mba nanana rantsana tahaka azy ny hazo platana; Ary tsy nisy tsara tarehy tahaka azy ny hazo rehetra tany amin’ny sahan’Andriamanitra.
• 9Nohatsaraiko tamin’ny haben’ny rantsany ny tarehiny; Ka dia nialona azy ny hazo rehetra tany Edena, dia ireo tany amin’ny sahan’Andriamanitra.
• 10Koa izany no nanaovan’i Jehovah Tompo hoe: Satria nijoroaka avo izy* ka nanandratra ny lohany teo amin’ny rahona matevina, ary nirehareha ny fony noho ny hahavony,[Heb. ianao]
• 11Dia hatolotro eo an-tànan’ilay mahery amin’ny firenena izy; Hamely azy tokoa io; Noho ny faharatsiany no nandroahako azy.
• 12Ary izay fahavalo masiaka indrindra amin’ny firenena no nanapaka azy sady nanary azy; Teny an-tendrombohitra sy teny amin’ny lohasaha rehetra no nihahafan’ny sampany, ary notapatapahina teny amoron’ny ony rehetra amin’ny tany ny rantsany; Ary nidina niala tamin’ny alokalony ny firenena rehetra ka nahafoy avy.
• 13Mipetraka eo amin’ny vatany nianjera ny voro-manidina rehetra, ary eny amin’ny sampany ny bibi-dia rehetra,
• 14Mba tsy hisy hiavonavona intsony noho ny hahavony ny hazo rehetra eny amoron’ny rano, na hanandratra ny lohany ho eo amin’ny rahona matevina, sady tsy hisy hitoky amin’ny hahavony intsony ny hazo mifo-drano rehetra; Fa voatolotra ho faty izy rehetra ho any ambanin’ny tany, ho ao amin’ny zanak’olombelona, dia any amin’izay midina any an-davaka.
• 15Izao no lazain’i Jehovah Tompo: Tamin’ny andro nidinany ho any amin’ny fiainan-tsi-hita* dia nampanao fisaonana Aho: Nanarona ny rano lalina noho ny aminy Aho sady nanampina ny ony avy aminy, ka dia najanona ny rano maro; Nampisaoniko Libanona noho ny aminy, ka nalazo noho izany ny hazo rehetra tany an-tsaha.[Heb. sheola]
• 16Tamin’ny fiezinezin’ny fianjerany dia nampihorohoroiko ny firenena, raha nampidiniko ho any amin’ny fiainan-tsi-hita* izy, ho naman’izay midina any an-davaka; Ary ny hazo rehetra any Edena, dia ny nojobonina sady soa indrindra any Libanona, dia izay mifo-drano rehetra, samy nampionona ny tenany any ambanin’ny tany,[Heb. sheola]
• 17Ireo koa dia niara-nidina taminy ho any amin’ny fiainan-tsi-hita*, ho any amin’izay voatrabaky ny sabatra, mbamin’ireo izay efa sandriny teo, ka nipetraka teo ambanin’ny alokalony teo amin’ny firenena.[Heb. sheola]
• 18Tahaka an’iza amin’ny hazo any Edena moa ianao amin’izao voninahitra sy fahalehibiazana izao? Hampidinina ho any ambanin’ny tany miaraka amin’ny hazo any Edena ianao; Eo amin’ny tsy voafora no hiamparanao, dia eo amin’izay voa-trabaky ny sabatra. Farao sy ny vahoakany maro be rehetra izany, hoy Jehovah Tompo.

Toko 32

• 1[Fitomaniana noho ny nanjo an’i Farao sy ny vahoakany] Ary tamin’ny andro voalohany tamin’ny volana faharoa ambin’ny folo tamin’ny taona faharoa ambin’ny folo dia tonga tamiko ny tenin’i Jehovah nanao hoe:
• 2Ry zanak’olona, manaova hira fahalahelovana ny amin’i Farao, mpanjakan’i Egypta, ka ataovy aminy hoe: Nanao ny tenanao ho tahaka ny liona tanora tamin’ny firenena ianao, kanjo tahaka ny dragona* ao anatin’ny rano be; Ary nitsoriaka teny amin’ny oninao ianao dia nanakobankobana ny rano tamin’ny tongotrao ka nahaloto ny ony.[Na. mamba]
• 3Izao no lazain’i Jehovah Tompo: Ny firenena betsaka tafatambatra no ho entiko mamelatra ny haratoko aminao, ary hakarin’ireny amin’ny haratoko ianao,
• 4Dia hatsipiko eny an-tanety ianao ary hariako any an-tsaha, dia hampitangoroniko eo aminao ny voro-manidina rehetra, ary homeko hivokisan’ny bibi-dia rehetra ny tenanao.
• 5Haeliko eny an-tendrombohitra ny nofonao, ary hofenoiko ny tenabenao* ny lohasaha.[Heb. hahavonao]
• 6Hataoko safotry ny rànao ny tany Hatramin’ny tendrombohitra aza; Ary ho feno anao ny ony.
• 7Ary raha hovonoiko ny fahazavanao, dia hosaronako ny lanitra: Hotafiako lamba fisaonana ny kintany; Ny masoandro hotakonako rahona, ary ny volana tsy hangarangarana.
• 8Eny, ireny fanazavana eny amin’ny lanitra ireny dia hotafiako lamba fisaonana avokoa noho ny aminao, ary hosaronako aizina ny taninao, hoy Jehovah Tompo.
• 9Hataoko mitebiteby koa ny fon’ny firenena maro, raha hampandrenesiko ny firenena maro ny naharavanao, dia any amin’ny tany izay tsy fantatrao
• 10Eny, hataoko talanjona anao ny firenena maro, Ary hipararetra noho ny aminao ny mpanjakany, raha hantsodiko eo imasony ny sabatro, ary samy hangovitra lalandava izy amin’ny fanahiany ny ainy, raha mby amin’ny andro haharavanao.
• 11Fa izao no lazain’i Jehovah Tompo: Ny sabatry ny mpanjakan’i Babylona dia ho tonga aminao.
• 12Ny sabatry ny mahery, izay samy masiaka indrindra amin’ny firenena, ho entiko mandavo ny vahoakanao maro be, dia horavany ny reharehan’i Egypta, ka ho fongotra ny vahoakany maro be rehetra.
• 13Haringako koa ny biby fiompiny rehetra eny amoron’ny rano maro, ary tsy hanakobankobana azy intsony ny tongotry ny olona, na handoto azy ny kitron’ny biby fiompy.
• 14Dia hahenako* ny ranony, ary hampandehaniko toy ny diloilo ny oniny, hoy Jehovah Tompo,[Na. hampandriko hadio]
• 15Raha hataoko lao ny tany Egypta, ka hofoanako tsy hisy na inona na inona izay nahafeno azy teo; Ary haringako ny monina rehetra ao aminy, dia ho fantatra fa Izaho no Jehovah.
• 16Izany no hira fahalahelovana hataon’ny olona; Ny zanakavavin’ny firenena no hihira izany; Eny, ho fahalahelovana an’i Egypta sy ny vahoakany maro be rehetra no hihirany izany, hoy Jehovah Tompo.
• 17Ary tamin’ny andro fahadimy ambin’ny folo tamin’ny volana tamin’ny taona faharoa ambin’ny folo dia tonga tamiko ny tenin’i Jehovah nanao hoe:
• 18Ry zanak’olona, isaony ny vahoaka maroben’i Egypta, ary ampidino izy mbamin’ny zanakavavin’ny firenena malaza ho any ambanin’ny tany, miaraka amin’izay midina any an-davaka.
• 19Mihoatra noho ny an’iza moa ny hatsaran-tarehinao? Midina, ka miampara* amin’izay tsy voafora.[Heb. mandria]
• 20Any amin’ny voatrabaky ny sabatra no hiampatramparany; Ny sabatra dia efa voatolotra; Tariho izy mbamin’ny vahoakany maro be rehetra.
• 21Izy sy ny nanampy azy no resahin’ireo malaza amin’ny lehilahy mahery any amin’ny fiainan-tsi-hita* manao hoe: Tafidina ka miampatra ny tsy voafora, dia ireo voatrabaky ny sabatra.[Heb. Sheola]
• 22Ao koa Asyria mbamin’ny vahoakany maro be rehetra; Manodidina azy ny fasany; Voatrabaka izy rehetra, samy lavon’ny sabatra;
• 23Efa natao any am-paravodi-lavaka ny fasany, ary ny vahoakany maro be dia manodidina ny fasany; Voatrabaka izy rehetra, samy lavon’ny sabatra, dia ireo izay nahatonga tahotra tany amin’ny tanin’ny velona.
• 24Ao koa Elama mbamin’ny vahoakany maro be rehetra manodidina ny fasany; Voatrabaka izy rehetra, samy lavon’ny sabatra, ka tafidina tsy voafora ho any ambanin’ny tany, dia ireo nahatonga ny fahatahorana azy tany amin’ny tanin’ny velona, ary samy mitondra henatra miaraka amin’izay midina any an-davaka.
• 25Teo amin’ny voatrabaka no nanaovana fandriana ho azy mbamin’ny vahoakany maro be rehetra; Manodidina azy ny fasany, izy rehetra samy tsy voafora sady voatrabaky ny sabatra, fa efa niely tany amin’ny tanin’ny velona ny fahatahorana azy, ary samy mitondra henatra miaraka amin’izay midina any an-davaka izy; Ao amin’ny voa-trabaka no nametrahany azy.
• 26Ao koa Meseka-tobala mbamin’ny vahoakany maro be rehetra; Manodidina azy ny fasany; Samy tsy voafora izy rehetra sady voatrabaky ny sabatra, satria nahatonga ny fahatahorana azy tany amin’ny tanin’ny velona izy.
• 27Ary tsy hiara-miampatra* amin’ny lehilahy mahery izay lavo isan’ny tsy voafora izy, dia ireo tafidina any amin’ny fiainan-tsi-hita** ka mitondra ny fiadiany, sady voapetraka eo ambanin’ny lohany ny sabany. Ary ao amin’ny taolany ny helony, satria nampahatahotra ny mahery tany amin’ny tanin’ny velona izy.[*Heb. mandry][**Heb. Sheola]
• 28Eny, ianao dia haripaka ao amin’ny tsy voafora ka hiara-miampatra* amin’ny voatrabaky ny sabatra.[Heb. mandry]
• 29Ao koa Edoma mbamin’ny mpanjakany sy ny mpanapaka rehetra tao aminy, Izay natao ao amin’ny voatrabaky ny sabatra, na dia be aza ny heriny, miara-miampatra* amin’ny tsy voafora izy sy amin’izay midina any an-davaka.[Heb. mandry]
• 30Ao koa ireo andrianan’ny avaratra rehetra sy ny Sidoniana rehetra, izay niara-nidina tamin’ny voatrabaka menatra izy, na dia efa natahorana noho ny heriny aza, ary miampatra* tsy voafora ao amin’izay voatrabaky ny sabatra izy ka mitondra henatra ao amin’izay midina any an-davaka.[Heb. mandry]
• 31Ireny dia ho hitan’i Farao, ka dia hionona izy ny amin’ny vahoakany maro be. Voatrabaky ny sabatra parao mbamin’ny miaramilany rehetra, hoy Jehovah Tompo.
• 32Fa efa nahatonga ny fahatahorana azy* tany amin’ny tanin’ny velona Aho; Ary Farao dia halevina** ao amin’ny tsy voafora, miaraka amin’ireo voatrabaky ny sabatra, dia Farao mbamin’ny vahoakany maro be rehetra, hoy Jehovah Tompo.[*Na. Ahy][**Heb. hampandrina]

Toko 33

• 1[Fananterana ny nanendrena an’i Ezekiela ho mpaminany] Ary tonga tamiko ny tenin’i Jehovah nanao hoe:
• 2Ry zanak’olona, mitenena amin’ny zanaky ny firenenao, ka lazao aminy hoe: Raha mahatonga sabatra amin’ny tany anankiray Aho, ary ny tompon-tany maka lehilahy anankiray ao aminy ka manendry azy ho mpitily,
• 3ary hitan-dralehilahy fa, indro, avy ny sabatra, ka mitsoka ny anjomara hampitaitra* ny olona izy,[Heb. hananatra]
• 4nefa tsy mety taitr izay mandre ny feon’ny anjomara, dia tonga ny sabatra ka mandripaka azy, dia ho eo an-dohany ihany ny ràny.
• 5Nandre ny feon’ny anjomara ihany izy, nefa tsy nety taitra*; ho ao aminy ihany ny ràny; fa raha nety taitra izy, dia ho nahavonjy ny ainy ihany.[Heb. tsy nino anatra]
• 6Fa raha hitan’ilay mpitily kosa fa, indro, avy ny sabatra, nefa tsy nitsoka ny anjomara izy, ka tsy notairina ny olona, ary tonga ny sabatra ka mandringana olona ao aminy, dia matin’ny helony ihany iny; nefa ny ràny dia hadiniko amin’ny tànan’ilay mpitily.
• 7Koa ianao, ry zanak’olona, dia efa notendreko ho mpitily ho an’ny taranak’Isiraely, ka raha mandre ny teny aloaky ny vavako ianao, dia izany no ho entinao mananatra azy.
• 8Raha hoy Izaho amin’ny ratsy fanahy: He! ry ilay ratsy fanahy, ho faty tokoa ianao! nefa tsy mety mananatra azy ianao hiala amin’ny alehany, dia ho fatin’ny helony ihany izany ratsy fanahy izany, fa ny ràny dia hadiniko amin’ny tananao.
• 9Fa raha mananatra ny ratsy fanahy ihany kosa ianao hiala amin’ny lalany ratsy; fa izy no tsy mety miala amin’izany, dia ho fatin’ny helony ihany izy, nefa voavonjinao ny ainao.
• 10Ary ianao, ry zanak’olona, mitenena amin’ny taranak’Isiraely hoe: Izao no fiteninareo: Eto aminay ny fahadisoanay sy ny fahotanay, ka mihalevona amin’izany izahay, dia nahoana no mbola velona izahay?
• 11Lazao aminy hoe: Raha velona koa Aho, hoy Jehovah Tompo, dia tsy sitrako ny hahafatesan’ny ratsy fanahy, fa ny hialan’ny ratsy fanahy amin’ny lalany, mba ho velona izy. Mialà, mialà amin’ny lalan-dratsinareo, fa nahoana moa no te-ho faty ianareo, ry taranak’Isiraely?
• 12Ary ianao, ry zanak’olona’lazao amin’ny zanaky ny firenenao hoe: Ny fahamarinan’ny marina tsy hahavonjy azy, raha mby amin’ny andro ahadisoany; ary ny faharatsian’ny ratsy fanahy tsy hahavoa azy, raha mby amin’ny andro ialany amin’ny faharatsiany; ary ny marina tsy ho velona noho ny fahamarinany, raha mby amin’ny andro anotany.
• 13Raha lazaiko amin’ny marina hoe: Ho velona tokoa ianao*, nefa izy mitoky amin’ny fahamarinany ka manao meloka, dia tsy hotsarovana ny fahamarinana rehetra izay nataony, fa ny heloka nataony no hahafaty azy.[Heb. izy]
• 14Ary koa, raha hoy Izaho kosa amin’ny ratsy fanahy: Ho faty tokoa ianao*, nefa miala amin’ny fahotany izy sady manao izay marina sy mahitsy.[Heb. izy]
• 15ka mamerina ny natao tsatòka sady mampody izay nangalariny ary mandeha araka ny didy mahavelona ka tsy manao meloka, dia ho velona tokoa izy, fa tsy ho faty.
• 16Ny fahotana rehetra izay nataony dia tsy hotsarovana aminy intsony; manao izay marina sy mahitsy izy, ka dia ho velona tokoa.
• 17Kanefa, hoy ny zanaky ny firenenao: Tsy marina ny fitondran*’ny Tompo; nefa ny fitondran*’ny tenany no tsy marina.[Heb. lalan’]
• 18Raha ny marina miala amin’ny fahamarinany ka manao meloka, dia ho faty amin’izany izy.
• 19Ary raha ny ratsy fanahy miala amin’ny faharatsiany ka manao izay marina sy mahitsy, dia ho velona amin’izany izy.
• 20Kanefa, hoy ianareo: Tsy marina ny fitondran*’ny Tompo. He! ry taranak’Isiraely, samy hotsaraiko araka ny alehany avy ianareo.[Heb. lalan’]
• 21[Ny nisokafan’ny vavan’i Ezekiela taorian’ny nandravana an’i Jerosalema haminany izay mbola hanjo ny Isiraely noho ny tsi-fibebahany] Ary nony tamin’ny andro fahadimy tamin’ny volana fahafolo tamin’ny taona faharoa ambin’ny folo taorian’ny namaboana antsika, dia nisy olona efa nandositra avy tany Jerosalema tonga tao amiko ka nanao hoe: Afaka ny tanàna.
• 22Dia efa tonga tamiko ny tànan’i Jehovah tamin’ny omaly harivan’ny andro nahatongavan’ilay nandositra izay tonga tao amiko, ka nosokafany ny vavako mandra-pahatongan’ilay nandositra, izay tonga tao amiko nony maraina; dia efa nisokatra ny vavako, ka tsy moana intsony aho.
• 23Dia tonga tamiko ny tenin’i Jehovah nanao hoe:
• 24Ry zanak’olona, ny monina amin’ireny rava amin’ny tanin’ny Isiraely ireny dia manao hoe: Ireny ihany Abrahama, nefa nandova ny tany izy, fa isika kosa dia maro, ary omena antsika ny tany ho lovantsika
• 25Koa lazao aminy hoe: Izao no lazain’i Jehovah Tompo: Homan-javatra misy rà sady miandrandra ny sampinareo ianareo ary mandatsa-drà, moa hahazo handova ny tany va ianareo?
• 26Mitoky amin’ny sabatrareo ianareo sady manao fahavetavetana, ka samy mandoto ny vadin’ny namany avy; koa hahazo handova ny tany va ianareo?
• 27Izao no holazainao aminy: Izao no lazain’i Jehovah Tompo: Raha velona koa Aho, dia tsy maintsy ho lavon’ny sabatra izay ao amin’ny tanàna rava, ary izay any an-tsaha dia homeko ho rembin’ny bibi-dia, ary izay ao amin’ny harambato* sy amin’ny lava-tany dia ho fatin’ny areti-mandringana.[Heb. fiarovana]
• 28Fa hataoko rava sy lao ny tany, ary hitsahatra ny fiavonavonan’ny heriny; ho lao ny tendrombohitry ny Isiraely, ka tsy hisy mpandia azy.
• 29Dia ho fantany fa Izaho no Jehovah, raha hataoko rava sy lao ny tany noho ny fahavetavetana nataony.
• 30Ary ianao, ry zanak’olona, ny zanaky ny firenenao dia miresaka anao eny am-bodirindrina sy eo am-baravaran’ny tranony, ka samy manao amin’ny rahalahiny hoe: Andeha isika, ary aoka handre izay teny avy amin’i Jehovah.
• 31Dia mankao aminao tahaka ny fihavin’ny olona izy ka mipetraka eo anatrehanao toa oloko ary mahare ny teninao, nefa tsy mety mankatò azy; fa, indro, teny mamy no lazain’ny vavany*, nefa ny fony dia lasa manaraka ny filan-karena.[Na: izay mamy am-bavany no lazainy; na: kalokalo no ataon’ny vavany]
• 32Koa, indro, ianao dia ataony ho tahaka ny mpanao hira mahafinaritra*, izay tsara feo sady mahay mitendry; fa mandre ny teninao izy, nefa tsy mety mankatò azy.[Na: kalokalo]
• 33Ary nony tanteraka izany (indro, efa ho tanteraka ihany), dia ho fantany fa efa nisy mpaminany tokoa tao aminy.

Toko 34

• 1[Ny amin’ny mpiandry ondry ratsy fanahy, sy ny mbola hanangonana ny ondry, ary ny hanendrena mpiandry tsara hiandry azy] Ary tonga tamiko ny tenin’i Jehovah nanao hoe:
• 2Ry zanak’olona, maminania ny hamelezana ny mpiandry ny Isiraely, eny, maminania, ka ataovy aminy hoe: Izao no lazain’i Jehovah Tompo: Lozan’ny mpiandry ondrin’ny Isiraely izay mamahan-tena! Moa tsy ny ondry va no tokony handrasan’ny mpiandry?
• 3Ny taviny dia haninareo, ary ny volony tafinareo, ny nafahy vonoinareo; nefa ny ondry tsy mba andrasanareo.
• 4Tsy manatanjaka ny malemy ianareo, na manasitrana ny marary, na manamatra ny folaka, na mampody ny noroahina, na mikatsaka ny very; fa loza loatra ny fampanomponareo azy.
• 5Dia miely izy, satria tsy misy mpiandry; ary rehefa miely izy, dia tonga rembin’ny bibidia rehetra.
• 6Mirenireny eny an-tendrombohitra sy eny amin’ny havoana andrandraina rehetra ny ondriko; eny, any amin’ny tany rehetra no ielezan’ny ondriko, ary tsy misy mitady na miahy azy.
• 7Koa mihainoa ny tenin’i Jehovah ianareo, ry mpiandry ondry:
• 8Raha velona koa Aho, hoy Jehovah Tompo, noho ny nahababoan’ny ondriko sy ny nahatongavan’ny ondriko ho rembin’ny bibi-dia rehetra, satria tsy nisy mpiandry azy, fa tsy nitady ny ondriko ny mpiandry, fa ny mamahan-tena kosa no ataony, ka tsy namahana ny ondriko,
• 9dia mihainoa ny tenin’i Jehovah ianareo, ry mpiandry ondry.
• 10Izao no lazain’i Jehovah Tompo: Indro, avy hamely ny mpiandry ondry Aho, dia hampamoahiko ny amin’ny ondriko izy ka hesoriko tsy hiandry ny ondry intsony; dia tsy hamahan-tena intsony ny mpiandry ondry, fa hovonjeko eo amin’ny vavany ny ondriko mba tsy ho azony hohanina intsony.
• 11Fa izao no lazain’i Jehovah Tompo: Indro, Izaho, eny, Izaho no hiahy ny ondriko sy handinidinika azy.
• 12Toy ny fandinidiniko ny mpiandry ny ondriny amin’izay andro hahatratrarany ny ondriny izay efa niely, dia toy izany no handinidinihako ny ondriko sy hamonjeko azy avy any amin’izay rehetra efa nielezany tamin’ny andro mandrahona sy maizim-pito.
• 13Ary ho entiko mivoaka avy any amin’ny firenena izy ka hangoniko avy any amin’ny tany samy hafa, dia ho entiko ho any amin’ny taniny sy handrasako eny an-tendrombohitry ny Isiraely sy eny an-dohasahan-driaka izy ary eny amin’izay tsara honenana rehetra eran’ny tany.
• 14Eny amin’ny tany tsara ho fiandrasana no hiandrasako azy, ary eny an-tendrombohitra avon’ny Isiraely no ho tany hiandrasana azy; ao no handriany amin’ny tany tsara, ary eny amin’ny fiandrasana tsara ahitra* no hihinanany, dia any an-tendrombohitry ny Isiraely.[Heb. matavy]
• 15Izaho no hiandry ny ondriko, ary Izaho no hampandry azy, hoy Jehovah Tompo.
• 16Ny very hotadiaviko, ny voaroaka hampodiko, ny folaka hohamarako, ny malemy hohatanjahiko; fa ny matavy sy ny matanjaka kosa dia haringako ka handrasako amin’ny fitsarana.
• 17Ary ny aminareo, ry ondriko, izao no lazain’i Jehovah Tompo: Indro, hotsaraiko ny adin’ny ondry aman’osy, dia ny ady ataon’ny ondrilahy sy ny osilahy namany aminy.
• 18Moa ataonareo ho zavatra kely va ny nandanianareo ny ahitra tsara, no dia nohosihosen’ny tongotrareo ny ahitrareo sisa, ary ny efa nisotroanareo ny rano madio, no dia nolotoin’ny tongotrareo ny sisa?
• 19Ary ny amin’ny ondriko, moa izay voahosihosin’ny tongotrareo va no hohaniny, ary izay voaloton’ny tongotrareo va no hosotroiny?
• 20Koa izao no lazain’i Jehovah Tompo aminy: Indro, Izaho, eny, Izaho no hitsara ny adin’ny ondry matavy amin’ny ondry mahia.
• 21Satria ny tehezanareo sy ny sorokareo no entinareo manosika ny marary rehetra, ary ny tandrokareo no entinareo manoto azy mandra- pandronjinareo azy ho any ivelany;
• 22dia hovonieko ny ondriko, ary tsy ho babo intsony izy, ary hotsaraiko ny adin’ny ondry amin’ny ondry namany.
• 23Ary hanangana Mpiandry iray ho azy Aho, Izy no hiandry azy, dia Davida Mpanompoko, ka Izy no hitondra azy sy ho Mpiandry azy.
• 24Ary Izaho Jehovah no ho Andriamaniny, ary Davida Mpanompoko no ho Mpanapaka ao aminy. Izaho Jehovah no niteny izany.
• 25Ary hanao fanekem-pihavanana aminy Aho ka hampiala ny biby masiaka tsy ho eo amin’ny tany intsony, dia handry fahizay izy na dia any an-efitra aza, sady hatory na dia any anaty ala aza.
• 26Ary izy sy ny manodidina ny havoanako dia hataoko fitaziana, ary hampilatsaka ranonorana amin’ny fotoany Aho, dia ranonoram-pitahiana mivatravatra.
• 27Ary hamoa ny hazo any an-tsaha, sady hahavokatra ny tany, ary handry fahizay amin’ny tany izy; ka dia ho fantany fa Izaho no Jehovah, raha hotapahiko ny ziogany, ary hovonjeko amin’ny tànan’izay nampanompo azy izy.
• 28Ary tsy ho babon’ny jentilisa na ho rembin’ny bibi-dia intsony izy, fa handry fahizay, ary tsy hisy hanaitaitra azy.
• 29Ary hampaniry voly ho laza ho azy Aho, ka tsy ho ritry ny mosary amin’ny tany intsony izy, na hitondra ny latsan’ny jentilisa intsony;
• 30ka dia ho fantany fa Izaho, Jehovah Andriamaniny, no momba azy, ary izy, taranak’Isiraely, no oloko, hoy Jehovah Tompo.
• 31Ary ny aminareo ondriko ondry fiandriko olona ianareo, ary Izaho no Andriamanitrareo, hoy Jehovah Tompo.

Toko 35

• 1[Ny handravana an’i Edoma noho ny nandrafiany ny Isiraely] Ary tonga tamiko ny tenin’i Jehovah nanao hoe:
• 2Ry zanak’olona, manandrifia ny tendrombohitra Seïra, ka maminania ny hamelezana azy,
• 3dia ataovy aminy hoe: Izao no lazain’i Jehovah Tompo: Indro, avy hamely anao Aho, ry tendrombohitra Seïra, ary hahinjitro aminao ny tanako, ka hataoko foana sy lao ianao.
• 4Ny tanànanao hataoko korontam-bato, ary ianao ho lao; Ka dia ho fantatrao fa Izaho no Jehovah.
• 5Noho ny fandrafianao hatry ny fony ela sy ny nanoloranao ny zanak’Isiraely ho fatin*’ny sabatra, fony tamin’ny andro nahitany loza, dia ny fotoan’ny heloka mahafaty,[Heb. ho eo an-tànan’]
• 6Dia izao no lazain’i Jehovah: Raha velona koa Aho, dia hataoko manjary rà ianao, ary rà no hanenjika anao; Satria tsy nankahalainao ny rà, dia rà kosa no hanenjika anao.
• 7Hataoko foana sy lao ny tendrombohitra Seïra, sady hataoko tsy misy intsony ny mandroso sy ny miverina,
• 8Ary hofenoiko ny olony voavono ny tendrombohiny; Eny, ao amin’ny havoananao sy ny lohasahanao Ary amoron’ny lohasahan-driakanao rehetra no hiampatramparan’izay voatrabaky ny sabatra.
• 9Hataoko rava mandrakizay ianao, ary tsy honenana intsony ny tanànanao; Ka dia ho fantatrareo fa Izaho no Jehovah.
• 10Ary noho ny nanaovanao hoe: Ireto firenena roa ireto sy ireto tany roa ireto dia ho ahy avokoa, Ka hanana azy izahay kanefa teo ihany Jehovah
• 11Dia izao no lazain’i Jehovah: Raha velona koa Aho, dia hanao araka ny fahatezeranao sy ny fialonanao Aho, izay nataonao noho ny fandrafianao azy; Ary hampahafantariko ao aminy ny tenako amin’ny hitsarako anao.
• 12Ka dia ho fantatrao fa Izaho Jehovah no efa nandre ny fanaratsiana, izay nolazainao ny amin’ireny tendrombohitry ny Isiraely hoe: Foana ireny ka nomena anay ho fivelomanay.
• 13Ary nanao teny miavonavona namely Ahy ianareo sy nanamaro ny teninareo namely Aha; efa reko izany.
• 14Izao no lazain’i Jehovah Tompo: Rehefa mifaly ny tany rehetra, dia hofoanako kosa ianao,
• 15Toy ny nifalianao ny amin’ny lovan’ny taranak’Isirady, satria nofoanana ireny, dia toy izany kosa no hataoko aminao: Ho foana ianao, ry tendrombohitra Seïra sy Edoma rehetra; Ka dia ho fantatra fa Izaho no Jehovah.

Toko 36

• 1[Ny hitahian’i Jehovah ny tanin’ny Isiraely] Ary ianao, ry zanak’olona, maminania amin’ny tendrombohitry ny Isiraely, ka ataovy hoe: Ry tendrombohitry ny Isiraely, mihainoa ny tenin’i Jehovah:
• 2Izao no lazain’i Jehovah Tompo: Noho ny nanaovan’ny fahavalo anareo hoe: Hià! efa lasanay ny havoana fahagola!
• 3Dia maminania, ka lazao hoe: Izao no lazain’i Jehovah Tompo: Noho ny nandravany anareo sy ny nisafoahany nanenjika anareo avy amin’ny tany manodidina, ka dia efa lasan’ny jentilisa sisa ho fananany ianareo, sady efa nataon’ny molotry ny mpibedibedy fitenenana ka efa ambentinteny amin’ny firenena,
• 4Dia mihainoa ny tenin’i Jehovah Tompo, ry tendrombohitry ny Isiraely: Izao no lazain’i Jehovah Tompo amin’ny tendrombohitra sy ny havoana, ny lohasahan-driaka sy ny lohasaha ary amin’ny korontam-bato sy ny tanàna haolo, izay efa babo sy fandatsa ho an’ny firenena sisa amin’ny manodidina,
• 5Eny, izao no lazain’i Jehovah Tompo: Tamin’ny afon’ny  fahasaro-piaroko no nitenenako tokoa Namely ny firenena sisa sy Edoma rehetra, Izay nahalasa ny taniko ho fananany Tamin’ny hafalian’ny fony tokoa sy tamin’ny fanahy mamingavinga, mba hangoronany azy ho babo.
• 6Koa maminania ny amin’ny tanin’ny Isiraely, ka lazao amin’ny tendrombohitra sy ny havoana ary ny lohasahan-driaka sy ny lohasaha hoe: Izao no lazain’i Jehovah Tompo: (Indro, tamin’ny fahasaro-piaroko sy ny fahatezerako no nitenenako): Noho ny nitondranareo latsa tamin’ny firenena,
• 7Dia izao no lazain’i Jehovah Tompo: Izaho efa nanangan-tanana nanao hoe; Ny firenena manodidina anareo no hitondra henatra.
• 8Fa ianareo kosa, ry tendrombohitry ny Isiraely, dia hisandrahaka sy hahavokatra ho an’ny Isiraely oloko; Fa efa antomotra ny hihavian’ireny.
• 9Fa, indro, hitodika ho aminareo Aho ka hanatrika anareo; Dia hasaina sy hofafazana ianareo;
• 10Ary hahamaro ny olona eny aminareo Aho, dia ny taranak’Isiraely rehetra rehetra, ary honenana ny tanàna, ka haorina indray ny efa rava;
• 11Dia hampitombo olona sy biby fiompy eny aminareo Aho, ka hitombo sy hiteraka ireo; Hametrahako mponina tahaka ny taloha any aminareo, ary hanisy soa anareo mihoatra noho ny tamin’ny niandohanareo Aho; Ka dia ho fantatrareo fa Izaho no Jehovah.
• 12Eny, hampivoivoy olona eny aminareo Aho, dia ny Isiraely oloko; Dia hanana anareo* izy ka hahalasa anareo* ho lovany, ary tsy hahalany fara azy intsony ianareo**.[*Heb. anao][**Heb. ianao]
• 13Izao no lazain’i Jehovah Tompo: Noho ny nanaovany taminareo hoe: Hianao, ry tany, dia mandany olona, Sady mahalany fara ny firenenao,
• 14Dia tsy handany olona intsony ianao, na hahalavo ny firenenao intsony, hoy Jehovah Tompo.
• 15Ary hataoko tsy mahare ny latsan’ny jentilisa intsony ianao Sady tsy hitondra ny fanaratsian’olona intsony; Ary tsy hahalavo ny firenenao intsony ianao, hoy Jehovah Tompo.
• 16[Ny fifampiankinan’ny famonjena ny Isiraely sy ny fahamasinany] Ary tonga tamiko ny tenin’i Jehovah nanao hoe:
• 17Ry zanak’olona, ny taranak’Isiraely nonina tany amin’ny taniny, dia nandoto izany tamin’ny fanaony* sy tamin’ny asany izy; fa tahaka ny fahalotoan’ny vehivavy mararin’ny fadim-bolana no fahalotoan’ny fanaony* eo anatrehako.[Heb. lalany]
• 18Ka dia naidiko ho aminy ny fahatezerako mirehitra noho ny rà nalatsany teo amin’ny tany sy noho ny nandotoany izany tamin’ny sampiny.
• 19Ary naeliko ho any amin’ny firenena izy ka nahahaka ho any amin’ny tany samy hafa; araka ny fanaony* sy ny asany no nitsarako azy.[Heb. lalany]
• 20Ary nony tonga tany amin’ny firenena izay nalehany izy, dia tonga fandotoana ny anarako masina tamin’ny nanaovan’ny olona azy hoe: Ireo no olon’i Jehovah, nefa niala tamin’ny tanin’i Jehovah izy.
• 21Dia namindrako fo ny anarako masina, izay nolotoin’ny taranak’Isiraely tany amin’ny firenena izay nalehany.
• 22Koa atsovy amin’ny taranak’Isiraely hoe: Izao no lazain’i Jehovah Tompo: Tsy noho ny aminareo no anaovako izany, ry taranak’Isiraely, fa noho ny anarako, masina, izay nolotoinareo tany amin’ny jentilisa izay nalehanareo.
• 23Ary hohamasiniko ny anarako lehibe izay efa nolotoinareo tany amin’ny jentilisa, ka dia ho fantany fa Izaho no Jehovah, hoy Jehovah Tompo, rehefa miseho ho masina eo imasony Aho amin’ny ataoko aminareo.
• 24Fa halaiko avy any amin’ny jentilisa ianareo ary hangoniko avy any amin’ny tany rehetra ka ho entiko ho any amin’ny taninareo.
• 25Dia hofafazako rano madio ianareo, ka hadio; ny mba ho afaka amin’ny fahalotoanareo rehetra sy ny sampinareo rehetra no hanadiovako anareo.
• 26Ary homeko fo vaovao ianareo, ary fanahy vaovao no hataoko ao anatinareo, ary hesoriko amin’ny nofonareo ny fo vato, ka homeko fo nofo ianareo.
• 27Ary ny Fanahiko no hataoko ao anatinareo, ka hahatonga anareo handeha araka ny lalàko sy hitandrina ny fitsipiko ka hanaraka azy.
• 28Ary honina any amin’ny tany izay nomeko ny razanareo ianareo, ka ho oloko ianareo, ary Izaho ho Andriamanitrareo.
• 29Ary hovonjeko ho afaka amin’ny fahalotoanareo rehetra ianareo, ary hantsoiko sy hataoko vokatra ny vary, ary tsy hanaterako mosary intsony ianareo;
• 30ary hataoko vokatra koa ny voankazo sy ny vokatry ny saha, mba tsy ho voalatsan’ny jentilisa amin’ny mosary intsony ianareo.
• 31Dia hotsarovanareo ny lalan-dratsinareo sy ny fanao tsy metinareo, ka dia haharikoriko anareo ny tenanareo noho ny fahadisoanareo sy ny fahavetavetanareo.
• 32Tsy noho ny aminareo no anaovako izany, hoy Jehovah Tompo aoka ho fantatrareo izany; koa menara sy mangaihaiza ianareo noho ny lalanareo, ry taranak’Isiraely.
• 33Izao no lazain’i Jehovah Tompo: Amin’ny andro hanadiovako anareo ho afaka amin’ny helokareo rehetra dia hametrahako mponina ao amin’ny tanana, ary haorina indray ny efa rava.
• 34Ary hasaina ny tany efa lao, fa tsy ho lao eo imason’ny mpandalo rehetra intsony izy.
• 35Fa holazainy hoe: Ity tany efa lao ity dia tonga tahaka ny saha Edena; ary ny tanàna efa foana sy lao dia misy mponina sady asiana manda;
• 36ka dia ho fantatry ny jentilisa sisa manodidina anareo fa Izaho Jehovah no manorina indray ny efa rava sy mamboly izay efa foana. Izaho Jehovah no niteny sady hahatanteraka izany.
• 37Izao no lazain’i Jehovah Tompo: Mbola hotadiavin’ny taranak’Isiraely Aho amin’ny hanaovako izao ho azy; hohamaroiko toy ny ondry ny olony.
• 38Toy ny ondry aman’osy masina, izay any Jerosalema amin’ny fotoam-pivavahana, dia toy izany no hahafenoan’ny tanànany efa lao amin’ny olona maro toy ny ondry aman’osy; ka dia ho fantatra fa Izaho no Jehovah.

Toko 37

• 1[Fanoharana ny amin’ny hampodiana ny Isiraely, sy ny hanakambanana azy ho firenena iray hanjakan’i Davida] Tao amiko ny tànan’i Jehovah, ary ny Fanahy no nitondran’i Jehovah ahy nivoaka, dia napetrany teo amin’ny lohasaha feno taolana aho.
• 2Ary nitondra ahy nandehandeha teny amin’ireo Izy; ary, indreo, betsaka dia betsaka teny amin’ny lohasaha ireo, ary, indreo, maina dia maina Ireo.
• 3Ary hoy Jebovah tamiko: Ry zanak’olona, moa mety ho velona ihany va ireto taolana ireto? Ary hoy izaho: Jehovah Tompo ô, Hianao no mahalala.
• 4Dia hoy indray Izy tamiko: Maminania amin’ireto taolana ireto, ka ataovy aminy hoe: Ry taola-maina, mihainoa ny tenin’i Jehovah!
• 5Izao no lazain’i Jehovah Tompo amin’ireto taolana ireto: Indro, hasiako fofonaina ianareo ka ho velona;
• 6ary hasiako ozatra ianareo ka hampaniriko nofo; ary hosaronako hoditra ianareo; ary hasiako fofonaina ianareo ka ho velona; ka dia ho fantatrareo fa Izaho no Jehovah.
• 7Dia naminany aho araka izay efa nandidiana ahy, ary nony efa naminany aho. dia injany! nisy feo, ary, indreo, nihetsiketsika sady nifanatonatona ny taolana, samy nanatona ny taolana namany avy.
• 8Ary hitako fa, indro, naniry ny ozatra sy ny nofo, ary nisarona hoditra izy, nefa tsy mbola nisy fofonaina tao aminy.
• 9Dia hoy Izy tamiko: Maminania amin’ny fofonaina, eny, maminania. ry zanak’olona, ka ataovy amin’ny fofonaina hoe: Izao no lazain’i Jehovah Tompo: Manatona avy amin’ny rivotra efatra, ry fofonaina, ka tsotsofy ireo voavono ireo, mba ho velona izy.
• 10Dia naminany araka izay efa nandidiany ahy aho, ka dia nidiran’ny fofonaina ireo ka velona, dia nijoro tamin’ny tongony izy maro be dia maro be tokoa.
• 11Dia hoy Izy tamiko: Ry zanak’olona, ireto taolana ireto dia ny taranak’Isiraely rehetra; indreo izy manao hoe: Maina ny taolanay, levona ny fanantenanay, fongotra izahay.
• 12Koa maminania, ka ataovy aminy hoe: Izao no lazain’i Jehovah Tompo: Indro, ry oloko, Izaho no hanokatra ny fasanareo, ary hampiakariko avy amin’ny fasanareo ianareo, ka ho entiko ho any amin’ny tanin’ny Isiraely;
• 13ka dia ho fantatrareo fa Izaho no Jehovah, raha manokatra ny fasanareo Aho, ry oloko, ka mampiakatra anareo hiala amin’ny fasanareo.
• 14Ary hataoko ao anatinareo ny Fanahiko, dia ho velona ianareo, ary hamponeniko any amin’ny taninareo ianareo; ka dia ho fantatrareo fa Izaho Jehovah no efa niteny sady nahatanteraka izany, hoy Jehovah.
• 15Ary tonga tamiko ny tenin’i Jehovah nanao hoe:
• 16Ary ianao, ry zanak’olona, dia mangalà tapa-kazo iray, ka asio soratra hoe: Ho an’ny Joda sy ho an’ny zanak’Isiraely namany; dia mangalà tapa-kazo anankiray koa, ka asio soratra hoe: Ho an’i Josefa dia tapa-kazon’i Efraima sy ho an’ny taranak’Isiraely namany rehetra.
• 17Ary ampifanatony izy roa ho tonga tapa-kazo iray ihany, dia ho iray eny an-tananao izy.
• 18Ary raha miteny aminao ny zanaky ny firenenao manao hoe: Moa tsy hilaza izay hevitrao amin’izany va ianao?
• 19dia ataovy aminy hoe: Izao no lazain’i Jehovah Tompo: Indro, Izaho haka ny tapa-kazon’i Josefa, izay eny an-tanan’i Efraima, sy ny firenen’ny Isiraely namany, ary hakambako ho eo amin’ny tapa-kazon’i Joda izy, ary hataoko tapa-kazo iray ihany izy ka ho tonga iray eny an-tanako.
• 20Ary ny tapa-kazo izay hasianao soratra dia ho eny an-tananao eo imasony.
• 21Dia lazao aminy hoe: Izao no lazain’i Jehovah Tompo: Indro, Izaho haka ny zanak’Isiraely avy any amin’ny jentilisa izay nalehany, eny, hangoniko avy any amin’ny manodidina any izy ka ho entiko ho any amin’ny taniny:
• 22ary hataoko ho firenena iray any amin’ny tany izy, dia any an-tendrombohitry ny Isiraely, ary mpanjaka iray ihany no ho mpanjakan’izy rehetra, ka tsy ho firenena roa intsony izy ary tsy hisaraka ho fanjakana roa intsony.
• 23Ary tsy handoto tena amin’ny sampiny, na amin’ny fahavetavetany, na amin’ny fahadisoany intsony izy; fa hovonjeko ho afaka amin’ny fonenany rehetra izay nanotany izy, ary hodioviko izy, ka dia ho oloko, ary Izaho ho Andriamaniny.
• 24Ary Davida Mpanompoko no ho Mpanjakany; ary hiray Mpiandry izy rehetra, dia handeha araka ny fitsipiko izy sady hitandrina ny lalàko sy hankatò izany.
• 25Ary honina any amin’ny tany izay nomeko an’i Jakoba mpanompoko izy, dia ilay efa nonenan’ny razanareo, ka honina any izy sy ny zanany mbamin’ny zafiny mandrakizay; ary Davida mpanompoko no ho Mpanapaka azy mandrakizay.
• 26Ary hanao fanekem-pihavanana ho azy Aho, ka ho fanekena mandrakizay eo aminy any, ary hametraka sy hahamaro azy Aho sady hametraka ny fitoerako masina eo aminy mandrakizay.
• 27Ary ny tabernakeliko ho eo aminy; ary Izaho ho Andriamaniny, ary izy ho oloko.
• 28Ka dia ho fantatry ny jentilisa fa Izaho Jehovah no manamasina ny Isiraely amin’ny isian’ny fitoerako masina eo aminy mandrakizay.

Toko 38

• 1[Ny handresena an’i Goga sy Magoga mbamin’ny firenena maro izay ho entiny hiady amin’ny Isiraely] Ary tonga tamiko ny tenin’i Jehovah nanao hoe:
• 2Ry zanak’olona, manandrifia an’i Goga avy any amin’ny tany Magoga, izay mpanjakan’i Rosy sy Meseka ary Tobala, ary maminania ny hamelezana azy,
• 3ka ataovy hoe: Izao no lazain’i Jehovah Tompo: Indro, avy hamely anao Aho, ry Goga, mpanjakan’i Rosy sy Meseka ary Tobala.
• 4Ary hitarika anao Aho ka hanisy masom-by ny valanoranonao, ary ho entiko mivoaka ianao sy ny tafikao rehetra, dia ny soavaly sy ny mpitaingin-tsoavaly, samy mitafy marevaka izy rehetra, dia olona maro be mitondra ampinga lehibe sy ampinga kely, ary samy mitan-tsabatra;
• 5miaraka aminy ny Persiana sy ny Etiopiana ary ny Libyana*, samy mitondra ampinga lehibe sy fiarovan-doha avokoa,[Heb. Pota]
• 6Gomera koa mbamin’ny miaramilany rehetra, ny taranak’i Togarma avy any amin’ny farany avaratra mbamin’ny miaramilany rehetra, dia firenena maro izay miaraka aminao.
• 7Miomana, ka mitaova tsara ianao, eny, ianao sy ireo momba anao izay efa mivory ao aminao, ary aoka ianao no ho mpitarika* azy.[Na: mpitandrina]
• 8Rehefa afaka andro maro, dia hotadiavina ianao, raha mby any am-parany, dia ho tonga any amin’ny tany izay novonjena ka afaka tamin’ny sabatra ianao, dia tany novorina avy tany amin’ny firenena maro, any an-tendrombohitry ny Isirady, izay efa lao hatry ny ela; fa efa navoaka avy tany amin’ny firenena izy, ka dia mandry fahizay izy rehetra.
• 9Eny, hiakatra ianao, ary ho tahaka ny fihavin’ny rivo-doza no hihavianao, ka ho tahaka ny rahona hanarona ny tany dia ianao sy ny miaramilanao rehetra mbamin’ny firenena maro izay miaraka aminao.
• 10Izao no lazain’i Jehovah Tompo: Amin’izany andro izany dia hisy eritreritra hiditra ao an-tsainao, ary hamoron-kevi-dratsy ianao
• 11ka hanao hoe: Hiakatra aho hamely ny tany izay misy tanàna tsy mimanda; hankamin’izay mandry fahizay sy mitoetra tsy manana ahiahy aho, samy, monina ao an-tanàna tsy misy manda na hidy na vavahady izy rehetra,
• 12mba hamabo sy handroba ary hamely indray izay efa rava, saingy vao misy mponina ankehitriny izao, ary ny firenena izay nangonina avy tany amin’ny jentilisa sady nihary omby sy fananana, dia ireo mitoetra ao amin’ny foiben’ny tany.
• 13Sheba sy Dedana ary ny mpandranton’i Tarsisy rehetra mbamin’ireo lionany tanora rehetra dia hanao aminao hoe: Tonga hamabo va ianao? Nangoninao handroba va ireto olonao betsaka ireto, hahalasa volafotsy sy volamena, handroba harena sy fananana ary hahazo babo betsaka?
• 14Koa maminania, ry zanak’olona, ka ataovy amin’i Goga hoe: Izao no lazain’i Jehovah Tompo: Moa amin’izany andro hitoeran’ny Isiraely oloko mandry fahizay izany dia tsy ho fantatrao va izany?
• 15Ary ho tonga avy any amin’ny fonenanao avy any amin’ny farany avaratra ianao mbamin’ny firenena maro miaraka aminao, izay samy mitaingin-tsoavaly, dia olona maro be sy miaramila betsaka;
• 16ary hiakatra hamely ny Isiraely oloko tahaka ny fiakatry ny rahona hanarona ny tany ianao; any am-parany no ho tonga izany; ary ho entiko hamely ny taniko ianao, mba hahafantaran’ny firenena Ahy, rehefa miseho ho masina eo anatrehany Aho amin’ny ataoko aminao, ry Goga.
• 17Izao no lazain’i Jehovah Tompo: Moa ianao va ilay nampilazaiko ny mpanompoko hatramin’ny fahiny, dia ny mpaminanin’ny Isiraely, izay naminany ela tamin’izany andro izany ny hampakarako anao hamely azy?
• 18Ary amin’izany andro izany, dia ny andro hihavian’i Goga hamely ny tanin’ny Isiraely, hoy Jehovah Tompo, dia hiefona eo am-bavoroko ny fahatezerako.
• 19Fa amin’ny fahasaro-piaroko sy ny afon’ny fahatezerako no nitenenako hoe: Amin’izany andro izany dia hisy horohoro mafy any amin’ny tanin’ny Isiraely,
• 20ka hangorohoro eo anatrehako ny hazandrano any an-dranomasina sy ny voro-manidina sy ny bibi-dia ary ny biby mandady sy mikisaka rehetra izay mandady sy mikisaka amin’ny tany ary ny olona rehetra ambonin’ny tany; dia hazera ny tendrombohitra, hikoany fiakarana mideza, ary hirodana ity ampiantany rehetra.
• 21Dia hiantso sabatra Aho hamely azy eny amin’ny tendrombohitro rehetra, hoy Jehovah Tompo: ary hifamely sabatra amin’ny namany avy izy rehetra.
• 22Ary hamaly azy* amin’ny areti-mandringana sy ny rà sy ny ranon’orana manafotra ary ny havandra vaventy Aho; ary koa, handatsaka afo sy solifara aminy sy amin’ny miaramilany mbamin’ny firenena maro izay miaraka aminy Aho.[Heb. hifandahatra aminy]
• 23Ka dia hasehoko ny fihalehibiazako sy ny fahamasinako; ary ho fantatra eo imason’ny firenena maro Aho: ka dia ho fantany fa Izaho no Jehovah.

Toko 39

• 1Ary ianao, ry zanak’olona, dia maminania ny hamelezana an’i Goga, ka ataovy hoe: Izao no lazain’i Jehovah Tompo: Indro, hamely anao Aho, ry Goga, mpanjakan’i Rosy sy Meseka ary Tobala.
• 2Hitarika sy hitondra anao hiakatra avy any amin’ny farany avaratra Aho, dia ho entiko ho any an-tendrombohitry ny Isiraely ianao.
• 3Ary hasiako ny tsipìkanao hiala eny an-tananao ankavia, ary halatsako hiala eny an-tananao an-kavanana ny zana-tsipìkanao.
• 4Any an-tendrombohitry ny Isiraely no hiampatramparanao sy ny miaramilanao rehetra mbamin’ny firenena izay miaraka aminao; homeko hohanin’ny vorona mpihaza samy hafa karazana rehetra sy ny bibi-dia ianao.
• 5Eny an-tsaha no hiamparanao; fa Izaho no efa niteny, hoy Jehovah Tompo.
• 6Ary haterako afo Magoga sy izay mipetraka tsy manana ahiahy any amoron-tsiraka; ka dia ho fantany fa Izaho no Jehovah.
• 7Ary ny anarako masina dia hataoko fantatra ao amin’ny Isiraely oloko; ary tsy havelako holotoina intsony ny anarako masina; ka dia ho fantatry ny firenena fa Izaho no Jehovah, Izay masina ao amin’ny Isiraely.
• 8Indro, tonga izany ka tanteraka, hoy Jehovah Tompo. Izany no andro izay nolazaiko.
• 9Ary hivoaka ny mponina ao amin’ny tanànan’ny Isiraely ka handrehitra sy hitaina ny fiadiana, dia ny ampinga lehibe, ny tsipìka sy ny zana-tsipìka, ny langilangy sy ny lefona, ary hitaina izany mandritra ny fito taona izy;
• 10fa tsy haka kitay hazo any an-tsaha na hanapaka hazo any an’ala izy, fa hitaina ny fiadiana ka hamabo izay efa namabo azy sy handroba izay efa nandroba azy, hoy Jehovah Tompo.
• 11Ary amin’izany andro izany dia homeko tany eo amin’ny Isiraely Goga hasiana fasana, dia ny lohasahan’ny mpandalo manolotra ny ranomasina, ka hisakana* ny mpandalo izany; ary any no handevenany an’i Goga sy ny olony maro be rehetra; ary ny anarany hataony hoe Lohasahan’ireo olona maroben’i Goga.[Na: hampitampina orona]
• 12Ary fito volana mipaka no handevenan’ny taranak’Isirady azy, hanadiovany ny tany.
• 13Eny, ny tompon-tany rehetra no handevina azy; ary ho laza ho azy izany amin’ny andro hampisehoako ny voninahitro, hoy Jehovah Tompo.
• 14Ary izy hanavaka sy hanendry olona ho mpitety ny tany sy izay hiaraka amin’ny mpitety koa handevina ny mbola sisa eny ambonin’ny tany, hanadiovana azy; rehefa afaka fito volana, dia vao hikatsaka izy;
• 15ary raha mandeha mitety ny tany ireo mpitety ka mahita taolan’olona, dia hanorina marika eo anilany izy, mandra-pandevin’ny mpandevina azy ao amin’ny Lohasahan’ireo maro ben’i Goga.
• 16Ary hisy tanàna koa hatao hoe Hamona*. Toy izany no hanadiovany ny tany.[Hamona = Olona maro be]
• 17Ary ianao, ry zanak’olona, dia izao na lazain’i Jehovah Tompo: Ataovy amin’ny voro-manidina rehetra sy ny bibi-dia rehetra hoe: Mivoria ianareo, ka mankanesa atỳ; miangòna ianareo avy amin’ny manodidina ho amin’ny fanatitro izay vonoiko ho anareo, dia fanatitra lehibe eny an-tendrombohitry ny Isiraely, hihinananareo nofo sy hisotroanareo rà.
• 18Ny nofon’ny lehilahy mahery no hohaninareo, ary ny ran’ireo mpanjakan’ny tany no hosotroinareo, dia ondrilahy sy zanak’ondry sy osilahy ary vantotr’ombilahy, samy mifahy avy any Basana izy rehetra.
• 19Dia hihinana matavy ianareo mandra-pahavokinareo ary hisotro rà mandra-pahaleonareo avy amin’ny fanatitro izay novonoiko ho anareo.
• 20Ary ho voky soavaly sy ny mpitaingina azy ary lehilahy mahery mbamin’ny miaramila rehetra eo amin’ny latabatro ianareo, hoy Jehovah Tompo.
• 21Ary hasehoko any amin’ny jentilisa ny voninahitro, ka ho hitan’ny firenena rehetra ny fitsarana hataoko sy ny tanako izay hahinjitro aminy.
• 22Ary ho fantatry ny taranak’Isiraely fa Izaho no Jehovah Andriamaniny hatry ny androtr’iny ka hatramin’ny ho avy rehetra.
• 23Ary ho fantatry ny jentilisa fa ny heloky ny taranak’Isiraely no nahababo azy; fa satria nivadika tamiko izy, dia izany no nanafenako ny tavako taminy sy nanolorako azy ho eo an-tànan’ny fahavalony, ka dia lavon-tsabatra izy rehetra.
• 24Araka ny fahalotoany sy ny fahadisoany no navaliko azy sy nanafenako ny tavako taminy.
• 25Koa izao no lazain’i Jehovah Tompo: Ankehitriny dia hampodiko avy amin’ny fahababoany Jakoba, ary hamindrako fo ny taranak’Isiraely rehetra; ary hiseho ho saro-piaro noho ny amin’ny anarako masina Aho.
• 26Dia mba hahatsiaro* ny fahamenarany sy ny fahadisoany rehetra izay nandisoany tamiko izy, rehefa mandry fahizay ao amin’ny taniny, ka tsy misy manaitaitra azy,[Heb. hitondra]
• 27rehefa ampodiko avy any amin’ny firenena izy ary angoniko avy any amin’ny tanin’ny fahavalony; ary hiseho ho masina eo imason’ny jentilisa Aho amin’ny ataoko amin’ireny;
• 28dia ho fantany fa Izaho Jehovah no Andriamaniny amin’ny ampandehanako azy ho babo any amin’ny firenena sy amin’ny anangonako azy ho any amin’ny taniny, ka tsy hisy hafoiko any izy na dia iray akory aza.
• 29Ary tsy hafeniko aminy intsony ny tavako; fa haidiko ao amin’ny taranak’Isiraely ny Fanahiko, hoy Jehovah Tompo.

Toko 40

• 1[Ny fahitana naseho tamin’i Ezekiela ny amin’ny tempoly vaovao] Tamin’ny taona fahadimy amby roa-polo taorian’ny namaboana antsika, tamin’ny niandohan’ny taona, dia tamin’ny andro fahafolo tamin’ny volana, tamin’ny taona fahefatra ambin’ny folo taorian’ny namelezana ny tanàna, tamin’izany andro izany dia tamiko ny tànan’i Jehovah, ka nitondra ahy ho any Izy.
• 2Fahitana avy amin’Andriamanitra no nitondrany ahy ho any amin’ny tanin’ny Isiraely, ka napetrany teo an-tendrombohitra avo dia avo aho, ary nisy nitarehin-tanàna teo amin’ny ilany atsimo.
• 3Dia nentiny nankao aho, ka, indro, nisy lehilahy izay nitarehim-barahina, nitondra tady rongony teny an-tànany sy volotara fandrefesana, ary nitsangana teo am-bavahady izy.
• 4Dia hoy ralehilahy tamiko: Ry zanak’olona, mijere amin’ny masonao, ary mihainoa amin’ny sofinao, ary aoka ny fonao handinika izay rehetra hasehoko anao; fa ny hanehoako anao izao no nitondrana anao eto. Ambarao amin’ny taranak’Isiraely izay rehetra hitanao.
• 5Ary, indro, nisy ampiantany vato manodidina teny ivelan’ny trano, ary eny an-tanan-dralehilahy nisy volotara fandrefesana, enina hakiho ny halavany, kanefa isaky ny hakiho iray dia nihoatra vodivoam-pelatanana noho ny fanao; ka dia norefesiny ny hatevin’ny ampiantany, ka eran’ny volotara. ary ny hahavony dia eran’ny volotara koa.
• 6Dia tonga teo amin’ny vavahady manatrita ny atsinanana izy ka niakatra tamin’ny ambaratongany dia nandrefy ny tokonam-bavahady, ka eran’ny volotara ny sakany, dia ny tokonana voalohany izany, ka eran’ny volotara ny sakany*.[Na: ary eran’ny volotara ny sakan’ny tokonana iray koa]
• 7Ary ny trano fiambenana, dia eran’ny volotara ny lavany, ary eran’ny volotara koa ny sakany; ary ny elanelan’ny trano fiambenana dia dimy hakiho; ary ny tokonam-bavahady eo anilan’ny lavarangan’ny vavahady anatiny dia eran’ny volotara.
• 8Dia norefesiny koa ny lavarangan’ny vavahady, ka eran’ny volotara koa.
• 9Ary norefesiny ny lavarangan’ny vavahady, ka valo hakiho; ary ny tongo-batony dia roa hakiho; ary ny lavarangan’ny vavahady dia teo anatiny.
• 10Ary ny trano fiambenana teo amin’ny vavahady atsinanana dia telo avy no teo an-daniny; mitovy ohatra izy telo, ary mitovy ohatra koa ny tongo-bato teo amin’ny lafiny roa.
• 11Ary norefesiny koa ny haben’ny vavahady, ka folo hakiho; ary ny lavan’ny vavahady dia telo ambin’ny folo hakiho.
• 12Ary nisy nifefy teo anoloan’ny trano fiambenana, ka iray hakiho avy no teo an-daniny roa; ary ny trano fiambenana, dia enina hakiho ny tamin’ny lafiny iray, ary enina hakiho koa ny tamin’ny lafiny iray.
• 13Dia norefesiny koa ny vavahady hatramin’ny tafon’ny trano fiambenana iray ka hatramin’ny tafon’ny iray koa, ka dimy amby roa-polo hakiho ny sakany, ary mifanatrika ny varavarana.
• 14Ary ny tongo-bato dia noheveriny ho enim-polo hakiho, ary nihatra tamin’ny tongo-bato ny kianja manodidina ny vavahady.
• 15Ary hatreo anoloan’ny vavahady fidirana ka hatreo anoloan’ny lavarangan’ny vavahady anatiny dia dimam-polo hakiho.
• 16Ary nisy varavarankely makarakara tsy mivoha manodidina, na ao amin’ny trano fiambenana, na amin’ny tongo-bato ao anatin’ny vavahady*; ary toy izany koa amin’ny tohany; ary ny ao anatiny dia nisy varavarankely manodidina; ary teo amin’ny tongo-bato rehetra dia samy nisy sarin’ny hazo rofia** avokoa.[*Na: sady manodidina azy ny vavahady][**palma]
• 17Dia nentiny ho any amin’ny kianja ivelany aho, ary, indro, nisy efi-trano madinika sy lampivato teny amin’ny kianja manodidina: nisy efi-trano telo-polo teny amin’ny lampivato.
• 18Ary ny lampivato dia teo anilan’ny vavahady, sady nifanerana tamin’ny lavan’ny vavahady: lampivato ambany io.
• 19Dia norefesiny koa ny sakany hatreo anoloan’ny vavahady ambany ka hatreo anoloan’ny kianja anatiny, dia hatreo amin’ny ivelany, ka zato hakiho, dia teo atsinanana sy teo avaratra.
• 20An norefesiny koa ny lavany sy ny sakan’ny vavahadin’ny kianja ivelany, izay nanatrika ny avaratra.
• 21Ary ny trano fiambenany dia telo avy no teo an-daniny; ary ny tongo-batony sy ny tohany dia nitovy ohatra tamin’ny vavahady voalohany, ka dimam-polo hakiho ny lavany, ary dimy amby roa-polo hakiho ny sakany.
• 22Ary ny varavarankeliny sy ny tohany an ny sarin’ny hazo rofia* taminy dia nitovy ohatra tamin’ny ireo amin’ny vavahady atsinanana, ary nisy ambaratonga fito ho fiakarana ao; ary ny tohany dia tandrifin’ireo.[palma]
• 23Ary nisy vavahadin’ny kianja anatiny, tandrifin’ny vavahady fidirana manatrika ny avaratra sy ny atsinanana; ka dia norefesiny hatramin’ny vavahady anankiray ka hatramin’ny anankiray, ka zato hakiho.
• 24Dia nentiny nianatsimo aho, ka, indro, nisy vavahady teo atsimo; ka norefesiny ny tongo-batony sy ny tohany, ka araka ireo ohatra ireo ihany koa.
• 25Ary nisy varavarankely teo aminy sy teo amin’ny tohany manodidina, dia tahaka ireo varavarankely ireo ihany koa, ka dimam-polo hakiho ny lavany, ary dimy amby roa-polo hakiho ny sakany.
• 26Ary nisy ambaratonga fito ho fiakarana ao, ary ny tohany dia tandrifin’ireo; ary nisy sarin’ny hazo rofia* iray tamin’ny lafiny iray, ary iray koa tamin’ny lafiny iray teo amin’ny tongo-batony.[palma]
• 27Ary nisy vavahady fidirana amin’ny kianja anatiny teo atsimo, dia norefesiny teo atsimo hatramin’ny vavahady anankiray ka hatramin’ny anankiray, ka zato hakiho koa.
• 28Ary nentiny niditra tamin’ny vavahady atsimo ho any amin’ny kianja anatiny aho; dia norefesiny ny vavahady atsimo, ka araka ireo ohatra ireo ihany koa;
• 29ary ny trano fiambenany sy ny tongo-batony ary ny tohany dia araka ireo ohatra ireo ihany koa; ary nisy varavarankely teo aminy sy teo amin’ny tohany manodidina, dimam-polo hakiho ny lavany, ary dimy amby roa-polo hakiho ny sakany.
• 30Ary nisy tohany manodidina, dia dimy amby roa-polo hakiho ny lavany, ary dimy hakiho ny sakany.
• 31Ary ny tohany dia nanatrika ny kianja ivelany; ary nisy sarin’ny hazo rofia* teo amin’ny tongo-batony, ary nisy ambaratonga valo ho fiakarana ao.[palma]
• 32Dia nentiny niantsinanana aho ho any amin’ny kianja anatiny, dia norefesiny ny vavahady, ka araka ireo ohatra ireo ihany koa.
• 33Ary ny trano fiambenany sy ny tongo-batony ary ny tohany dia araka ireo ohatra ireo ihany koa; ary nisy varavarankely teo aminy sy teo amin’ny tohany manodidina, dimam-polo hakiho ny lavany, ary dimy amby-roa-polo hakiho ny sakany.
• 34Ary nanatrika ny kianja ivelany ny tohany; ary nisy sarin’ny hazo rofia* teo amin’ny tongo-batony andaniny roa, ary nisy ambaratonga valo ho fiakarana ao.[palma]
• 35Ary nentiny ho any amin’ny vavahady avaratra aho, dia norefesiny, ka araka ireo ohatra ireo ihany koa,
• 36ary ny trano fiambenany sy ny tongo-batony ary ny tohany, ary nisy varavarankely teo aminy manodidina, dia dimam-polo hakiho ny lavany, ary dimy amby roa-polo hakiho ny sakany.
• 37Ary nanatrika ny kianja ivelany ny tongo-batony; nisy sarin’ny hazo rofia* teo amin’ny tongo-batony andaniny roa; ary ambaratonga valo no fiakarana ao.[palma]
• 38Ary nisy efi-trano misy varavarana teo anilan’ny tongo-bato teo am-bavahady, izay nanakobahany ny fanatitra dorana.
• 39Ary teo amin’ny lavarangan’ny vavahady dia nisy latabatra roa avy tamin’ny lafiny roa hamonoana ny fanatitra dorana sy ny fanatitra noho ny ota ary ny fanati-panonerana.
• 40Ary teo anilany eo ivelany amin’ny fiakarana hiditra eo amin’ny vavahady avaratra dia nisy latabatra roa, ary teo anilany anankiray koa teo amin’ny lavarangan’ny vavahady, dia nisy latabatra roa koa.
• 41Nisy latabatra efatra teo amin’ny ilany iray amin’ny vavahady ary latabatra efatra koa teo amin’ny ilany iray, dia latabatra valo izay famonoana.
• 42Ary nisy latabatra efatra natao tamin’ny vato voapaika ho amin’ny fanatitra dorana, iray hakiho sy sasany ny lavany, ary iray hakiho sy sasany koa ny sakany, ary iray hakiho ny hahavony; teo no nametrahany ny zavatra famonoana ny fanatitra dorana sy ny fanatitra hafa.
• 43Ary nisy fihantonana roa rantsana*, vodivoam-pelatanana ny halavany**, naorina manodidina eny amin’ny rindrina; ary natao teo ambonin’ny latabatra ny hena fanatitra.[*Na: nisy filirany][**Na: ny habeny]
• 44Ary teo ivelan’ny vavahady anatiny, teo anilan’ny vavahady avaratra ka manatrika ny atsimo, dia nisy ireo efi-trano ho an’ny mpihira teo amin’ny kianja anatiny, ary nisy iray koa teo anilan’ny vavahady atsinanana ka nanatrika ny avaratra.
• 45Ary hoy izy tamiko: Ity efi-trano manatrika ny atsimo ity dia ho an’ny mpisorona izay mitandrina ny anjara-raharahany amin’ny trano.
• 46Ary ny efi-trano manatrika ny avaratra kosa dia ho an’ny mpisorona izay mitandrina ny anjara-raharaha ny amin’ny alitara, ireo dia taranak’i Zadoka, izay isan’ny taranak’i Levy, ka manatona an’i Jehovah hanao fanompoam-pivavahana ho Azy.
• 47Dia norefesiny ny kianja, ka zato hakiho ny lavany, ary zato hakiho koa ny sakany, dia efa-joro sokera izy; ary ny alitara dia teo anoloan’ny trano.
• 48Ary nentiny ho any amin’ny lavarangan’ny trano aho, dia norefesiny ny tongo-batony amin’ny lavarangana fidirana, ka dimy hakiho ny tamin’ny lafiny iray, ary dimy hakiho koa ny tamin’ny lafiny iray, ary ny sakan’ny vavahady dia telo hakiho ny tamin’ny lafiny iray, ary telo hakiho koa ny tamin’ny lafiny iray.
• 49Roa-polo hakiho ny lavan’ny lavarangana fidirana, ary iraika ambin’ny folo hakiho ny satany; ary ambaratonga no fiakarana ao; ary nisy tongo-bato teo anilan’ny tolana, iray tamin’ny lafiny iray, ary iray tamin’ny lafiny iray koa.

Toko 41

• 1Ary nentiny ho ao amin’ny ati-trano lehibe aho, dia norefesiny ny tongo-bato, ka enina hakiho ny sakany tamin’ny lafiny iray, ary enina hakiho koa ny sakany tamin’ny lafiny iray; sakan’ny trano-lay izany.
• 2Ary ny sakan’ny varavarana dia folo hakiho; ary ny teo an-danin’ny varavarana dia dimy hakiho avy; ary norefesiny ny lavany, ka efa-polo hakiho, ary ny sakany roa-polo hakiho.
• 3Dia nandroso ho ao anatiny indrindra izy ary, norefesiny ny tongo-bato eo an-danin’ny varavarana, ka roa hakiho, ary ny varavarana enina hakiho, ary ny sakan’ny varavarana fito hakiho.
• 4Dia norefesiny ny lavany, ka roa-polo hakiho, ary ny sakany roa-polo hakiho teo anoloan’ny ati-trano lehibe; dia hoy izy tamiko: Io no fitoerana masina indrindra.
• 5Ary samy norefesiny manodidina, ka ny hatevin’ny rindrin’ny trano dia enina hakiho, ary ny sakan’ny paosin-trano dia efatra hakiho.
• 6Ary ireo paosin-trano ireo dia nifanongoa telo sady telo-polo milahatra; ary niankina tamin’ny rindrin-trano izay ho an’ny paosin-trano manodidina izy mba hitsatohany, fa tsy hitsatoka amin’ny rindrin’ny trano.
• 7Ary ny sakan’ireo efi-trano ireo dia nihamalalaka manodidina isaky ny mifanongoa, fa niampy isaky ny mifanongoa izy, ka dia nihamalalaka araka ny fisandrany; ary ny tombon’ny ambony amin’ny an-tenatenany dia tahaka ny tombon’ny an-tenatenany amin’ny ambany.
• 8Dia hitako fa nisy tokotany nasandratra manodidina ny trano ho fanorenan’ny paosin-trano, dia* eran’ilay volotara hatramin’ny ifanohizany.[Na: Dia noheveriko ny hahavon’ny trano manodidina; ary ny fanorenan’ny paosin-trano dia]
• 9Ny hatevin’ny rindrina ivelany amin’ny paosin-trano dia dimy hakiho; ary hoatra izany koa ilay sisa navela manolotra ny paosin-trano.
• 10Ary ny teo anelanelan’ny efi-trano dia roa-polo hakiho manodidina ny trano na aiza na aiza.
• 11Ary ny varavaran’ny paosin-trano dia mankao amin’ilay sisa navela, dia varavarana iray manatrika ny avaratra, ary iray koa manatrika ny atsimo; ary ny sakan’ilay sisa navela dia dimy hakiho manodidina.
• 12Ary ny trano izay teo anoloan’ilay kianja voatokana tamin’ny lafiny andrefana, dia dia fito-polo hakiho ny sakany; ary ny rindrin’ny trano, dia dimy hakiho ny hatevin’ny manodidina, ary sivi-folo hakiho ny lavany.
• 13Dia nandrefy ny trano izy, ka zato hakiho ny lavany, ary ny kianja voatokana sy ny trano ary ny rindrina, dia zato hakiho ny lavany.
• 14Ary ny sakan’ny trano eo anoloany sy ny kianja voatokana teo atsinanana dia zato hakiho.
• 15Dia norefesiny ny lavan’ny trano teo anoloan’ny kianja izay tao ivohony, ary ny lalan-tsarany teo an-daniny roa, ka zato hakiho. Ny tempoly ao anaty sy ny lavarangana ao amin’ny kianja
• 16ary ny tokonana sy ny varavarankely makarakara tsy mivoha ary ny lalan-tsara manodidina amin’izy telo (manandrify ny tokonana dia nopetahana hazo fisaka manodidina, ary hatramin’ny tany ka hatramin’ny varavarankely koa, ary voasarona ny varavarankely),
• 17ary ny eo ambonin’ny varavarana, na amin’ny trano ao anatiny, na ny eny ivelany, mbamin’ny rindrina manodidina, na ny ao anatiny na ny eny ivelany, koa samy natao tamin’ny ohatra avokoa.
• 18Ary nisy sarin’ny kerobima sy ny hazo rofia* natao, ka ny sarin’ny hazo rofia* dia teo anelanelan’ny kerobima, ary ny kerobima dia samy nanana tarehy roa avy,[palma]
• 19ka ny tarehin’olona no nanatrika ny hazo rofia tamin’ny an-kilany iray, ary ny tarehin-diona tanora kosa no nanatrika ny hazo rofia* tamin’ny an-kilany iray; ny manodidina ny trano dia natao tahaka izany avokoa izy rehetra.[palma]
• 20Hatramin’ny tany ka hatrany ambonin’ny varavarana no nasiana sarin’ny kerobima sy ny hazo rofia*, dia teo amin’ny rindrin’ny ati-trano lehibe.[palma]
• 21Efa-joro ny tolan’ny ati-trano lehibe, ary ny anoloana amin’ny fitoerana masina dia nitovy tarehy tamin’izany koa.
• 22Ny alitara dia hazo, ka telo hakiho ny hahavony, ary roa hakiho ny lavany; ary nisy zorony koa, ary ny lavany sy ny rindriny dia hazo. Ary hoy izy tamiko: Io no latabatra izay eo anatrehan’i Jehovah.
• 23Ary ny ati-trano lehibe sy ny fitoerana masina dia nisy lela-varavarana roa.
• 24Ary ireo lela-varavarana ireo dia samy kopa-droa avy, dia lela-varavarana roa amin’ny anankiray, ary lela-varavarana roa koa amin’ny anankiray.
• 25Ary nisy sarin’ny kerobima sy ny hazo rofia* natao teo amin’ny varavaran’ny ati-trano lehibe tahaka izay natao teo amin’ny rindrina ihany; ary nisy tokonana** hazo teo anoloan’ny lavarangana fidirana, dia teo ivelany.[*palma][**Na: tatao]
• 26Ary nisy varavarankely makarakara tsy mivoha sy sarin’ny hazo rofia* teo an-daniny roa, dia teo anilan’ny lavarangana fidirana sy teo amin’ny efi-trano momba ny trano ary teo amin’ny tokonana*.[*palma][**Na: tatao]

Toko 42

• 1Dia nentiny nivoaka nianavaratra ho any amin’ny kianja ivelany aho, ary nampidiriny ho ao amin’ny efi-trano tandrifin’ny kianja voatokana sady tandrifin’ny trano eo amin’ny avaratra,
• 2dia ho eo anoloan’ilay lavany zato hakiho izay nisy ny varavarana avaratra, ary ny sakany dimam-polo hakiho.
• 3Tandrifin’ny roa-polo hakiho amin’ny kianja anatiny sady tandrifin’ny lampivato amin’ny kianja ivelany dia nisy lalan-tsarany nifanandrify teo amin’ny trano fahatelo ambony indrindra.
• 4Ary teo anoloan’ny efi-trano dia nisy lalana, folo hakiho ny sakany, mankao anatiny, ary lalana iray* hakiho izany; ary nanatrika ny avaratra ny varavarany.[Na: (zato)]
• 5Ary nohakelezina ny efi-trano ambony, fa nangalana ho lalantsarany, ka izany no nahakely azy noho ny ambany sy ny an-tenatenany.
• 6Fa nifanongoa telo ireo, fa tsy nisy andry tahaka ny andrin’ny kianja, ka izany no nahakely azy noho ny ao ambany sy ny ao an-tenatenany hatreny an-tany.
• 7Ary nisy ampiantany teo ivelany, tandrifin’ny efi-trano, nanatrika ny kianja ivelany, teo anoloan’ny efi-trano, ka dimam-polo hakiho ny lavany.
• 8Fa ny lavan’ireo efi-trano izay teo amin’ny kianja ivelany dia dimam-polo hakiho; ary, indro, ny teo anoloan’ny ati-trano lehibe dia zato hakiho.
• 9Ary teo ambanin’ireo efi-trano ireo dia nisy fidirana avy eo atsinanana, raha miditra amin’ireo avy eo amin’ny kianja ivelany.
• 10Ary nisy efi-trano koa teo amin’ny sakan’ny ampiantanin’ny kianja teo amin’ny atsinanana, tandrifin’ny kianja voatokana sady tandrifin’ny trano.
• 11Ary nisy lalana teo anoloany, ary tahaka ny tarehin’ny efi-trano teo amin’ny avaratra ny tarehiny, sady mitovy amin’ny an’ireo avokoa ny lavany sy ny sakany ary ny fivoahana avy ao aminy mbamin’ny fombafombany rehetra sy ny varavarany;
• 12ary tahaka ny varavaran’ny efi-trano eo amin’ny atsimo dia nisiana varavarana koa teo amin’ny fiandohan’ny lalana, dia ilay lalana eo anoloan’ny ampiantany mifanolotra aminy, dia ny lalana avy eo amin’ny atsinanana, raha miditra ao aminy.
• 13Dia hoy izy tamiko; Ny efi-trano avaratra sy ny efi-trano atsimo, izay eo anoloan’ny kianja voatokana, dia efi-trano masina, hihinanan’ny mpisorona izay manatona an’i Jehovah ny zavatra masina indrindra; any no hametrahany izay zavatra masina indrindra, dia ny fanatitra hohanina sy ny fanatitra noho ny ota ary ny fanati-panonerana: fa masina io fitoerana io.
• 14Raha miditra ao ny mpisorona, dia tsy hiala amin’ny fitoerana masina ho any amin’ny kianja ivelany izy, fa ao no hamelany ny fitafiana masina izay nentiny nanao fanompoam-pivavahana, satria masina ireo; ary hitafy fitafiana hafa izy vao manatona ny olona.
• 15Ary nony vita ny nandrefesany ny trano anatiny, dia nentiny nivoaka nankany amin’ny vavahady izay manatrika ny atsinanana aho, ka norefesiny ny manodidina.
• 16Norefesiny tamin’ny volotara fandrefasana ny lafiny atsinanana, ka indiman-jaton’ny volotara manodidina, raha amin’ny volatara fandrefesana.
• 17Norefesiny koa ny lafiny avaratra, ka indiman-jaton’ny volotara manodidina, raha amin’ny volotara fandrefesana.
• 18Norefesiny koa ny lafiny atsimo, ka indiman-jaton’ny volotara, raha amin’ny volotara fandrefesana.
• 19Nitodika nankany amin’ny lafiny andrefana izy ka nandrefy indiman-jaton’ny volotara tamin’ny volotara fandrefesana.
• 20Norefesiny avokoa ny lafiny efatra. Nisy ampiantany manodidina, indiman-jaton’ny volotara ny lavany, ary indiman-jatony koa ny sakany, hampiavaka ny masina sy ny tsy masina.

Toko 43

• 1[Ny nidiran’ny voninahitr’i Jehovah ho ao amin’ny tempoly, sy ny teny nampitondrainy tamin’izany] Ary nentiny ho any amin’ny vava*;) hady aho, dia ilay vavahady manatrika ny atsinanana.
• 2Ary, indro, tamy ny voninahitr’Andriamanitry ny Isiraely avy tany atsinanana; ary ny feony dia tahaka ny firohondrohon’ny rano be; ary ny tany dia namirapiratra azon’ny voninahiny.
• 3Ary ny tarehin’ny zavatra hitako dia tahaka ny an’ilay efa hitako, fony aho tonga handrava ny tanàna; ary nisy tahaka ny tarehin’ilay efa hitako teo amoron’ny ony Kebara ihany; ka dia nikarapoka nihohoka aho.
• 4Ary ny voninahitr’i Jehovah dia niditra tamin’ny vavahady manatrika ny atsinanana ho ao an-trano.
• 5Dia nisy fanahy* nanainga ahy ka nitondra ahy niditra ho ao amin’ny kianja anatiny; ary, indro, feno ny voninahitr’i Jehovah ny trano.[Na: rivotra]
• 6Dia reko fa nisy niteny tamiko tao an-trano; ary nisy lehilahy nitsangana teo anilako.
• 7Dia hoy Izy tamiko: Ry zanak’olona, eto no hitoeran’ny seza fiandrianako sy hitoeran’ny faladiako, izay honenako mandrakizay eto amin’ny zanak’Isiraely; ary tsy holotoin’ny taranak’Isiraely, na izy na ny mpanjakany, amin’ny fijangajangany sy amin’ny sampin*’ny mpanjakany ao amin’ny fitoerany avo intsony ny anarako masina,[Heb. fatin’]
• 8tamin’ny nametrahany ny tokonam-baravaran’ireny teo anilan’ny tokonam-baravarako sy ny tolan’ireny teo anilan’ny tolako, rindrina ihany no teo anelanelako sy ireny, dia nolotoiny tamin’ny fahavetavetana nataony ny anarako masina; ka dia nahalany ringana azy tamin’ny fahatezerako Aho.
• 9Fa amin’izao kosa dia aoka hariany lavitra Ahy ny fijangajangany sy ny sampin*’ ny mpanjakany, ka dia honina ao aminy mandrakizay Aho.[Heb. fatin’]
• 10Hianao, ry zanak’olona, asehoy amin’ny taranak’Isiraely ny trano mba hahamenatra azy ny amin’ny helony, ka dia horefesiny ny mari-trano.
• 11Ary raha menatra ny amin’izay rehetra efa nataony izy, dia asehoy azy ny endriky ny trano mbamin’ny fombafombany sy ny fivoahana avy ao aminy sy ny fidirana ho ao aminy ary ny endriny rehetra sy ny didy rehetra aminy, eny, ny endriny rehetra ary ny lalàna rehetra aminy; koa soraty eo imasony izany, hitandremany ny endriny rehetra ary ny lalàny rehetra ka hanatanterahany izany.
• 12Izao no lalàna amin’ny trano: Ho masina dia ho masina avokoa izay rehetra voafaritra ho azy eo an-tampon’ny tendrombohitra. Eny, izany no lalana amin’ny trano.
• 13[Ny amin’ny alitaran’ny fanatitra odorana sy ny fanokanana azy] Ary izao no mariky ny alitara araka ny hakiho, nefa isaky ny hakiho iray dia mihoatra vodivoam-pelatanana noho ny fanao: Ny fara-vodiny dia iray hakiho, ary iray hakiho koa ny sakany, ary ny koronosiny manodidina dia irain-jehy; ireo no fiorenan’ny alitara.
• 14Ary hatramin’ny fara-vodiny eo amin’ny tany ka hatramin’ny rindriny ambany dia roa hakiho, ary ny sakany dia iray hakiho; ary hatramin’ny rindriny iva ka hatramin’ny rindriny avo dia efatra hakiho; ary ny sakany dia iray hakiho.
• 15Ary ny fanambonin’ny alitara* dia ho efatra hakiho, ary eo ambonin’ny fatana** dia hisy tandroka efatra.[*Heb. Harela = tendrombohitr’Andriamanitra][**Heb. Ariela = fatan’Andriamanitra, na lion’Andriamanitra, ka tokony ho anaran’ny momba ny fanambonin’ny alitara ireo]
• 16Roa ambin’ny folo hakiho ny lavan’ny fatana,4 ary roa ambin’ny folo hakiho koa ny sakany, ary efa-joro sokera izy,
• 17Ary ny rindriny dia efatra ambin’ny folo hakiho ny lavany, sy efatra ambin’ny folo hakiho koa ny sakany, amin’ny lafiny efatra; ary ny koronosiny manodidina dia antsasaky ny hakiho; ary ny fara-vodiny dia iray hakiho manodidina; ary ny ambaratongany dia manatrika ny atsinanana.
• 18Ary hoy izy tamiko: Ry zanak’olona, izao no lazain’i Jehovah Tompo: Izao no didy ny amin’ny alitara amin’izay andro hanaovana azy, hanaterana fanatitra dorana sy hanopazana rà aminy:
• 19Ny Levita mpisorona, taranak’i zadoka, izay manatona Ahy hanao fanompoam-pivavahana ho Ahy, dia homenao vantotr’ombilahy iray hatao fanatitra noho ny ota, hoy Jehovah Tompo.
• 20Dia hangalanao ny ràny ka hatentinao amin’ny tandrony efatra sy amin’ny zorony efatra amin’ny rindriny ary amin’ny koronosiny manodidina; izany no hanadiovanao* azy sy hanaovanao fanavotana ho azy.[Ny dikan’ny teny Hebreo amin’ireo dia manafaka ota azy; Lev. viii. 15]
• 21Halainao koa ny vantotr’ombilahy hatao fanatitra noho ny ota ka hodorana ao amin’ny fitoerana voatendry ao amin’ny trano ivelan’ny fitoerana masina.
• 22Ary amin’ny andro faharoa no hanateranao osilahy tsy misy kilema hatao fanatitra noho ny ota; ary hodioviny* ny alitara tahaka ny nanadiovany* azy tamin’ny vantotr’ombilahy.[Ny dikan’ny teny Hebreo amin’ireo dia manafaka ota azy; Lev. viii. 15]
• 23Ary rehefa vita ny anadiovanao* azy, dia hanatitra vantotr’ombilahy tsy misy kilema sy ondrilahy tsy misy kilema ianao.[Ny dikan’ny teny Hebreo amin’ireo dia manafaka ota azy; Lev. viii. 15]
• 24Ary haterinao eo anatrehan’i Jehovah ireo, ary ny mpisorona handraraka sira eo aminy, dia hanatitra azy ho fanatitra dorana ho an’i Jehovah.
• 25Hafitoana no hanateranao osilahy isan’andro hatao fanatitra noho ny ota sy vantotr’ombilahy sy ondrilahy izay tsy misy kilema.
• 26Hafitoana no hanaovany fanavotana ho an’ny alitara sy hanadiovany azy ary hanokanany* azy.[Heb. hamenoana ny tànany]
• 27Ary rehefa tapitra izany andro izany, dia hiantomboka amin’ny andro fahavalo ny hanateran’ny mpisorona ny fanatitra doranareo ao amin’ny alitara sy ny fanati-pihavananareo; ary dia hankasitrahako ianareo, hoy Jehovah Tompo.

Toko 44

• 1[Lalàna ny amin’ny mpanjaka sy ny mpisorona] Dia nentiny niverina aho tamin’ny lalana mankamin’ny vavahady ivelany amin’ny fitoerana masina, dia ilay manatrika ny atsinanana; ka, indro, nirindrina io.
• 2Dia hoy Jehovah tamiko: Ity vavahady ity dia hirindrina ka tsy hovohana ary tsy hidiran’olona; fa efa nidiran’i Jehovah, Andriamanitry ny Isiraely, io, ka izany no hirindrinany.
• 3Kanefa kosa ny mpanjaka no mahazo mipetraka ao hihinan-kanina eo anatrehan’i Jehovah, satria mpanjaka izy; amin’ny lalana mankamin’ny lavarangan’ny vavahady no hidirany, ary amin’ny lalana nalehany ihany toa no hivoahany.
• 4Dia nentiny nankamin’ny vavahady avaratra ho eo anoloan’ny trano koa aho, dia hitako fa, indro, feno ny voninahitr’i Jehovah ny tranon? i Jehovah; ka dia nikarapoka nihohoka aho.
• 5Ary hoy Jehovah tamiko: Ry zanak’olona, mandiniha tsara, ka mijere amin’ny masonao, ary aoka hohenoin’ny sofinao izay rehetra lazaiko aminao ny amin’ny didy sy ny lalàna rehetra amin’ny tranon’i Jehovah; ary diniho tsara ny fidirana amin’ny trano sy ny fivoahana rehetra avy ao amin’ny fitoerana masina.
• 6Ary lazao amin’ireo maditra, dia ny taranak’Isiraely hoe: Izao no lazain’i Jehovah Tompo: Aoka izay ny fahavetavetanareo, ry taranak’Isiraely!
• 7dia ny nitondranareo vahiny tsy mifora fo na nofo hitoetra ao amin’ny fitoerako masina mba handoto ny tranoko tamin’ny nanateranareo ny haniko, dia ny sabora sy ny rà, ka dia nivadika ny fanekeko ireo ho fanampin’ny fahavetavetanareo rehetra;
• 8ary tsy nitandrina ny anjara-raharaha ny amin’ny fitoerako masina ianareo, fa efa nanendry izay ho mpitandrina ny anjara-raharaha ao amin’ny fitoerana masina hisolo anareo.
• 9Izao no lazain’i Jehovah Tompo: Ny vahiny tsy mifora fo sy nofo rehetra izay ao amin’ny zanak’Isiraely dia tsy misy hahazo miditra ao amin’ny fitoerako masina.
• 10Ary na dia ny Levita aza, izay nanalavitra Ahy tamin’ny nivilian’ny Isiraely, izay nivily niala tamiko ka nanaraka ny sampiny, dia hitondra ny helony izy.
• 11Ary ho mpanao fanompoam-pivavahana ao amin’ny fitoerako masina izy, dia ho mpiadidy ny amin’ny fiandrasana ny vavahadin’ny tempoly* sy ho mpanao fanompoam-pivavahana ao amin’ny tempoly;152 hisolo ny olona hamono ny fanatitra dorana sy ny fanatitra hafa izy ary hitoetra eo anatrehany hanao fanompoam-pivavahana ho azy.[Heb. trano]
• 12Satria nanao fanompoam-pivavahana ho azy teo anatrehan’ny sampiny izy ka tonga fahatafintohinana nahameloka ny taranak’Isiraely, dia izany no nananganako tanana hamely azy ka nilazako fa hitondra ny helony izy, hoy Jehovah Tompo,
• 13ary tsy hanatona Ahy ho mpisoroko izy, na hanakaiky izay zavatra masina na inona na inona, dia izay zavatra masina indrindra; fa hitambesaran’ny fahamenarany sy ny fahavetavetana nataony izy.
• 14Ary hotendreko ho mpitandrina ny anjara-raharaha ny amin’ny trano izy, dia ny fanompoana rehetra sy ny zavatra rehetra atao ao.
• 15Fa ny Levita mpisorona, taranak’i zadoka kosa, izay nitandrina ny anjara-raharaha ny amin’ny fitoerako masina, tamin’ny nivilian’ny zanak’Isiraely niala tamiko, dia izy no hanatona Ahy hanao fanompoam-pivavahana ho Ahy, ary izy no ho eo anatrehako hanatitra ho Ahy ny sabora sy ny rà, hoy Jehovah Tompo.
• 16Eny, izy no hiditra ao amin’ny fitoerako masina sy hanatona ny latabatro hanao fanompoam-pivavahana ho Ahy ary hitandrina izay nasaiko hotandremana.
• 17Ary raha miditra any amin’ny vavahadin’ny kianja anatiny izy, dia hiakanjo rongony fotsy; fa tsy hisy volon’ondry eny aminy, raha manao fanompoam-pivavahana ao am-bavahadin’ny kianja anatiny sy ao anatiny izy.
• 18Satroka rongony no ho eo an-dohany, ary kalisaona fohy rongony fotsy no ho eo am-balahany, ary tsy hifehy zavatra mahatsemboka azy izy.
• 19Ary raha mivoaka ho any amin’ny kianja ivelany hankany amin’ny olona izy, dia hesoriny ilay fitafiana nentiny nanao fanompoam-pivavahana, ka havelany ao amin’ny efi-trano masina, ary hitafy fitafiana hafa izy, fa tsy hanamasina ny olona amin’ireny fitafiany ireny.
• 20Tsy hanaratra ny lohany izy, nefa kosa tsy hanao lava volo, fa hataony tsara hety.
• 21Ny divay dia tsy hosotroin’izay mpisorona, raha miditra any amin’ny kianja anatiny izy.
• 22Ary tsy hanambady vehivavy efa maty vady na izay efa nisaorana izy; fa virijiny avy amin’ny taranak’Isiraely, na izay novinadin’ny mpisorona efa maty no hovadiny.
• 23Ary hampianatra ny oloko ny tsi-fitovian’ny masina sy ny tsy masina izy ary hampahafantatra azy ny tsi-fitovian’ny tsy madio sy ny madio.
• 24Ary raha misy mifanditra, dia ireo no hitsangana hitsara, ka araka ny fitsipiko no hitsarany azy; ary ny lalàko sy ny didiko dia hotandremany amin’ny fotoam-pivavahana rehetra voatendriko, ary ny Sabatako dia hohamasininy.
• 25Ary tsy hiditra am-paty handoto ny tenany izy ireny; kanefa raha rainy, na reniny, na zananilahy, na zananivavy, na rahalahiny, na anabaviny tsy manam-bady, dia mahazo miditra am-paty ihany izy.
• 26Ary rehefa voadio aza izy, dia mbola hampiandrasina hafitoana aloha.
• 27Ary amin’ny andro hidirany ao amin’ny fitoerana masina, dia any amin’ny kianja anatiny, hanao fanompoam-pivavahana ao amin’ny fitoerana masina, dia hanatitra ny fanatiny noho ny ota izy, hoy Jehovah Tompo.
• 28Ary hisy lova ho azy, dia Izaho no lovany; ary tsy homenareo zara-tany eo amin’ny Isiraely izy, fa Izaho no anjarany.
• 29Ny fanatitra hohanina sy ny fanatitra noho ny ota ary ny fanati-panonerana no hohaniny; ary ny zavatra rehetra izay voatokana* eo amin’ny Isiraely dia ho azy koa.[Heb. herema]
• 30Ary ny santatry ny voaloham-bokatra rehetra avy amin’ny zavatra rehetra sy ny fanatitra rehetra izay alaina amin’ny zavatra atao fanatitra dia ho an’ny mpisorona; ary ny santatry ny kobanareo voafetafeta dia homenareo ny mpisorona koa, mba hampitoerana fitahiana ao an-tranonao.
• 31Ny zavatra maty ho azy sy izay noviraviraim-biby, na vorona na biby dia samy tsy hohanin’ny mpisorona.

Toko 45

• 1[Ny amin’ny tany homena ho an’ny tempoly sy ny mpisorona sy ny Levita ary ny mpanjaka, ary ny amin’ny zavatra haloa ho an’ny mpanjaka hanaovany fanatitra] Ary rehefa zarainareo araka ny filokana ny tany mba ho lova, dia hisy hatokanareo ho fanatitra ho an’i Jehovah, dia anjara masina amin’ny tany; ny lavany dia indimy arivo sy roa alin’ny volotara, ary ny sakany iray alina. Ho masina any amin’ny fari-taniny rehetra manodidina izany.
• 2Ary io dia hanalana efa-joro sotera ho tany masina, dimam-jato ny lavany, ary dimanjato koa ny sakany; ary ho dimam-polo hakiho ny tany manodidina azy.
• 3Eny, araka izany fandrefesana izany no handrefesanao* dimy arivo amby roa alina ny lavany, ary iray alina ny sakany; ary ho ao amin’io ny fitoerana masina, dia ny masina indrindra.[Na: Ary amin’izany voarefy izany dia mbola hisy horefesinao koa, dia]
• 4Ho anjara masina amin’ny tany izany ka ho an’ny mpisorona, mpanao fanompoam-pivavahana ao amin’ny fitoerana masina, dia izay manatona hanao fanompoam-pivavahana ho an’i Jehovah, ary ho fitoeran’ny tranony sy ho tany masina hasiana ny fitoerana masina.
• 5Ary tany dimy arivo amby roa alina ny lavany, ary iray alina ny sakany, no ho an’ny Levita, mpanao fanompoam-pivavahana ao amin’ny trano; ho zara-tany ho azy izany efi-trano roa-polo.
• 6Ary homenareo koa ny zara-tany ho an’ny tanàna, dimy arivo ny sakany, ary dimy arivo amby roa alina ny lavany, mifanolotra amin’ny anjara masina voatokana; ho an’ny taranak’Isiraely rehetra izany.
• 7Ary ny mpanjaka dia homenareo tany eo andaniny roa amin’ny anjara masina voatokana sy amin’ny tany ho an’ny tanàna, dia ny mifanolotra amin’ny anjara masina voatokana sy ny mifanolotra amin’ny tany ho an’ny tanàna, hatreo amin’ny andrefana mikipaka miankandrefana, ary hatreo amin’ny atsinanana mikipaka miantsinanana; ary ny sakany*, dia mifanolotra amin’ireo anjaran’ny firenena, na amin’ny andrefana na amin’ny atsinanana.[Heb. lavany]
• 8Ho taniny izany, dia anjara ho azy ao amin’ny Isiraely, ary ireo mpanjaka voahosotro* dia tsy hampahory ny oloko intsony, fa hahafoy ny tany ho an’ny taranak’Isiraely isam-pireneny.[Heb. mpanjakako]
• 9Izao no lazain’i Jehovah Tompo: Aoka izay, ry mpanjakan’ny Isiraely! Ajanony ny halozana sy ny fampahoriana, ary manaova fitsarana sy fahamarinana; atsaharo ny fandroahanareo ny oloko, hoy Jehovah Tompo.
• 10Mizana marina sy efaha marina ary bata marina no aoka hotananareo.
• 11Hitovy fatra ny efaha sy ny bata, ary ny bata hahalany ny ampahafolon’ny homera, ary ny efaha koa dia ampahafolon’ny homera: ny homera no mariky ny fatrany.
• 12Ny sekely dia roa-polo gera; sekely roa-polo sy dimy amby roa-polo ary dimy ambin’ny folo no ho manenareo.
• 13Izao no zavatra haloanareo: Ny ampahenin’ny efaha isaky ny homeran’ny vary tritika; ary haloanareo koa ny ampahenin’ny efaha isaky ny homeran’ny vary hordea;
• 14ary ny didy ny amin’ny diloilo (ny diloilo iray bata) dia ampahafolon’ny bata isaky ny kora; fa ny homera dia misy bata folo, satria bata folo no homera iray.
• 15Ary ondry iray isan-droanjato amin’ny tanin’ny Isiraely izay azon-drano no haloanareo hatao fanatitra hohanina sy fanatitra dorana ary fanati-pihavanana, mba hanaovana fanavotana ho an’ny vahoaka, hoy Jehovah Tompo.
• 16Ny vahoaka rehetra no handoa izany ho an’ny mpanjakan’ny Isiraely.
• 17Fa ny mpanjaka kosa no hiantoka ny fanatitra dorana sy ny fanatitra hohanina ary ny fanatitra aidina amin’ny andro firavoravoana sy ny voaloham-bolana ary ny Sabata, dia amin’ny fotoam-pivavahana rehetra tandreman’ny taranak’Isiraeb; eny, izy no hiantota ny fanatitra noho ny ota sy ny fanatitra hohanina sy ny fanatitra dorana ary ny fanati-Pihavanana, mba hanaovana fanavotana ho an’ny taranak’Isiraeb.
• 18[Ny amin’ny andro firavoravoana sy ny fanatitra isan’andro] Izao no lazain’i Jehovah Tompo: Raha mby amin’ny andro voalohany amin’ny volana voalohany dia haka vantotr’ombilahy tsy misy kilema ianao ka hanadio* ny fitoerana masina.[Heb. hanafaka ota]
• 19Ary hangalan’ny mpisorona ny ran’ny fanatitra noho ny ota ka hatentiny amin’ny tolan’ny trano sy amin’ny zoro efatra amin’ny rindrin’ny alitara ary amin’ny tolan’ny vavahadin’ny kianja anatiny.
• 20Ary toy izany koa no hataonao amin’ny andro fahafito amin’ny volana ho an’ny olona manota tsy nahy, na noho izy kely saina, ka dia hanao fanavotana ho an’ny trano ianareo.
• 21Amin’ny andro fahefatra ambin’ny folo amin’ny volana voalohany no hanaovanareo ny Paska; andro firavoravoana hafitoana izany, ka mofo tsy misy masirasira no hohanina.
• 22Ary amin’izany andro izany ny mpanjaka dia hanatitra vantotr’ombilahy iray hatao fanatitra noho ny ota ho an’ny tenany sy ny vahoaka rehetra.
• 23Ary amin’ny andro firavoravoana hafitoana dia hanatitra fanatitra dorana isan’andro mandritra ny hafitoana ho an’i Jehovah izy, dia vantotr’ombilahy fito sy ondrilahy fito tsy misy kilema, ary osilahy iray isan’andro hataony fanatitra noho ny ota.
• 24Ary hanatitra ny fanatitra hohanina koa izy, dia iray efaha isam-bantotr’ombilahy sy iray efaha isan-ondrilahy, ary diloilo eran’ny hina isan-efaha.
• 25Amin’ny andro fahadimy ambin’ny folo amin’ny volana fahafito, amin’ny andro firavoravoana, dia hanatitra tahaka izany koa hafitoana izy, na ny fanatitra noho ny ota, na ny fanatitra dorana, na ny fanatitra hohanina, na ny diloilo.

Toko 46

• 1[Ny amin’ny mpanjaka sy ny fanatitra hataony sy ny hataon’ny vahoaka, sy ny zavatra homeny ho an’ny zanany sy ny mpanompony, ary ny amin’ny fahandroana ny fanatitra naterin’ny vahoaka] Izao no lazain’i Jehovah Tompo: Ny vavahadin’ny kianja anatiny izay manatrika ny atsinanana dia harindrina mandritra ny henemana fanaovan-draharaha; fa amin’ny Sabata sy amin’ny andro voaloham-bolana kosa no hivoha izy.
• 2Dia hiditra avy any ivelany amin’ny lalana mankamin’ny lavarangan’ny vavahady ny mpanjaka ka hijanona eo anilan’ny tolam-bavahady, ary ny fanatitra dorany sy ny fanati-pihavanany dia haterin’ny mpisorona, ary ny mpanjaka hiankohoka eo amin’ny tokonam-bavahady, dia hivoaka izy; ary tsy hirindrina ny vavahady, raha tsy efa hariva ny andro.
• 3Ary ny vahoaka koa hiankohoka eo anatrehan’i Jehovah eo am-bavahady amin’ny Sabata sy amin’ny andro voaloham-bolana.
• 4Ary ny fanatitra dorana izay haterin’ny mpanjaka ho an’i Jehovah amin’ny andro Sabata dia zanak’ondry enina tsy misy kilema sy ondrilahy iray tsy misy kilema koa.
• 5Ary ny fanatitra hohanina fanampin’ilay ondrilahy iray dia iray efaha, ary ny fanatitra hohanina fanampin’ireo zanak’ondry dia araka izay tiany*, ary ny diloilo iray hina isan’efaha.[Na: tratry ny ananany]
• 6ary amin’ny andro voaloham-bolana dia vantotr’ombilahy iray tsy misy kilema sy zanak’ondry enina ary ondrilahy iray; samy tsy hisy kilema ireo.
• 7Ary hanatitra fanatitra hohanina izy, dia iray efaha isam-bantotr’ombilahy sy iray efaha isan-ondrilahy koa; ary ny amin’ny zanak’ondry dia araka izay tiany*, ary ny diloilo dia iray hina isan’efaha.[Na: tratry ny ananany]
• 8Ary raha miditra ny mpanjaka, dia amin’ny lalana mankamin’ny lavarangan’ny vavahady no hidirany ary amin’ny lalana nalehany ihany koa no hivoahany.
• 9Fa raha ny vahoaka kosa no miditra ho eo anatrehan’i Jehovah amin’ny fotoam-pivavahana, dia izay miditra amin’ny vavahady avaratra hiankohoka dia hivoaka amin’ny vavahady atsimo kosa; ary izay miditra amin’ny vavahady atsimo dia hivoaka amin’ny vavahady avaratra kosa: tsy hiverina amin’ilay vavahady nidirany izy, fa amin’izay tandrifiny ihany no hivoahany
• 10Ary ny mpanjaka dia hiara-miditra amin’ireo, ary raha mivoaka ireo, dia hiara-mivoaka aminy.
• 11Ary amin’ny andro firavoravoana sy ny fotoam-pivavahana dia iray efaha no ho fanatitra hohanina isam-bantotr’ombilahy iray, ary iray efaha isan-ondrilahy iray, ary ny amin’ny zanak’ondry, dia araka izay tiany*, ary ny diloilo dia eran’ny hina isan-efaha.[Na: tratry ny ananany]
• 12Ary raha ny mpanjaka no manatitra fanatitra dorana na fanati-pihavanana ho fanatitra sitrapo ho an’i Jehovah, dia hovohana ho azy ny vavahady manatrika ny atsinanana, dia hateriny ny fanatitra dorany sy ny fanati-pihavanany, tahaka izay àtaony amin’ny Sabata; ary rehefa tafavoaka izy, dia harindrina ny vavahady.
• 13Ary zanak’ondry anankiray iray taona tsy misy kilema no haterinao isan’andro ho fanatitra dorana ho an’i Jehovah; isa-maraina no hanateranao azy.
• 14Ary hanatitra fanatitra hohanina ho fanampiny isa-maraina ianao, dia ampahenin’ny efaha sy diloilo ampahatelon’ny hina handemana ny koba tsara toto; fanatitra hohanina ho an’i Jehovah izany: lalàna tsy miova mandrakizay izany.
• 15Ary toy izany no anatero ny zanak’ondry sy ny fanatitra hohanina ary ny diloilo isa-maraina ho fanatitra mandrakariva.
• 16Izao no lazain’i Jehovah Tompo: Raha manome zavatra ho an’ny anankiray amin’ny zanany ny mpanjaka, dia ho lovan’ny zanany izany; eny, ho zara-lovany izany.
• 17Fa raha manome zavatra avy amin’ny lovany ho an’ny anankiray amin’ny mpanompony kosa izy, dia ho azy mandra-pahatongan’ny taona fanafahana ihany izany; dia hiverina ho amin’ny mpanjaka indray izany ka ho lova ho an’ny zanany ihany.
• 18Ary tsy haka amin’ny lovan’ny vahoaka hampiala azy amin’ny zara-taniny izy; fa homeny lova avy amin’ny fananany ihany ny zanany, mba tsy hielezan’ny oloko hiala amin’ny zara-taniny.
• 19Dia nentiny niditra tamin’ny fidirana eo anilan’ny vavahady aho ho ao amin’ireo efi-trano masin’ny mpisorona, izay manatrika ny avaratra; ary, indro, nisy fitoerana teo amin’ny faran’ny andrefana.
• 20Dia hoy izy tamiko: Io no fitoerana fahandroan’ny mpisorona ny fanati-panonerana sy ny fanatitra noho ny ota sy hanendasany ny fanatitra hohanina, mba tsy hitondrany azy mivoaka lò any amin’ny kianja ivelany hanamasina ny olona.
• 21Dia nentiny nivoaka ho any amin’ny kianja ivelany aho ka nampiteteziny ny zorony efatra amin’ny kianja; ary, indro, ao amin’ny isan-joron’ny kianja dia nisy kianja hafa koa.
• 22Teny amin’ny zorony efatra amin’ny kianja dia nisy kianja nofefena, efa-polo hazizo avy ny lavany, ary telo-polo avy ny sakany; mitovy ohatra ireo an-jorony efatra ireo.
• 23Ary nisy rafitra teo anatiny manodidina azy, dia manodidina ireo efatra ireo, izay nisy fahandroana ambanin’izany rafitra manodidina izany.
• 24Dia hoy izy tamiko: Ireto no tranon’ny mpahandro, izay fahandroan’ny mpanao fanompoam-pivavahana eto an-trano ny fanatitra halatsa-drà aterin’ny olona.

Toko 47

• 1[Ny amin’ny onin’ny ranon’aina] Dia nentiny niverina ho eo amin’ny varavaran’ny trano aho; ary, indro,nisy rano niboika avy eo atsinanana eo ambanin’ny tokonan’ny trano; fa manatrika ny atsinanana ny trano, ary ny rano nidina avy teo ambanin’ny lafiny ankavanan’ny trano teo atsimon’ny alitara.
• 2Dia nentiny nivoaka tamin’ny lalana mankamin’ny vavahady avaratra aho ka nampandehaniny manodidina tamin’ny lalana ivelany, hankany amin’ny vavahady ivelany, dia teo amin’ny lalana manatrika ny atsinanana, ary, indro, nisy rano nipoitra avy teo amin’ny ilany ankavanana.
• 3Ary nony nandeha niantsinanana ralehilahy, nisy famolaina teny an-tànany, ka nandrefy arivo hakiho izy, dia nampitainy ny rano aho, ka hakitrokely ny rano.
• 4Ary nandrefy arivo hakiho indray izy, dia nampitainy ny rano aho, ka halohalika ny rano. Ary nandrefy arivo hakiho indray izy, dia nampitainy aho, ka havalahana ny rano.
• 5Ary nandrefy arivo hakiho indray koa izy, ary efa ony tsy azo itana, fa efa nihalalina ny rano, dia rano holanosina, eny, ony tsy azo itana.
• 6Dia hoy izy tamiko: Ry zanak’olona, efa hitanao va izany? Dia nitondra ahy niverina ho eny amoron’ny ony izy.
• 7Ary nony niverina aho, indro, nisy hazo betsaka teny amoron’ny ony, dia teny an-daniny roa.
• 8Dia hoy izy tamiko: Ity rano ity dia mivoaka hankany amin’ny tany atsinanana, dia midina any amin’ny tani-hay* ka miditra eo amin’ny ranomasina; ary rehefa tonga eo an-dranomasina izy, dia sitrana ny rano.[Heb. Arabà]
• 9Ary ny zava-manan’aina rehetra sesehena na aiza na aiza alehan’ny ony tondraka* dia ho velona, ka hisy hazandrano sesehena; fa nony tonga ao ity rano ity, dia ho sitrana izy, ary ho velona izay rehetra hidiran’ny ony.[Heb. ony roa]
• 10Ary hisy mpaka hazandrano hitsangana eny amorony hatrany En-jedy ka hatrany En-eglaima; ho famelarana harato izany; ary ny hazandranony ho maro karazana, tahaka ny hazandrano betsaka dia betsaka any amin’ny Ranomasina Lehibe.
• 11Fa ny honahona sy ny heniheny dia tsy hositranina, fa havela ho sira.
• 12Ary eny amoron’ny ony, eny an-daniny roa, no anirian’ny hazo rehetra fihinam-boa; tsy halazo ny raviny, na ho lany ny voany; fa hamoa voa vaovao isam-bolana izy, satria mivoaka avy ao amin’ny fitoerana masina ny ranony; ary ho fihinana ny voany, ary ho fanafody ny raviny.
• 13[Ny ho faritry ny Tany Masina, sy ny hizarana azy, ary ny ho toetry ny Tanànan’Andriamanitra] Izao no lazain’i Jehovah Tompo: Izao no faritry ny tany hozarainareo ho lova araka ny firenen’Isiraely roa ambin’ny folo; anjaran-droa no ho an’i Josefa.
• 14Ary samy handova avokoa ianareo rehetra, satria efa nanangan-tanana hanome ity ho an’ny razanareo Aho, ka dia ho azonareo ho lova ity tany ity.
• 15Ary izao no faritry ny tany: Ny lafiny avaratra dia hatramin’ny Ranomasina Lehibe amin’ny lalana mankany Hetlona ka hatrany akaikin’i zedada,
• 16dia Hamata, Berota, Sibraima, izay eo anelanelan’ny faritanin’i Damaskosy sy ny fari-tanin’i Hamata, Hazara afovoany, izay eo an-tsisin’i Haorana.
• 17Ary ny fari-taniny dia hatramin’ny ranomasina, dia Hazar-enana, fari-tanin’i Damaskosy, ary amin’ny avaratra dia Hamata no fari-taniny. Izany no lafiny avaratra.
• 18Ary ny lafiny atsinanana hatrany anelanelan’i Haorana sy Damaskosy sy Gileada ary ny tanin’ny Isiraely dia Jordana; hatramin’ny fari-tany ka hatreo amoron’ny ranomasina atsinanana no horefesinareo. Izany no lafiny atsinanana.
• 19Ary ny lafiny atsimo dia hatrany Tamara dia hatramin’ny ranon’i Meriba any Kadesy sy ny lohasahan-driaka ka hatramin’ny Ranomasina Lehibe. Izany no lafiny atsimo.
• 20Ny lafiny andrefana koa dia ny Ranomasina Lehibe hatramin’ny faritany ka hatrany akaikin’i Hamata. Izany no lafiny andrefana.
• 21Hozarainareo ho anareo izany tany izany araka ny firenen’Isiraely.
• 22Ary amin’ny filokana no hizaranareo azy ho lovanareo sy ny vahiny monina ao aminareo, izay miteraka ao aminareo; ka izy dia hataonareo ho tahaka ny tena zanak’Isiraely; hiara-manao filokana aminareo hiara-mandova amin’ny firenen’Isiraely izy.
• 23Ary amin’izay firenena hitoeran’ny vahiny dia ao no hanomezanareo azy ny lovany, hoy Jehovah Tompo.

Toko 48

• 1Ary izao no anaran’ny firenena: Hatramin’ny farany avaratra any amoron-dranomasina amin’ny lalana mankany Hetlona any akaikin’i Hamata sy Hazar-enana, fari-tanin’i Damaskosy eo avaratra, any anilan’i Hamata; izany no ho lafiny atsinanana sy andrefana; anjara iray ho an’i Dana.
• 2Ary mifanolotra amin’ny fari-tanin’i Dana hatrany atsinanana ka hatrany andrefana dia iray koa ho an’i Asera.
• 3Ary mifanolotra amin’ny fari-tanin’i Asera, hatrany atsinanana ka hatrany andrefana dia iray koa ho an’i Naftaly.
• 4Ary mifanolotra amin’ny faritanin’i Naftaly, hatrany atsinanana ka hatrany andrefana, dia iray koa ho an’i Manase,
• 5Ary mifanolotra amin’ny fari-tanin’i Manase, hatrany atsinanana ka hatrany andrefana, dia iray koa ho an’i Efraima.
• 6Ary mifanolotra amin’ny fari-tanin’i Efraima, hatrany atsinanana ka hatrany andrefana, dia iray koa ho an? i Robena.
• 7Ary mifanolotra amin’ny fari-tanin’i Robena, hatrany atsinanana ka hatrany andrefana, dia iray koa ho an’i Joda.
• 8Ary mifanolotra amin’ny faritanin’i Joda, hatrany atsinanana ka hatrany andrefana, no hisian’ilay tany hatokanareo, indimy arivo amby roa alin’ny volotara ny sakany, ary ny lavany mitovy amin’ny anjaran’ny sasany hatrany atsinanana ka hatrany andrefana; ary ny fitoerana masina no ho eo afovoany.
• 9Ny tany izay hatokanareo ho an’i Jehovah, dia dimy arivo amby roa alina ny lavany, ary iray alina ny sakany.
• 10Ary ho an’ny mpisorona izany tany masina voatokana izany, dimy arivo amby roa alina ny lavany avaratra, ary iray alina ny sakany andrefana, ary iray alina ny sakany atsinanana, ary dimy arivo amby roa alina ny lavany atsimo; ary ny fitoerana masin’i Jehovah no ho eo afovoany.
• 11Ho an’ny mpisorona izay nohamasinina avy amin’ny taranak’i zadota izany, dia ireo nitandrina ny nasaiko notandrenam ka tsy nivily tamin’ny nivilian’ny zanak’Isiraely, tahaka ny nivilian’ny Levita,
• 12eny, ho azy izany ho tany halaina amin’ilay efa voatokana, dia zavatra masina indrindra, mifanolotra amin’ny faritanin’ny Levita.
• 13Ary ny Levita koa dia hahazo ny mifanolotra amin’ny fari-tanin’ny mpisorona, dia dimy arivo amby roa alina ny lavany, ary iray alina ny sakany, eny, samy dimy arivo amby roa alina ny lavany, sy iray alina ny sakany.
• 14Ary tsy ho azony hamidy izany, na hatakalo, ary tsy hafindrany ny voaloham-bokatra amin’ny tany; fa masina ho an’i Jehovah izany.
• 15Ary ny dimy arivo, ilay navela tamin’ny sakany mifanolotra amin’ny dimy arivo amby roa alina, dia tsy masina, fa ho an’ny tanàna, ho fonenana sy ho tany fiandrasana; ary ny tanàna no ho ao afovoany.
• 16Ary izao no ohany: Ny avaratra ho dinan-jato amby efatra arivo, ary ny atsimo ho diman-jato amby efatra arivo, ary ny atsinanana ho diman-jato amby efatra arivo, ary ny andrefana ho diman-jato amby efatra arivo.
• 17Ary ny amin’ny tany fiandrasana momba ny tanàna, ny eo amin’ny avaratra dia ho dimam-polo amby roan-jato, ary ny eo amin’ny atsinanana dia ho dimam-polo amby roan-jato, ary ny eo amin’ny andrefana dia ho dimam-polo amby roan-jato.
• 18Ary ny lavany sisa mifanolotra amin’ny anjara masina voatokana dia iray alina atsinanana ary iray alina andrefana, ary hifanolotra amin’ny anjara masina voatokana izany; ary ny vokany hohanin’ny mpiasa ao an-tanàna.
• 19Ary izay mpiasa ao an-tanàna avy amin’ny firenen’Isiraely rehetra no hiasa azy.
• 20Ny tany voatokana rehetra dia dimy arivo amby roa alina sokera; ny ampahefatry ny anjara masina voatokana dia halainareo ho zara-tany momba ny tanàna.
• 21Ary ho an’ny mpanjaka ny sisa an-daniny roa amin’ny anjara masina voatokana sy ny zara-tany momba ny tanàna; mifanolotra amin’ny dimy arivo amby roa alina amin’ny anjara voatokana hatramin’ny fari-tany atsinanana, ary mifanolotra amin’ny dimy arivo amby roa alina hatramin’ny fari-tany andrefana, mifanolotra amin’ireo anjaran’ny sasany, ho an’ny mpanjaka izany; ary ny anjara masina voatokana sy ny trano fitoerana masina no ho eo aforoany.
• 22Ary hatramin’ny zara-tanin’ny Levita sy ny zara-tany momba ny tanàna, sy ao ampovoan’ny an’ny mpanjaka, anelanelan’ny fari-tanin’i Jada sy Benjamina, dia ho an’ny mpanjaka izany.
• 23Ary ny amin’ny firenena sisa, dia hatramin’ny lafiny atsinanana ka hatramin’ny andrefana, dia hisy anjara iray ho an’i Benjamina.
• 24Ary mifanolotra amin’ny faritanin’i Benjamina, hatrany atsinanana ka hatrany andrefana, dia iray koa ho an’i Simeona.
• 25Ary mifanolotra amin’ny faritanin’i Simeona, hatrany atsinanana ka hatrany andrefana, dia iray koa ho an’Isakara.
• 26Ary mifanolotra amin’ny faritanin’Isakara, hatrany atsinanana ka hatrany andrefana, dia iray koa ho an’i Zebolona.
• 27Ary mifanolotra amin’ny faritanin’i Zebolona, hatrany atsinanana ka hatrany andrefana, dia iray koa ho an’i Gada.
• 28Ary mifanolotra amin’ny faritanin’i Gada, amin’ny lafiny atsimo, dia hatrany Tamara sy ny ranon’i Meriba any Kadesy sy ny lohasahan-driaka ka hatramin’ny Ranomasina Lehibe.
• 29Izany no tany hozarainareo amin’ny filokana ho an’ny firenen’Isiraely ho lovany, ary izany no ho anjarany ary, hoy Jehovah Tompo.
• 30Ary izao no ohatry ny tanàna amin’ny lafiny avaratra: diman-jato amby efatra arivo.
• 31Ary ny anaran’ny vavahady dia ho toy ny anaran’ny firenen’Isiraely: ny vavahady telo avaratra, dia vavahadin’i Robena ny iray vavahadin’i Joda ny iray, vavahadin’i Levy ny iray.
• 32Ary amin’ny atsinanana dimanjato amby efatra arivo; ary ny vavahady telo, dia vavahadin’i Josefa ny iray, vavahadin’i Benjamina ny iray, ary vavahadin’i Dana ny iray.
• 33Ary amin’ny atsimo diman-jato amby efatra arivo ohatra, ary ny vavahady telo, dia vavahadin’i Simeona ny iray, vavahadin’Isakara ny iray, vavahadin’i Zebolona ny iray.
• 34Ary amin’ny andrefana dimanjato amby efatra arivo sy vavahady telo, dia vavahadin’i Gada ny iray, vavahadin’i Asera ny iray, vavahadin’i Naftaly ny iray.
• 35Valo arivo amby iray alina ny manodidina. Ary ny anaran’ny tanàna hatramin’izay andro izay dia Jehovah no ao.

Suivez-nous sur facebook :

Toute reproduction, même partielle, est interdite. Les droits d’auteur concernent la traduction, l’apparence et les fonctionnalités du site.